June 1-a chhuak tur kha chhuah loin hmalai ka’n chawl e ka tia, ka rin ai daihin min chhuahchhal an thahnem mai! Keia ‘KA HUANG’ ve tehlul hi chanchinbu hmun awl hnawhkhatna mai mai nia ka rin avangin hei kum 5 aia rei KA HUANG ta bawk nen, mi nin hlauh thuah ka’n inthlahrung ve thin alawm maw le. Message mai bakah mitthi vuinaah te min ‘eng ti nge’ mawlh mawlh mai a, ka zak ta mah mah mai. Amaherawhchu, rei pui chu ka chhunzawm theih ka ring meuh lo. Kum upa chiam si loin, taksa lam hian ka tlin lo e tih te hi a lo tum ve nen. Ka mit lah hi ding lam tum 2, vei lam tum khat zai tawh a han ni leh nghal a, D te hi ka hmu O?thul, buai ve tak ka nia sin! Awle, pian leh murna leh seilenna AIJAL kha ka mit chhe zetah pawh hian a thla na na na chu a cham reng mai! Mi huatthu sawi hlau lo phei ila chu zah pah nei miah loa han sawi fawl fawl maite hi ka châk thin, chu’ng chu ka han thup ve khanglang lo thei si lo a. Aizawl, lungpui insi ngir khup ang hi a ni lo. Sapho an lo chhuak a, Durtlangah damdawi in an sa a, thawktu quarters nen. Tuna Assam Rifles-ho hmunah khian an sa leh a, Missionary-ho bangla Mission Compound-ah an sa leh daih a, motor sotor pawh an ngaihtuah lo, bridle path (sakawr chunga kal theihna) an siam a, an duhtawk mai. Pi Zaii (Miss Katie Hughes) te kha a’n thau tehreng nen a sakawr Vara-ah a chuang ve nul nul mai a, a tek a tek ve mai. Keini Aizawla khawsate hi chu kan han (inti) changkang tawh khawp a, Sikulpui kawn atanga Vai Hmeichhe venga kal tur pawh City bus kan ti talh zel. Officer (car entitle lo pawh) office hnai te pawh car-a chuanga office kawta driver-in car kawngkhar hawn kha zuk nghak zel hlawm tawh ia! Office tur, mi in luah tur zawng lah chuan Sikulpui kawn leh Chanmari inkar bak an zawng duh lo! Sawi leh sawi hnu, Sapho hun lai chuan Bawrhsap in te khi a mawi em em a, a compound lah pangpar mawi tak tak parna, a bakah phaitual hnim an zuah hring dup mai a. Tunah Larsap inah kan hmang a, tute emaw an lut hlauh dah ang e, tih hlau niawm takin, compound lang thei lek loin an hung a, a chhungah office emawni te an la sa ta dah rual a. Bawrhsap in kawt hmar lam dep atanga Feren rama nunna chân tate hriatrengna lung thleng khian hmun ruak kawng tawn tawnah an dah a. Tuna Treasury building-ah tak khian tuikhuah kil li nei, a hual chhuaka a tawp thlenga step rem a awm a, tui a tlem pawhin a thal turin step-ah a chhuk theih zel a ni. Kha tuikhuah kha Mali-hoin pangpar chawmna tui an chawina niawm tak a ni. Chuta tanga Laldenga lungphun vel thleng khian thirlena hung a ni a, Sap thlanmual tih a ni. Fel taka rem thlap a ni a, a velah pangpar - rose te a par chûk thin. Ka hriat ve phakah chuan Salvation sap Sairang kawnga motor accident vanga boral ta pawh kha an phum a ni. Thlante pawh ka va lai ve nghe nghe. Kha kha ka luh hmasak ber leh hnuhnung ber a ni mai awm e! Kawng lehlam chu tuna Assembly Annexe saknaah khian Sasaw thing (Oak) kung li kung nga a awm a, a hnuaiah hnim a to hleihtheih loh avangin chawlh nan a remchang hle. Chuta tanga Treasury building hlui kawta lamlian thlang kal pawhna thleng khian (tun hmain kawng a awm