Mission Veng thuartham kha ka la sawi zo lo a nia. Khang lai khan Aijal-ah mi cheng kan la thahnem lo hle a niang, mihring kan inhriat pawh dan kha. Mission Veng chu in 75 kan ni mai a, Kulikawn, Khasi Veng, Rahsi Veng, Venghnuai leh Dam Veng chu Aijal chhim lam veng Mizo chenna a ni mai. Vai hmeichhe Veng tih takah Mizo chu ka hriat sual loh chuan, Pu H.K.Hleia, Pu Keua (Sialsuk atangin) leh Pu Chawnga an ni deuh maiin ka hria. Bungkawn te saw a la awm si lo, Maubawk saw khaw hrang tehchawk a chang a, sikul rawn kai bak chu chuti takin kei chuan ka va hre lo. Republic te lah 1950 hnu a ni si. Tuna Tuikual kan tih te, Chanmari kan tihte hi mihring chenna a ni si lo. A chunga ka sawi bak veng chu - Venghlui, Dawrpui, Chhinga Veng, Zarkawt leh Hmarkaii Nu Veng (Hmarkaia Nu Veng ti riakin ka lo sawi thin a, May 25 khan Naming of Streets & Numbering of Houses chungchangah AMC kohin kan thukhawm a, chutah chuan Hmarkaii Nu tih a ni tih an sawi takah chuan ka ti Hmarkaii Nu Veng ve ta) bak veng dang a la awm bik si lo a; chuvangin, Aijal pum pui kha in 1000 emaw chauh kan lo ni awmin ka inring ta. Chuvang chuan Zarkawt/Dawrpui/Chhinga Veng lam pawh chhim lam vengah lo lengin nula an rawn rim a, keini lam pawh chuti tho chu kan ni. Mihring hrim hrim pawh kan la inhre hle niawmin ka ngai. Kei ngiang pawhin Zarkawt pa - Pu Buchhawna te, Pu Sainghinga te, Pu Lalaua te, Pu Hmartawnphunga te pawh zuk hre ve phak ia! Chhinga Veng lam lah U Lalhmuaka (Axis Bank building neitu, hmanni lawka boral ta) te angte nen khan kan inupat hleih tehlul nen zuk inhria ia, a nau Pabuanga te nen phei kha chuan nula kan rimho reng mai (min chhuh deuhthaw ta mai pawh a!) Chuti khawpa tlem chu kan lo nih vangin kan inlen pawlh nasa hle a ni. Chawlhni tlai len tih lahin anni veng lam pawhin Tuikhuahtlang te kha an rawn thleng a, a rual hian kan tleh ve dal dal thin. Kan ler thak hle hlawm ni tur a ni, ralkhat atang hian kan in ‘AHEM’ thin. Pawnlang hle mah se, a hun lai chuan nuam tak asin. Tum khat phei chu ka U te ina awm tlangval tir, hmeltha tak phei chu kan veng lam tleirawl leh Dawrpui lam tleirawlin an inchuh a, sikulkawnah khian an intibuai mawle! U Rina (Navy bang) Lungleng ruang zawn tum pawh khan, Chawlhni tlai a lo ni kher bawk nen, Lammual bulah sawn kan innam deuh va, chhim lam kan tam tawh zawk avangin Sapthlenga (Rinthanga) chuan, “Dawrpui lam tlangval, kan veng lam nula rim tur kha chu lo va kal ta ula, keini’n ruang hi chu kan rawn zawn mai ang,” a ti nghe nghe mawle. Chuti khawp chuan Dawrpui lam tlangval pawh kan veng lamah an lo leng nasa thin nia. Mission Veng lam kha - kar hmasaa in 75 awmna ri kham ka sawi kha Zosapin Pu Lal Singha hnen atanga an lei chin a ni lo. Zosapin Rs. 100/- a an lei chu Sikulkawn liam Lungli bul kawng atanga Mission Veng bazar (sa zawrhna thleng, Pu H.B.Lalnghingloa dawr huamin Pu Tlangbawia leh Pu Zokunga inkar Sakhisih (Luipui dunga zawh thlaa, Vai lui nen an infinna thleng. Vailui rawn zawh chhoin Sikulpuikawn a lo thleng chho a ni. Rs. 100/- chuan man ve tak a ni ti raw! Khatih lai nula leh tlangval inkawm dan kha - tun ang hi ni loin a hlawpin kan inkawm nasa awm ngawtin ka hre ta, party tih ang rengte kha a veng vengin kan bei mai kha a nia. Hla kha khawi lam atanga kan puak chhuah nge pawh ka hre hlawm lo. “Carol kan party, in ina kan lo len hian kan duhtawk chu siki thum pengleng hui le hui, And the marker sarlar pengleng hui le hui 2,” tih hlate kha kan uar em em a. Meraw lâm kan tih mai, “Meraw meraw andar meraw an sister, Aw, tawini an never never come ka sai eraw ka sai e,” tih velte kha chu tu nu van zai emaw an ti tain ka hria. Khang meraw lâm te kha, a nuam teh asin. Tum khat pawh Ni Darlianchhungi (Bawihtei nu) te ina Pi Daithangi (Aithulha Nu) kan zai lâm vak mai mawle! Meraw hla ngatin. Nula rim hi tlangval zan tin hna ni maw ka ti mai a, min ngaizawngtu awm mah suh se, nula rim hi chu ka thulh khât tak meuhin ka hria; amaherawh hmelchhe na na na inthlahrun a na a, veng dang - Dawrpui tih ang rengah chuan ka leng miah loin ka hria. Ka len hlat chu Venghlui, Kulikawn, Venghnuai leh Rahsi Veng a ni mai awm e. E, takin a, Zalen chanchinbu 31-5-2015-a KA HUANG chhuakah khan Rahsi Veng chanchin kha ka ziak nual a - Thakthing Veng Branch YMA President (?) (Pu Kawllianchhunga fapa)-in min rawn phone a, “Vety. doctor Zokhuma chuan a pa (Luaia) chu a pu Pu Paliana ina piang niawmin min hrilh a; chuvangin, Rahsi Veng tih a nih hma hian kan Vengah hian mi an awm tawh niin kan chhut a, Thakthing tih niawmin kan hria,” tiin min rawn phone a. Dr. Zokhuma farnu (Thanchhumi) ni 10/6 khan ka zawt a, “Ka pu pawh tuna Venghlui kan tih atang sawn phei alawm. Amah kha Lushai Clerk hmasa ber a nih avangin lalna pawh kha pek a ni,” a ti a. Pu Paliana ho chuan Rahsi Veng chu an va din ta niawm tak niin kan ngai. Engle khawle, kum 100 chuang daih thil a nih avangin chiang taka hriat a harsa ta a ni. Thanchhumi hriat dan hi a dik chuan Pu Paliana te hoin Rahsi Veng an din hma hian mi an awm lo ni awm tak zawng a niah kei chuan ka ngai.