July ni 5-a chhuakah khan inkhel chi khat - Golf an tih khelhna hmun an siam ka sawi hmaih a. Tuna Commandant kawt awi laiah te sawn an lai zawl bik a, chuti ang laih zawl chu tuikhuah thlang ta zawk kamah te, tuna kan Chief Secretary huan khawimaw laiah te a awm a; nimahsela, kei chuan golf an khel chu ka hmu lo. Bawrhsap pisa hnung, Court building awmna khi tennis court a ni thin, puan chhah deuh dumpawlin sang deuh tak thlengin an hung tlat thin. Ball danna ni maw, mi naran hmuh an phal loh vang ni maw? Tuna Hospital Road kan tih mai, Dawrpui phei chungah khuan tun ang bawkin kawng chu kal tho mah se dawr pakhat mah a awm lo. Khi kawng chhakah khi chuan Civil Surgeon Officer, Medical staff quarters leh damdawi in, jail leh thana te a awm. Hospital chu Chalhfilh hawi zawngin tlar thum ang deuhva sak a ni. Thana lam dep chu mipa ward, chhim lam ber chu hmeichhe ward, a lai chu office, nurse-ho inthlakna, store room te a ni. A lai chu an tipawng bik a, verandah an siam a, a thengthaw khawp mai. Damlo, Aizawl - Dak In atanga mel 10 (km 16) aia hnai chu mahniin chaw kan intum a, mel 10 pawn chu diet an pe. Chuvanga Reiek mel 9 ni thin pawh mel 10 a pelh theih nan kawng an laih kual! An Lal, Pu Lalluaia kha a fing bawk a, khatih kawngah kha chuan a khuate a khawngaih hle a ni. Jail chu tuna Millenium Building hmun hi a nih kha, sakna a la rei lo bawk a, tam tak chuan in hmuh kha. Jail leh Thana chhak khi Babu tlang hnai zawk tih a ni. Bengali babuho quarters an sa a, tin tuna an pathiam biak in khi chu Civil Hindu-ho pathian biakna hmun a ni tho. Sipai chuan tuna drill shed bulah khian durga puja laiin lawi an tan thin. Khristian naupangho en chu an phal mang lo a; nimahsela, naupang hawklak tan chuan hmuhnawm tehchawk a chang a, kan en ru hram hram thin. Tuikhuah chhakta zawkah te sawn an paih (immersion) thin a, tum khat pawh Durga puan leh a lukhumte duh vangin Sainghingloa te nen kan hnuk chhuak a, kawng bula kan dah phu hlur hlur mai! Dawrpui phei kawng chhak ka tih saw chu - District Council kan neih hnu khan dawte (stall)-ah an siam a. Engti zia emaw ni ta, Atta lane tih hming a pu ta mai a - ka hriat sual loh chuan Zu leh a tawpa U lam chi hming a tamin chhunah aiin zanah dawr a lun zawk hlawm a ni awm e! Tuna Chief Minister banga awmna vel khi Babu tlang hla zawk tih a ni bawk, vai babu hlir awm ni maw ka ti mai. Tin, PWD Hall (?) a awm bawk a, tum khat emaw chu Cinema (coloured - 35 mm) pawh an chhuah chu ka en ve. Tuna Education Directorate leh a pang kawng chhak lam - Govt. High School velte khi Thingpui huan tlang tih a ni a, phai lam thingpui anga tihtawi ni si loin lawn tham tham a awm. Chhawlhring leh Tiktik savain an chen nan tak an hman avangin thlikthliekbawm an ek atangin a to ta thin a, thingpui chakna kha a nunna a hman avangin, hun eng emaw chen chu Chhawlhring leh Tiktikin lu man siki (25 paise) a man khanglang an ti thin. Siki (25 paise) hi a tlem ti mai suh u, chung lai chuan buhfai ser 5 (kg 4 zet) a lei theih asin! Dawrpui phei hnuai, tuna Saron Veng tih tak saw Mirawng Veng tih a ni. Mirawng kan tihho kha Kabui Naga an tihte khu an ni awm e. An lo chhuah chhan pawh Mizo hi, kan chapo veng ni maw - ek paoh nih kan duh miah lo a ni awm e. Khatih lai kha chuan septic tank tih ang reng kha damdawi in leh staff quarters iloah reng reng la awm hek lo, lei laih khuar sen a ni bawk si lo, ek thlakna turin tin an hung mai a, chu chu daiah - hei tun thlengin Saron Veng sira kawr pawh ek paih lui tih a nih hi! Chung ek tin ilo phurh leh khawlai dung phiah kha keini Mizoho hian kan duh loh avangin Mirawngho chu sawrkharin a chah chhuak ni awm a ni. Chuvang chuan hmun khatah an dah ta a, Mirawng Veng hming a put phah ta a ni. Khualbuk pawh a awm thin a, tlangval hawklakin hmeichhe duk dak lo leh mi anglo kawm nan an hmang thin a ni awm e. Hmeichhe pakhat pawh kha, meng tha duh miah lo a ni a, tuten emaw an mutpui a, siki (paise 25) a inchhiar em ni tehreng, “Pachhunga ka nia, naktukah dawrah ka pe ang che,” a ti thin a niang, a tuka Pu Pachhunga (P & Sons) dawra a han kal a, a han thin hian Pu Pachhunga khan nui ruh ruh chung hian, “Mai mai thin a, mai mai thin a,” ti chungin a pe ve zel thin an ti. Pu Pachhunga kha mi ngil, hausa, thilphal a ni. An pafa thumin an in-duty chhawk thin a, Pu Pachhunga duty ni hi chuan chhuk lam Sairang thleng chuan man Re. 1/- chu a la ve ngai lo a ni awm a, a faten an zawh chuan, “A hek hleinem, a lir bup bup a, a thleng mai alawm,” a ti mai a, anni chuan, “Chuti chu duty ve tawh suh,” an ti rawk mai a ni aw, “KAN AWL TING,” a ti hlauh mai an ti! Kuaite (vaibel chi khat) kha a pet reng mai a, nawalh (Horse head - fung 60 awm) khan ni khatah a tla lo a niang, “Vaiho hian ni khat tla nawalh siam se tha tur,” a ti thin an ti. Tum khat LSA (MZP tih tak) inkhawmnaah Rokamloi (Jambua nupui, A.Thanglura farnu, tunah London-ah a awm) nen baltin mau hlam khat aia sei hretin an zawntir a, Pu Pachhunga kun an phal si lo a, Rokamloi a tawi si, Pu Pachhunga a sang si - stage an zawn tlang thei lo reng reng. Rokamloi hnung lam a thleng reng mai, an huh phung mai nia!