Awle, vawiin hi mi dang sawi dan chuan, “Lalmanga nu lawm rawih ni,” an ti a, kei ka lo hriat ve thin dan chuan, “Lalmanga nu lawm rawih thla,” tiin ka lo pai ve mai mai thin. Tantu ngah lem lo mah ila Lalmanga nu khan engtin nge June 21 hi ni rei ni ber a nih a hriat dan an sawiah hian ka hmin ve lo. Hmawlh a phun ang a, ni rei dan a chhinchhiah a niang tihte hi chu ka ve phak lo. Sangkhat za pinga mi daih a ni a, a scientific lu deuhin ka hria. Tin, ni (sun) eng atanga hriat niawma sawite hi June ni 21 thuarthamte phei chu nikir ni lan loh lai a ni lehnghal a, thla azawng erawh chuan June hi ni rei thla a nih chu a hriat ngei ka ring, mi dang pawhin. Mahse, Lalmanga nu hi mi chekngel tak a nih avangin a lawmte tha darkar khat emaw leka âm kha a thiam a ni mai. Tunge hria i, a hma atangin mipa tha a lo bat lawk teuh tawh ang a, June thla, ni rei lai hian a lo tha bat tawhte ni rei thla chuhin a ruai thin a ni mah zawkin ka ring thin. Nuthlawi (hmeithai) ni itawm fel tak niin pa chak pui pui tha a lo bat lawk teuh thin a ni mahna! June 14-a chhuakah khan Pu Chheua tih tur engti zia tehreng nge, Pu Keua ka’n tih tlat mai kha, Sialsuka mi a nih vang leh ka pa Sialsuk MAV Sikula head master a va nih a, kan nghen pawl a nih tehlul nen, ka zak ngawt mai. Ka hriat sual loh chuan Vai Hmeichhe Veng tawp chu Dal Bahadura (Vai sikul zirtirtu) te in kha a ni mai a, U Chheua kha tuna Nursery kawng phei hi piah deuh thlenga va su pawpin in a va sa a, a in thlen hma khan biak in (chu pawh fal deuhin) awmin ka hre tlat a. Rev. Rinmawia min hrilh danin U Chawnga in kha inkhawm nan an lo hmang thin a ni awm a, chu chu biak in emaw ka lo ti ve rawk niin ka ring ta. Chutih lai chuan Vai hmeichhe damdawi in (Loch hospital, tuna Pu L.Pachhunga in ni ta saw) pawh kha an la hmang a ni. Upa Rualyapa te in chho khi chu sipai veng a nih avangin kan kal ngai lo. Kan naupan lai chuan Vai (Gorkhali/Nepali)-ho khan Lushai Kuki min ti a, min ten em em a, mihringah pawh min chhiar meuh lo a ni ta ve ang. Anniho kha Pathian kephah atanga chhuak tihte an nih nuk kha. Tui connection-te la awm hek lo, Maubawk kawng Dam tui te, Vailui kam Darnam tuikhur te an chawi lo thei bik si lo, um an phur ve lo a, tin an chhipchhuan mai a, dan naranin hmeichhia vekin tui an chawi ve. An tui chhipchhuan lai kawnga kan tawha kan inhrut hlauh chuan, “Het sala,” tiin an tui kha kawng thlangah an bun vek a, an chawi tha leh ngat zel thin a. Keini’n kan run ve bawk si a, hrut palh luih kan ching em em mai a, min umpha si lo a, chuti reng reng chuan kan runluih ve thin. Annihoin JUTHA an tih kha kan ni awm ta ber e. Sikul lamah lah Sikul senah khian vai naupang an kal ve a, a building khi kan insem a ni ta ber awm e. Chulai vel sikul zirtirtute chu - Joy Bahadur (Keleka) Maubawk te, Pu Zalawra Mission Veng te an ni. Chawlhlawk hian kan aia U te hian min chotuah ta thin a, “I ngam chuan a chalah chil hnawm rawh le,” an han ti a, kan aia lian kha min chotuah tlangpui si - kan han insual phah hian an chhipzuah man kan tum tlat a, takina, khang lai khan Vai mipa naupang tam berin lu an met kawlh a, an chhipah zungte