Piangliana thinbutut chhuakin tu emaw chemtea chiu a tum a, a thianten an han dawm lai chuan Pianga chuan, “Min dawm tlat rawh u, la chiu ang che ka ti tawh si a, min dawm beh tlat loh chuan ka chiu a tul tlat,” a ti ang ziazangin Aizawl leh a chhehvel mipui khawhawina tur awm chhun - Ngaizel, Chaltlang kham leh Durtlang kham lamlian pui kam vel kha tum hnih emaw ka rawn ziak ve a, ka ziak laklawh tawh bawk a, tu ngaih pawimawh phak mah ziak mah suh ila, ka’n ziak leh teh reng reng ang. Tun Thawhtan, Thawhleh vela ni tin chanchinbuah khan kan Chief Minister zahawm tak hoin khati lam ngaihtuahin an thu ho a, mahse inhmun an lo pek tawh chu tihdanglam hleih theih a ni tawh lo a tih lampang kha an rawn ziak a, ka hnual khawp mai a, khitiang kham bekberep a, house pass (LSC) lo pekte chu tuna kan AMC hian, “Mihring luah tur in sakna tlak a ni lo, hmun hlauhawm a ni,” tiin cancel vek mai se tih kha ka rawn rawt a. Tin, kan LSC theuh hnung lamah hian TERMS AND CONDITIONS OF SETTLEMENT No. 6-naah chuan, ‘The Government of Mizoram have the right to cancel the settlement at any time if it comes to notice that flagrant violation of the terms and conditions takes place or in any other ground which comes to notice which is considered sufficient (ly) for the purpose of cancellation,’ tih a ni a. Hei hi hman a remchang lo a nih pawhin No. 4 ‘The land may partly of wholly be acquired by the Government of Mizoram or Officer so authorised for public on payment of reasonable compensation,’ tih a nih bawk avang hian laksak mai sela, a that ber ka ring. Kar hmasaa ka sawi ang khan sawrkar laipuia kan ba lah a tlem ber 3-na kan ni bawk si a, hei baka public interest hi a awm chuang em ni? Chubakah kham thengreng em em, a lung pawh lungkelha, ruah a sura, ni a sat leha chim mai thei hmun a nih khi tumanin kan hai a rinawm loh. Vantlang hian hmun awl leh thengthaw hi kan nei lo tak meuh tawh a nia. A ti thei chuan bengsika ngaihtuaha vantlang hmun thengthaw dah a tul tak meuh a ni. Assam state hnuaia district pakhat kan nih lai khan sawrkhar hnathawk an transfer tawh phawt chuan a thunawn ang hrimin, ‘In the interest of public service’ tih hi a tel ngei ngei mai thin a. Tum khat chu Gazetted Officer nupa, Aizawla thawk ve ve nupui zawk chu ‘In the interest of public service’ chuan khaw dangah an transfer ta daih mai a. Rei vak lo hnuah chuan a pasal pawh chu ‘an nu an transfer-na khuaah bawk chuan ‘in the interest of public service’ thoin zuk transfer ve a! A transfer order lo en vetute chuan ‘public’ an va tlem awm ve an ti nak nak mai maw le! Ka han sawi kham thengrengho hi chu Aizawl chang lo, Mizo mipui tana pawimawh tak meuh a nih avangin a thei thei chuan theihpatawp chhuah a tul tak meuhin ka hria. Han ngaihtuah ve teh mah u, he ka sawi hmun thum bak hi chu Aizawl mipui hawi thengthawtna tur a awm tawh miah lo. Tuikhuahtlang te kha lo hauh ni se. In hmun an pe a nih pawhin thawl taka saktirin, a karah tu tan pawh hawi thengthawt theihna hmun awl zuah thluah tal sela tha tur, kawngkam khi dawr pawh ni si loin a insi ngir khung vek mai a nih khi. Mission Veng din lai ang deuhin hlam sawm danah te tal pek ni se chu hawi khawthawnna pawh a ziaawm deuh mahna, tunah zawng a sikin a insi pût mai a nih hlawm hi. Dik tak chuan kan duham luat avang hian hmun awl (?) kan hmu thei lutuk deuh hlawm a ni. Thuneitute u, Aizawl khawpui hi km 20 chhung velah valh mai ula, thawl tawk zelin sem mai rawh u. Chanmari leh Sikulkawn vel karah inhnawh vek policy hi i bansan tawh ang u. Khawthlang lamah lah khung mel 2 mual te, Kurung lui kam Chaltlang ram te khu a la awm diai duai a ni lawm ni, chhim lam lah Hualngo, Thingdawl (M. 8), Muallungthu leh a chhehvelte pawh in a awm loh saw. Tu emaw ram tih ringawt mai hi chu an awm chilh loh chuan cancel-sak mai ula, Dan siam thei kan ni lo em ni, kan state chhung atan na na nan chuan, khawii lai pawh tu ram emaw tih vek mai hi zawng a dik hlel deuh lo maw? Mizo Aw, June ni 26 chhukah khan INTACH hruaitute leh YMA?hruaitute he kham thengreng chhan tur chungchangah an inkawm dawn ni awm khan a lo chhuak a, ka hnual tawh tehlul nen, ka rilru a nuam leh ta deuh. Chhiartu duhtak, tan i lak theihna naah tan la teh, i inchhir tawp lo vang.