Hei kan ram buai kha kum 50 lai a liam ta reng mai. A?hre phak tan chuan hman ni lawk ni maiin a hriat a; mahse, kum 50 a liam tlat si. Tun ang em hian a mimir pawh kan changkang lo tak zet a, kan ngaihtuahnate kha mawl tak a lo ni. Kan hriat dan satliah mai kha chuan darkar 24 MNF kuta a awm theih phawt chuan America/UNO tih velin kan independent chu an rawn nemnghet mai tura ngai kha kan thahnem hle a ni. Aizawla sawi dan tam tak chu Silchar kawnga dap leilawn khu kan tichhe vek ang a, chutih chhung chuan Assam Rifles kan hneh vek ang a, Independent kan puang ang a, UNO/America-in min rawn pui mai dawn alawm tiin Inpendent chu kan sawi awlsam khawp mai. Dik tak chuan kimtlangah leh culture hrim hrim pawh hi, kan tawng kalhmangte nen thleng hian a inang lo buruhseh khawp si a, India ram chhunga rin luh mah ni ila, India mi ka ni tih hi chu harsa tak a nih reng hi, chungte chu titi lian leh lar a ni (Kei pawh Nowgong Special Jail-a ka tan lai khan Interogating Officer-in “India mi i ni em?” tiin min zawt a. “Ni lo; mahse, Indian Union chhunga awm ka ni,: tiin ka chhang a. A chhan min zawt a - Madrass (Chennai 1964 January-a kan thlen thlak chuan khuta chengte chuan foreigner-ah min ngai vek a, Indian kan ni tih pawh an awih mang lo, Kunamkulam-ah te phei chuan kan foreigner chet ta mai mai nia tiin ka chhang. A dang hlein ka hria). Kha lam kha chu eng pawh ni se, India sawrkhar kha kan ngai ropui lo mai ni loin kan ngainep ve ringawt mai niawm a ni. March, 66 te phei chuan ralthuam pawh, MNF sipai khan an nei vak lo a niang, Elhbun silai nen, a chang leh tihthaih nan halpuah nen kan ri ve dum dum mai zawng a nih kha. Fighter sang deuha thlawk, a thla hmawr sente kha - Khi min pui tur tite pawh an awm khan ka hria! Mahse, India sipai an lo kal takah kha chuan tawlh kha loh theih loh a ni ta a, an tawlh an tawlh a, East Pakistan, tuna Bangladesh ramri an tawlh lut a, jungle warfare lama do an/kan ni ta vel a, chubakah Ralleng (Naga) kan tluk loh em em maiin ka hmu. Kan inhek sek mai a, “Kawktu” tihte pawh a lar em em kha, thangthar hian an hre pha ta si lo a le. Kawktu, sipaiin an hrente kha, anmahni lang loin an thuk ru a, an mi man khawmte kha an tlar a, an kawh apiang kha a tak tak an ti zel mai si, an kawh loh leh an tuar si. Ralleng (Naga) kha chu an chhel, an rinawm bawk. Tuensang HQ-a ka awm ve laiin Base Superintendent pakhat Chaliha an tih mai chuan Assam Rifles Perimetre chhunga Naga pakhat an man kha a dawp a, a til hi vice-in a chep a, an herh tight talh talh a, “I sawi loh chuan kan herh keh mai ang,” tiin an vau a, an herh keh mai, a sawi duh thak lo. Base Supdt chu an hlauhthawnpui a, Kohima district-ah an transfer nghal a; mahse, 1954/65 vel khan a driver nen an zin dun chip dapin an kap mai. Driver chu an thelh!! Chuti vel chuan Naga hel kan tihte kha an rinawm nia. Keini ve kha chu kum pawh a liam hmain KAWKTU kha kan kat zut mai niawm a nih kha! Buai hma khan U Laldenga hnenah pawh kan huai ve lo em mai, Naga chuan mi mal pawhin convoy an ambush ngam a sin te ka tia. Min chhan dan chu, “Ram neitu nihna kan hriat hun hunah kan huai ve mai ang. Naga chu ram neitu an ni mauh a, keini chu Lal ram/Sawrkhar ramah kan awm ve mai mai a ni a, Neitu nih kan inhriat hun hunah kan huaiin, hlauh kan nei bik miah lo mai ang,” tiin khawlaiah min hrilh a ni. Aizawl Sipai HQs kha la ta ila eng ti takin nge India sipaiho khan min rawn tih ang tih chu hriat har tak a ni. 31-3--1966 a Assam Rifles quarter guard-a min dah chu - kan tawt em em mai a. A?vang zawngin lu lam bang lam sia kan mut ve ve hian pakhat ke karah pakhat ke a awm zel lo thei lo. Kan zingah chuan Havilder Major (Bel thum leh Lallukhum bel) Gorkhali, 1st Assam Rifles-a kum 27 lai tang tawh inti hi, eng vang kher emaw ni, a tang ve tlat mai a. Kan vanneih phah angreng khawp mai, tleirawl te pakhat Kangloa tih em ni ta, a tang ve bawk a, Hualkunga te chekawi deuh niin ka hria. Chu tleirawl chu kan sipai tang ve chuan a duat riau a, a zar kan zo chhawng a, biri te kan zuk theih ve phah. Assam Rifles sipai kha a’n ko a, “Hei, Ganglia,” a han tih chuan tang a ni na vang vangin an hlau tho si a, a hmaah an rawn inkheng khawng a, eng eng emaw a leitir a, a zar kan zo a, kan zu ve thin. Chu sipai min hrilh dan chuan 28/2 emaw, 1/3 emaw kha chuan min rawn tawn ula chu leh pawh kan ti hman lo ang. Kan hre si lo a, engmah inpuahchahna kan nei lo. Mahse, 2/3 kha chuan kan hre tawh a - Trench kan lai a, booby trap te kan kam khat vek a, lo luh ngaihna a awm tawh miah lo. In tlai a ni tih min hrilh. Dik maw dik lo maw? A tan ve chhan kha, a sawi tha duh chiah lo a, buai hma daiha lane boy ni thin ‘Ar-ek-hnima’ kan tih mai mai thin kha PT master-ah te a tang chho a, Jemadar (Naik Subedar) a kai a, khawimaw lai uarlawn velah khian OC-in a awm hlan ni awm tak a ni. Khatia buai a nih takah khan zanah an quarters atanga lo chho turin an tir a, lak pawh a la chho ngei awm a. Engvang nge ni dawn quarter guard-a a tan chhan kha? An nute ho, tu emaw kha khuaikhem a tum em ni chek ni. A sawi tha duh miah lo. “Kum 27 ka service tawh a, ka pension mai ang,” te a ti mai mai thin. Zanah sipaiin eng emaw zat min ko chhuak a, Police Thanaah min dah phei a. La dam tak maw - Zemabawk pa, meizial duh ve tak mai hi a tel bawk a, puan a veng a........