Inchhirin ban chang a chen lo, mau tlawn pawhin a chen lo! Kum 1948 kum chawhnu lam khan Census Supervisor-ah sawrkharin min la ve hlauh mai a, thla 4 tan chauh a ni nghe nghe. Ka bial chu Khawpuar (Tipaimukh bul) atanga Thaidawr (Farkawn bul) a ni. Circle Interpreter 6 bial a ni. Ka hna chu Censes Operetor 6 hna supervise a ni. Inchhirin ban chang a chen lo, mau tlawn pawhin a chen lo! Kum 1948 kum chawhnu lam khan Census Supervisor-ah sawrkharin min la ve hlauh mai a, thla 4 tan chauh a ni nghe nghe. Ka bial chu Khawpuar (Tipaimukh bul) atanga Thaidawr (Farkawn bul) a ni. Circle Interpreter 6 bial a ni. Ka hna chu Censes Operetor 6 hna supervise a ni. Thaidawr chu Tiau (lui) kam deuh mai, mel khat vela hla a ni. Thaidawrah chuan Lusei pakhat chauh an awm a (chhungkua). A bak chu, an lal chawpin Pawih, Hrendum vek an ni. Chutih lai chuan in 40 emaw lek an ni. Chu Lusei in khat chauh awmah chuan ka thleng a. An kawt thlang mai chu an lal, Pu Sangviala in chu a ni. Fanu, nuthlawi lengleh, Salmani (?) a nei a, ka zuk rim e ka tia. Rin loh deuh maiin Nghaleng dawipuiah min sawm ta mai. Nuthlawi lengleh ka tih nachhan kher chu Burma pawih ramah pasal a lo han nei tawh a, fa pawn nei loin a lo kir leh a ni awm e. “Hawh, Tiauah nghaleng i dawi ang,” a tia, “Ka thiam ve nang,” tia ka chhan chu, “Thiam a ngai miah lo, ipte ruak i ak ang a, i duh leh chem i keng ang a, keiin sangha manna bungraw lam chu ka tum vek ang. Luiah chuan lung i phawk ang a, keiin a hnuaia sangha chu ka lo man zel mai dawn a ni. Engmah tih tur i nei lo, lung phawh chu a ni mai. Chawchhun pawh ka rawn ngaihtuah vek ang,” a ti a (hetih lai hian kum 19 chauh ka nih chu). “Sangha kan man zawh chuan min paw hawng ang a... ka pa a lawm chuan Sial/Bawng a tlak mai ang. Engle khawle, Vawk chu a lo berah a tlu tur a ni ringawt mai a ni. Hawh, naktukah i kal ang,” a ti sek sek mai a. Keiin nula puitling a ni a, Tiau lah mel khat laia hla a ni si a, “Engtin nge ka puak zawh tehlul ang che,” ka’n tih leh, “Chu chu thu mai a ni. Lui tui kan dai laiin min pua ang a, lui kam hnim kan thlen veleh min nghat mai ang a; tichuan, kal pangngaiin kan kal dun ang a, kan hah leh kan chawl ang a, muang changin kan kal zel ang a, in thlen dawnah min paw bahlat leh ang a, kan kawngka thlenah, ‘Ka pu, kawng min hawn rawh, hei i fanu ka rawn paw hawng a nia,’ i ti ang a, a rawn hawng ang a, in chhungah min nghat mai ang. Ka pa lawm dan a thu thuin ran chu a talh ang, a lo berah vawk chu ngei ngei a ni. Hawh, naktukah i kal mai ang,” min ti sek sek mai si, ka zak nasa mai a. “Hmanah ka u pawh an rawn paw hawng a, ka pa hian Sial a talh mai a sin,” a ti lehnghal a. Ka han ngaihtuah thin a, châk fu mah ila, tleirawl kum 19 mi chauh ka nih vang ni maw, thil danga zakthei lo fu si, ka’n zak tlat mai a nih chu. Chhuanlam dawrawm tete, kan census hna vel chhuanlamin, “Châk teh mah ila, ka hman lo a ni,” te ka ti vel a, KA HMAN TEHLUL NEN. Tunah hian ka ngaihtuah let leh thin a, ka awih ta lo kha ka inchhir leh hnuhnawh ngawih ngawih mai a ni. Experience atan, sawi tehrengah han kal ila chu tun, kum 70 ral hnu pawh hian ka la sawi ka la sawi tur. Zahzum lohna turah ka’n zak ta tlat si kha a pawi zo ta a nih hi. LAL THLEN hi chu Chalrang lal Pa Thangkima khan min ti lui a, tawnhriat atan a lo tha khawp mai.