Motor Vehicle Mizorama a lo luh ve hma (kum 1942 hma tihna) kha chuan bungrua, vai ram atanga kan luk luh ve theihna awm chhun chu bawng-tawlailir (bullock cart) a ni. Silchar/Lalaghat atangin tlawng dungah lawnglengin maji-hoin bungrua an rawn phur chho a. Sairang atangin bawngtawlailirin an rawn phur chho thin, a kal muang em em a, Sairang atangin Aizawl hi an ban tawk a ni ber mai. Bungrua chu dawrkaiho ta a nih avang leh chutih laia dawrkai chu - Dawrpui, Kulikawn, Khatla leh Mission Veng dawrkaiho an ni ber. Chuvangin bawngtawlailira thlen theih turin sawrkarin a ruahman a. Bazar lama kal dan chu, Tuikual (Temple) atangin canteen kualah Dawrpui phei thlenga lut thei tura kawng hawn a ni. Chhim lam chu Tuikual (Temple) atangin kawng hnuai zelah Khatla through-in sikulkawnah a lo chhuak a - chuta tangin Kulikawn thleng-in. Sikulkawn atanga kawng chung zawk mual pawng laiah khian thirban 3 lamlianah an phun tlat a. Canteen kual lo lamah khian an phun bawk a. Tin, Quarter guard kawt khawimaw laiah khian an phun bawk; chuvangin, sikulkawn atanga kawng chung zelah canteen kual lo lam thleng chuan bawngtawlailir a kal thei lo tihna a nih chu. Chubakah Treasury Square Feren ram kal hriatrengna lung bulah te, tuna Bible House-ah te leh khawi khawi laiah emaw khian thirban chu an phun. An sawi hmangin thirsakawr tlan chak lutuk break nan a ni an ti. Motor la awm lo mah se khang lai pawh khan alkatra chu lamlian pawimawh laiah chuan an luan vek tho a, road roller chu midumhoin an hnuk tauh tauh mai a ni. Private building a awm loh avangin Sikulkawn leh Dawrpui Bungkawn inkar khi a thengthawin kal vel a nuam a, thing hring a tam a, a mawi bawk. Canteen kual lo lam khi kea kalna ber a ni a, a kual lam khi chu bawngtawlailir kawng a nih ber chu. Canteen khi a la ngai deuh rengin ka hria a; mahse, ka hriat thiam theih vak loh chu tuna kawngpui ai khian canteen bang khi a hnai zawkin ka hria. Canteen bangah chuan darthlalang feet 2 aia sei mah tur, feet khat aia hlai an tar a, kawng atanga inen theih tura siam a ni. Pakhat chu a kul a, a dang chu a eu thung a, pakhat leh chu a ineuh (ti mai ang). Pakhatah hmai a bial em em a, pakhatah a tung em em a, ingeuh ka tih maiah kha chuan S hi chhawngin hma lam zawngin en ila, chutiang chuan mahni hmai kan hmu thin. Canteen kan kal pelh tawh phawt chuan kan pel satliah mai thei lo, kan inen ngei ngei mai a, a khual a tualin kan nui vak vak reng mai a ni. An boral ta bawk a, ka aia naupang tleirawlho min hrilh dan phei chuan kawrfual chauh haa kan kal chuan kan thutung a, kan han inhlim thin mai chu CHHE TAK A NI tiin min hrilh a, kan nui nasa teh a nia. Quarter guard leh Vanapa Hall inkar mual pawngah sawn khaw thlang lam hawiin King George V lim (bust) an dah thin a, tin Quarter guard kawtah sawn Queen Victoria lim (bust) an dah thin bawk. Laipui pahnih tle vur mai an dah bawk. Kuta kawh phal loh a ni tih a nih avangin mihring luhlul dan hi a mak khawp a, kawh phal loh tih a nih vang khan kekawr ipte zen chung hian meng zak zak chungin kan kawk talh thin zuk nia. Mihring siamphung hi MAK tak a lo ni. Phal loh tih thu kha hre lem lo ila, kan kawk chuang awm tawp si lo a! Heng ka sawi hun lai hian tuna Assam Rifles Biak In khi a awm tawh a nih pawhin khi chauh khi sipai lam building ni lo awm chhun chu a ni mai ang. Fir thing leh eng thing thing emaw an zuah a, kal vel a nuam hle; amaherawhchu fir pangang kan ti mai a, pangrem kan tih ang mai hi pun lai a nei a, kawngah a tla thin a, pangang hlau mi, a bikin hmeichhia an khawngaihthlak hle thin. Sawrkharin tihrem tumin a bul hualin alkatra (?) a hnawih vek a; mahse, pangang an lawn a ni lo a, phengphehlep (moth) fir kungah a tui a, chu chu a keu a, chung chu pangremho chu a ni mai si, tihrem chi a ni lo, a hun a ral a, an bo leh diak mai thin. Sawrkhar khan thing a ui em em mai a, tum khat pawh Commandant-in fir thing kung khat hnawksaka an hriat Bawrhsap hnenah kih phalna an dil a, Bawrhsapin a phal lo a. A hnu deuhah Bawrhsap chawlh hlana Commandant-in Bawrhsap charge a lak laiin chu Commandant vek chuan phalna chu a dil leh a, amah vek chu Bawrhsap dinhmuna a va thut chuan an rawn put up a ni awm a, note sheet vela ziakte a’n en chuan amah bawk chuan ama sign ngei dilna chu zuk hnawl leh a! Sapho kha mak tak an ni. Venghlui (Rahsi Venghlui) hi chu a hmain ka sawi nual tawh kha. A hma chuan Thatvunga veng an ti a ni awm e. Chumi hnu chuan Rahsi Vengah an siam kha a ni a, mahse chu pawh chu a tlawlh leh ta si kha a ni a. Engle khawle, Aizawl vela veng hlun ber pawl chu niawm tak a ni. Khang hun lai atang tawh khan Dawrpui phei hi chu a pui lai ber a ni a, Dawrpui chhak kawng phei hi awm tho mah se in pakhatmah a awm lo. Dawrpui phei pawh hi chhak lam kil phei hi stall a ni ber a, luah leh a chung ringawt kaikulh a awm phei thliah a, a then chu luah a ni tho bawk. Chung luah lohah chuan Dawrpui lian ni, Inrinni hian anhnah leh hnephnawl an zuar thin. Zion Street kan tih tak hi in a awm thla nual a, a tawp lam khu chu sakawrpu lane tih ang reng kha a ni mai. Chhinga Veng erawh chu awmsa reng a ni.