tho a, mahse inzuar an awm ngai lo) pangpar huan a ni. Thirlena hung a ni a, rose te, snap dragon te, Nuaithang te leh derhken par buk te, derhken hnansin te an ching a, a vul mawi thei em em a ni. Tin, tuikhuah ka sawi chhakah khan, kawngpui kam deuh maiah Makpazangkang (hnungzang tih thluk a ni lo, mipa kapkara mi ang thluk a ni) a awm a, lamlian a rawn zar duai mai a, a par vul lai chuan a mawi thei khawp mai, mahse a rah a rimchhe deuh a, chu pawh Mali leh mirawnghoin (mirawng hi Kabui Naga, tuna Saron Veng kan tiha awm, sawrkharin hmunphiata a chah chhuah an ni, khatih lai khan Mizoin hmunphiat hna kan duh lo a ni awm e) an phiat fai zel a, a rimchhe hman ve lo. A hnah a mawi bawk si, a par a mawi bawk si. A rah rimchhe lo se chu sawisel bo a ni maw le. Bawrhsap in kawn chhim lam dep atanga tuikhuahtlang khi ngaw thelh hun mai a ni. A hnuai hnim tur chu midum (santal)-hoin an sam fai zel a, len khawthawn a nuam takzet a ni. Khi tuikhuahtlangah khian Civil Surgeon bangla, Supera bangla leh tuikhuah enkawltu quarters emaw chauh a awm a, Sikulpui leh a bul (Republic lam)-a Hostel leh Guardian quarters bak chu in a awm awm pawh ka hre lo. Chu ka hmun sawi lai chu Sikulpui kawn atanga kawng chung zawk leh Republic Avenue kawng chung zar zar (chung lam tihna) a nih deuh ber chu. Aijal kha sapho khan tawt lo turin an duang a lo ni ber awm e. Pi Zaii te kha a hnu lam deuhah chuan a inkhawm tur kaih ngai khawpa thau kha a ni a, mahse tuna Moderator bangla ni ta atang khian tuna Biak Inpui kan tihah khian chhun leh zan pawh sawi loin a inkhawm ngat ngat tho mai nia. Ka rin dan chuan tuna Mizo (indianized) hi chuan missionary bangla chu biak in hnaih te teah kan sa thluahin ka ring. Civil Hospital enkawltu tur bangla pawh tuikhuahtlanga sak te chu khawi lam, a hlat berah virmep tlangah khian kan sa ta ve ang, tuna Casualty building-a kan sak loh vek pawhin. Tuna Aizawl hian hmana Aijal kha a zau lamah a khum tehchiam lo. Hmanah kha chuan thawl mawi takin min khawsaktir a, tunah hi chuan a tawtin kan tawt khat tlat mai a, concrete building-in lengkir lungpui hmun ang maiin kan khir iar uar mai a nih hi. Sapho kha la awm rengin thu la nei se chu a khua hi an zauh zel ang a, khaw zau tawk tak mawi takin an siam ka ring. Tunah phei chuan Telephone, mobile phone tih ang reng; eng fax fax emaw nen kan che tawh a, office inhnaih teh rup pawh hi a ngaiin ka hre lo. Office lian hi dah hla ila mipuiin kan zui zel mai zawk a ni. Han ngaihtuah teh mah, Laipuitlang pang lung kelha hmun te pawh inin a khat ta tlat mai a, awih pawh a awm tawh lo. Revenue lam lahin in sak theih lohna hmun pawh an pe zel mai a, sak theih lohna hmun mai pawh ni loin hmun awm lo thlenga pe niawma sawi te pawh ka hria. Reid House, Pu McCall-a sak te kha kan phin darh a, khangte kha hmang zuiin Planning Office turte chu hmun hla zawkah sak mai ni se, a veivahna tur motor lei lah kan châk em em hlawm bawk si a. Thuneitute hian Office building hla zawka sak hi tum zel teh un. Tu pa danah emaw heti reng renga in kan sak tawt chuan, ‘There’s no room in Kentuick’ tia pem daih a tul mai dawn alawm le.