tiat vel hian an zuah ngauh mai a, sakhua vang lam ni maw? Chu chu kan man fuh hlauh chuan pawh leh chelh a rem si a, kan han hnuk a, an te vawng vawng zel, ngam awlna lai ber a ni. In se sik tur an tihte hian an hnuaiah kan bawkvak lut a, an sazuah (kekawr chhanah) seh ila an te vawng vawng a, kan ngam zel mai. Khang lai khan ni tin pakhat kan sual lo thei lo ang deuh a ni. Mahnin tum lo mah ila, aia upaten min tih chuan tlawm em kha kan ngam si lo, tah ni pawh kan ngah ve tho. Thawk khat lai phei chuan Lane boy-ho an lo kal ve a, Thirea te, Motilala te. Synod Office zawn kawngpuiah khuan U Romawia pawh an vaw thlu der a, Zosap leh sawrkar lam sap pawh an intihbuai phah deuh a, chu buai atang chuan Lane boy sikul kan an khap ta nghe nghe a ni. Vai hmeichhe veng chu han sawi leh rih ila - Sikul kawn hnaih ber vai in chu tuna P.P.John-a in khi a ni, Khuptuaha kan ti mai a, tilpuk fual duai mai a ni a, Subedar pension a ni an ti. A makpa, Khuptuaha baje kan ti mai a, chu mite chu rual diahin an awm a. An fanu hmeltha deuh mai chu Saroswati kan ti mai a, kan veng lamah bawngchaw a phur reng mai. A nutate chu Lala te, Narainsingha (K.K.Chhetri, AIzawl Civil Hospital-a Orthopaedic Specialist pa) te, Mohana kan tih maite an ni. An farnu te zawk, Radi kan tih mai pawh hmeltha deuh a awm. Khawiah emaw a awm tak ni. A piah leh chu Hmeichhe veng thlen dawn kawng thlangah sawn Aimana (thirdeng) leh Pi Chibaii kan tih mai an awm a - kha Pi Chibaii kha eng vang ni maw, “Ka pi Chibai,” tih a haw em em mai a, chemkawm a keng a, min um a, keini a umphak loh tawkin kan tlan zel a, a hah tawp, a nin tawpah, a pawnfen a’n hlim sauh sauh a, min dawrh khum pah hian, “La ro,” a ti thin. Chu chu hmuh châkin kan chhaih phah thung si a, a hnuah phei chuan sikulah chhaih tawh lo tura puang hialin ka hre ta. Chulaiah chuan in thum emaw a tlar phei a, a dawt chu Zokaithanga building-ah sawn Assam Rifles puanthui an awm thin. Ka hriat sual loh chuan U Chawnga (Zoliana pa) pawh kha telin ka hria. U Chawnga ka fakna em em chu - Hmeichhe venga a va awm takah chuan kawmngeih a tum tlat a, an thih nikhuate pawhin a tel vein a lenpui thin a, a va chawk Mizo ta hlawm a, a hmaa kan inhlatna zawng zawng kha a va chawk da vek a, a kawmngeih vek a, chuta tang chuan U Chawnga vang liau liauin kan inhnaih ta riau niin ka hria. Chu sipaiho kawr thuina thlerah chuan Nu Thaui te, Awmhmula te, Kaizathlara (mithai pu) te an awm a. Kaizathlara in thlen hma chuan U Hleia te an cheng thin, tuna Thanzuala inah sawn. Mithai pu in piahah chuan Dal Bahadura te in a awm a, a tawp mai a ni. Tuna Sports Office lam thlerah sawn in pakhat te mah a awm lo, bazar lama in hnai ber chu 1st AR Commandant in saw a ni mai. Chumi thlen hmaah Sapte bangla (tuna Chief Secretary resident) lah kawng atangin a zuk hla a. Kawng chhak lamah chuan Circuit saw a awm leh tawp mai a ni. Tennis Court saw Bawrhsap tuikhuah chhakta zawk kan ti, a nu em em reng a, thawkkhat lai chuan Vai pathian paih nan an hmang. Kawng thlang deuhah sawn Bawrhsap tuikhuah thlangta zawk chu a awm, hna a neih vang ni maw, a fim fu thin. Vai sangha an khawi thin.