Tun tum chu Mission Veng (incl. MSV thlang) leh Rahsi Veng (Thakthing Veng) leh Rahsi Venghnuai (Venghnuai) ka’n sawi pawlh nuai mai ang e. Kulikawn deptu veng a nih mai bakah insi reng leh inchawhpawlh an ni tlat bawk a. Rahsi Veng (tuna Thakthing Veng hmingpu ta khi) a tir takah chuan Rahsi Veng tih a ni, a chhan chu tuna Venghlui kan tih tak - Treasury Square liama mi hi a tir chuan Rahsi Veng tih a ni a, Bawrhsapin Rahsiho dah nana a tih a ni awm e. Mahsela, ram vah an hrat si, sa an kah apiangin sa lu an lawm a, silai nen, tlang an tlir dur dur mai thin a ni awm e. Chu chu Bawrhsap chuan a ning leh si em ni tehreng, tuna Thakthing Veng kan tih takah hian a sawn ta hlawm a, chu chu kum 1905 thuar tham kha a ni awm e. A tir chuan Rahsi 7 vel an awm a, sawrkhar hnathawk lo chu awm an phal loh avangin tuna Venghnuai kan tih tak hi sawrkhar hnathawk ve loho chuan an bawm a. Rahsi Venghnuai hming a pu ta bawk a ni. Rahsi Veng hian biak in (Wales Mission) pawh Mission Veng biak in a tawm reng nghe nghe a, kohhran upa pawh ka hriat chinah pahnih - Upa Thanga leh Upa Zotuawnga te chu Mission Veng kohhran upa an ni. Tin, a mual lai, tuna Primary sikul emaw ni a hman saw Zawlbuk a ni thin. Saw vengah pawh sawn tin-zu (zu sawr) kan in nasa mai thin. Nula pawh ka rim nasa hle thin. Min ngaizawng an awm loh vang ni maw? Ngaihzawng bulfuk ka neih pawh ka hre lo. Tum khat chu, Lalhmelthaa te nen Pu Tunga inah zu kan in a, Lalhmela chuan a ramvahnaa a them tlawzia a sawi a - Republic (kan tih tak)-ah khian kawr dunga thehlei chhuk lai ding chat hi kan kap a, ka thelh chiang khawp a, a tlan thla zawr zawr a; mahse, a ral lehlam atang chuan eng emaw hi a lo lir thla tawp tawp a, ka zuk tlan a, Varung hi a lo ni reng mai a tih thu hi a sawi a. Pu Tunga pawh chuan kei pawh hnai em em maiah chiang em emin Sakuh ka kap thelh a, “Kan feh hawng - Mualpui kawnah khuan kan thim chhawlh tawh a, sakuh hian min lo hrawk nasa mai a, a hmuh theih tawh si lo a, a hram ri chu chhui dawnin ka tin a, ka hnaih zel a, hnai tawk taa ka hriat avangin ka’n hmet a, a puak dawt mai a; mahse, ka silai ngul hnuaiah chuan a lo awm reng niin, ka silai ngul chu a do kang dawrh mai, a hnaih tehlul nen ka thelh nasa a nia,” a ti nia. Chawlhni tlaiah hian saw - LAD Directorate kawt zawlah sawn nula rual inbahnaah tlangval rual kan thawk pa/nu/u/nau/ni/pu/pi leh eng eng emaw lai thin a, bahpui leh phut tih ang chhuihkah nen, kan te re ru thin, nuam tak a ni nuam tak. Thlasik laiin zanah tui kan chawipui a, Rahsi Veng sawn tuikhur an pualin an nei lo a niang. Venghnuai thlanga Lungrem tuikhur an tih kha kan chawi thin. Lalchhingpuii (tuna Khatla), Rualchhingi (tuna Mission Veng), Kapthangpuii, Kungliani te ho nen khan tuikang nghah hi kan hrat hle. Tlangval tan chuan tui a kang nasat poh leh nuam kan ti a ni mai. Khawvawh lai a lo ni deuh ngei a, thingtang ilo fawm khawmin mei kan chhem a, ai a nuam teh a nia. Tum khat - Sapthlenga (Rinthanga) nen, Bawra (Vanzama) nen kan pathumin Kungliani te kan han thawi puat a, tlangval dang pawh an tam mai, kan chiar nawk nawk a, thut pawh thu loin kan chhuak leh ta mai a, a hmaa ruah a sur avangin a diak deuh chuap a, Venghnuai peng kan thlen phei dawn chuan Sapthlenga chuan eng emawin min tai min tai mai tiin a ngal rek chu a zuk dap a le - laphiar sa zungza bawk vel leh phiar fung hian a ke a lo zem chu niin, laphiar hrui chu a la awm bawk si, kan chhui phei leh ta a, la chu la phiarah chuan kan leh hlum zel a, Kungliani te inah chuan kan chhui lut chat mai. Lahlum khan kawngka a kân ve theih loh avangin a vir a vir mai a lo ni. Kha phiar puitling thei tak maw! UPC an din dawn vel kha ni ta berin ka hria - Pu Lianbuka, Accountant, DC office kha, (CHKI pa) inah khan Doveri ho khan an inkhawm thin. Tlangval eng emaw zat chuan inkhawm kha kan pelh lo a ni. Mahse, kan kal chhan ve kha nula leng lo, tukverh bawha ding, an hnung lama bawhchhawn ve tur zawng kha kan ni ber, Doveri pawh kha kan hmu meuh thin awm lo ve! Venghnuai hi chu Salvation Army thathnemna lam a ni. Chhang zuar an tam hle. Nula ka rim tam lo hle. Nimahsela, U Rokunga khan Khrismas Carol Party a ho thin a, Zokaii te unau, Biaknungi te unau, Ziki te nen chuan kan inkawmngeih hle tho. Dam Veng hi, Khrismas leh Kumtharah chuan Venghnuaiah an bet thin. Kum 1951 atang kha chuan an veng bilin an ti hrang ve ta a. An tih hmasak ber kum chuan Sial lian fu an lei a, an ni hnih daih tur an dah a, a bak chu an hralh vek a, an hlawk phian, thawh loa Khrismas nawn an ni hialin ka hria. Ngaihzawng ka neih avangin (min ngaizawng ka ti lo a nia aw) Kumthar chuan ka tel ve ta a, Re. 1/- ka thawh a (khatih lai khan se sa kha serah duli (50 paise) a tling lo). Ngaihzawngte awmnaa zai chu, mahni veng ni mah suh se nuam tak a ni tho mai. Dam Veng pawh hi tuikang an nghak tho mai. Thangthar tui connection neiten tuikang nghah tih awmzia a hriat a harin, a ho tih mai a awl ang. Van ruahtui, tuibel neiin an dawh a, khang hun laia kan tuibelte kha chu thin thlenga sang, feet 3/4 hawlh tlang a ni mai a, rei rin chi a ni hek lo, tuikhur tui kha rinrawla kan neih chu a ni ber. Dam Veng pawh chuan Lungrem tuikhur bawk an chawi ber thin. Nula tui-um 9 phur chu nula chak tak an ni chawk. Mipa (a rimtu) hi chuan um khatte kan put hawpui ve vau vau thin! Tuikhur bula nula leh tlangval 10 dawn dawn han inkherawlai vel kha nuam kan ti a ni ber ang. Nula, tuichawi lo thei loho lahin tlangval kan tel ve takah chuan an lo thlamuan phah ve leh bawk nen, hrehawm an tih chiam pawh ka hre bik lo. Mission Veng, Dawrkai Veng leh Vengthlang a tel leng rih lo, a dawt lehah.