Tun tum chu mahni ngaihdanin ka’n Pathian thu ce fû teh ang. Tunlai bik hian Thlarau Thianghlim changtu nih hi a chuhin kan inchuh ni ber hian ka hre mai. Kelkangah a sing telin kan kal a ni ber mai a, ‘ni tin mi an thleng, thla tin an tam, kum tin an pung zel’ tih hla ang maiin. Chutih lai chuan Darlawn lamah camping tih ang reng leh taksa damna chang tih ang reng thawmte kan hre chamchi bawk a. A bik takin Presbyterian biak in chu lamtual duhthawh vangin a lai kan tivar hiau huau hlawm a nih ber hi. Tunlai (July) phei hi chuan kawngdung bingbileh hrite pawh a leng a niang, Cable TV chanchintharah te pawh a lang hial a nih hi. Thlarau Thianghlim chet rual rual hian thianghlim lutuk lo hi a lo phili ve nasa mai thin tih hriat a tha. Pathian fapa ngei, kan Lal Isua pawh khan baptisma a chan zawh hlim khan fianriala a pa pawl turin thlalerah ni 40 lai a va thang bo a nih kha. Khatah pawh khan thianghlim ve miah loh thlemtu - Setana a lo lang a, nalh leh zei tak takin a rawn thlem mai a, ‘Lung hi chhangah chantir la,’ a rawn tihte phei kha chu riltam dangchara a awm lai kha a ni a, pawina pawh awm âwm lo tak, a duh bau lo tih kan hriat kha. Jerusalem temple chhipa a hruai a, ‘Tum thla la,’ a tihte khan na miah loin han tum thla sela chuan Juda-ho tam tak khan, ‘Pathian fapa ngei a nih dawn hi,’ tiin an zui lui lui mai tur - a duh bau lo tih kan hriat kha. Lal Isua thawhleh hnu - Pentikos nia Zirtirte hnena Thlarau Thianghlim a thlen atang mai khan ringtu zawng zawngte chu an awmkhawm a, an neih intawmin an khawsa a nih kha (Tirh. 2:43-47). Khati khawpa Thlarau Thianghlim thleng - an tawng pawh hnam hrang, tawng hrang hlir 10 chuangin mahni tawng theuha an hriat nghe nghe kha. Khati anga an awm hlimchhawn mai niawmah khan an zinga cheng ve Anania leh Saphiri te khan an ram an han hralh a, sum an kuta an hum meuh kha chuan a then chauh tirhkohte an rawn pe mai a nih kha. Ringtute hnena Thlarau Thianghlim a thlen pawh hian rang fahranin Setana hi a rawn inrawlh zel mai tih chu kan Bible-in min hrilh hi. Thlarau Thianghlim hle thianghlim lo hriat hranna chu ‘AN RAHAH’ a ni tih Mat. 7:15-20-ah kan hmu. Thlarau rah chu Gal. 5:22-ah hmangaihna te, lawmna te, remna te, dawhtheihna te, ngilneihna te, thatna te, rinawmna te, nunnemna te, insumtheihna te a ni a ti. Khi rah chi 9 atang khian chi khat - rinawmna khi han la bing ta ila: Keini Mizo Khristian vek deuhthaw intite hi kan rinawm em? Kan chan loh tur - BPL?chhungkua kan nih te, NLUP?chhungkua nih te, kan tu leh fate scholarship hmuh theih ngei nan kan sum lak luh aia tlem daih kan report em? Buk lung dik tak hmang thin Khristian kan ni em? A man tihniam chuang miah si loa ‘Reduction Sale’ tih tar mai chingte kan ni em? Anhnah ilo zuar, a tel lairila hralh tlak loh phum ruk ching Thlarau Thianghlim kan chang em? Ka mi mawl ngaih ve dan chuan Khristian chu a rinawm phawt mai tur a ni tih hi a ni bur mai. BPL tanpuina lo chhuah lai khan VCP ka ni ve khanglang a, khatih lai kha chuan chhungkaw thla tin pawisa lakluh and chhungkaw member-a semin Rs. 250/- a tlin loh BPL?member a nih theih tih a ni. Tunah ni tawh em lo mah se - mi hnuaihnung chhungkaw hrawk chawm zo lo, Below Poverty Line - mi rethei tih pawh tling pha lo khai chhuah nana tih niawm tak a ni. A chunga rinawmna ka han sawi khi lo ni thin lo mah ila, Kelkangah emaw, Darlawnah emaw, awmhmunah emaw hetia Thlarau Thianghlim ka lo chan tak avang hian rinawm lo taka ka lo tih thinte kha ka sim ta em? Ka inhmuh dan chuan Mizote hian ‘Lak aiin pekin lukhawng a nei,’ (Tirh. 20:35) tih hi thuin kan hril a. A tak chuan ‘Pek aiin lakin lukhawng a nei,’ tih zawmtute kan ni tlangpuiin ka hmu thin. Thlarau Thianghlim ka chan takah chuan a hma aiin chhungkua leh mi dang tan tangkai zawka inhmang tur niawm tak ka ni ti r’u? Bingbileh leh maksak tak taka lamte hi Thlarau Thianghlim chang entirna lo ni teh ta reng pawh ni se, chhungkua leh mi dang tu emaw tan tal chu ka Thlarau Thianghlim chan chuan razh tha a chhuah em? Tlemte mah ni se. Halleluia nileng zankhua mah ila, Pathian duh loh zawng thil ka lo tih thinte ka bansana rah thar tha ka chhuah si loh chuan ka Thlarau Thianghlim chan chu a thianghlim lo a ni mai thei tihte hi ngaihtuah a tha. Ngaihtuah ngun teh - He lung hi chhangah chantir rawh min rawn ti ve mai se, Thlarau Thianghlim tih a ni tiin kan chantirin hausak phah khawpin khawimaw lai quarry-te hi chhangah kan chantir zo vek duh hial mai tur a nia! Engle khawle, Thlarau Thianghlim zarah mahni chan tur dik tak bak hi chu i ban lo phawt mai teh ang u. Ka ngaihdan chuan heti khawpa Kelkang kal kan tam takah chuan BPL member ni thei uk lo, sum duhthawh vanga BPL member-a lo inziak luh thahnem takte bansan thawm hi chu chanchinbua lang khawpa hriat a hun hlein ka hria. Hawh u, englai pawha Thlarau Thianghlim chang nun i zir thar ang u, chutichuan Mizoram hi Vanram tlafual a ni thei ngei ang.