Dam Veng atanga Mission Veng lam pan tur chuan U Lalbuaia (Ex-MP) te kawmah kan lo chhuak a, chulai chu DAWRKAI VENG tih a ni. Dik tak chuan he Dawrkai Veng hi Mission Veng leh Rahsi Veng inpawlh a ni. Chutih lai chuan Mission Veng ramri chu tuna Mission Veng bazar (sa zawrhna)-ah lo chhoin Putara & Pi Neli te nupa (H.B.Lalnghingloa) in huam chiahin lamlian a tan thla a, Pu Tlangbawiha leh Pu Zakunga karah a tlang a, Pu S.R.Vala kawtah a phei zel a, Mission Vengthlanga Pu Kawi (thar)a in bul (Thangmawia pu)-ah a tawp a. Chuta tang chuan Sikulpui kawnah - Lungli zawh thla hretin chhim zawngin Mission Veng bazar sa zawrhna chu a va pawh a ni. Chumi chhungah chuan mi mal in 75 bak phal a ni lo. Tin, dawr chauh lo chu in inkarah hlam 15 a tla tur a ni. In tinin dailen in, khur laih tha taka chhin phui an nei vek tur a ni. Tin, vawk an vulh chuan a huang an hung ngei tur a ni bawk. Hei bakah hian mahni compound kan hung vek bawk a ni. He dan hi Zosapten Mission Veng ram hi Tlangnuam lal, Lal Singha hnen atanga Rs. 100/- a an lei atangin an siam niin a rinawm. A chhan chu U Bela (Tuikuala kum 100 dawn laia boral) kha kum 1912-a piang a ni a, amah ka zawhin a tet-te lai atanga ek in hmang a ni tih min hrilh. Ka ngaihdan chuan Zosapho khan tunlai MODEL village an tih sek hi kum 1900 lam khan an lo siam daih tawh ni maw ka ti. Mission Veng leh Rahsi Veng inpawlh ka tih kha Putara (H.B.Lalnghingloa) in bak chhim lam Upa Rualkunga te in te khu Rahsi Veng huap chu a ni thin. Ka hriat sual loh chuan kum 1967/68 vel khan J.Lianchungnunga VCP a nih laiin helai bawr hi Mission Vengah an telh ta a ni. A hma reng pawhin a ram (lei) chu Rahsi Veng chan ni mah se a chengte zawng zawng chu Mission Veng khawsakin an khawsa vek tho reng a ni. Awle, hawklak lam thung aw - 30-5-2015-ah Zadailoa, U Tlanglawmthanga, Sikulpuikawn ina awm thin, a boral a nih kha. Ka hriat sual loh chuan kum 1947 kum tir lam atangin Tawhroa (Vanlalroa) nen kan inkawp tan niin ka hria. Ani kha bengngawng tlat a ni a, zaizir lo chuan inbiak ngaihna a awm meuh lo - bengngawng A, AW, B kha kan thiam nial nual a, chu pawh nial nual tak meuh - zaizir, hmui phun, bengngawng A, AW, B-in kan inbe ber. Khawii khua atanga lo chawr chhuak nge a nih a, tunge a chhungte tih pawh ka hre lo. Engtin nge U Lawma nen an inchhar tih lam pawh ka hre lo, a boral hnu hian (nimin lawkah) Pastor Chama, Durtlang te nen khian pate unau an ni tih thawm ka hre chauh, thu tak a nih leh nih loh pawh ka hre lo. Engle khawle, Zadailoa chu chhawnchhaih ni si lo hian kan kawmngeih ve em em mai a, bengngawng e ti lo chuan bengvar em em mai a ni ve tlat thung. Damlo menpui ngai leh mitthi inah hia a hmasa pawl a ni fo mai. Pi Daii (Aithulha nu) thih thulh tum pawh khan Zadailoa chu tlangval awm chhun a ni hial awm e. Kha mak ve tak a ni - Pu Kailuia (Thanhliri pa) te inah a ni awm a, Ka pa (Ch.Pasena) chuan, “Khawnge, pitar hian an kawngchilhah pawisa dah an ching a, a kuang man tur hi a lo taivawn mai thei asin,” tih pahin a kawng chu a’n dap a ni awm a. Pi Daii chuan vin zet hian, “Ka pawisate reu reu kha in ru ang e, min dap min dap suh u,” a ti ta hlur mai a, tichuan a thih chu a thulh ta a ni awm e! Chutah pawh chuan Zadailoa chu chuta tlangval awmchhun chu a ni nghe nghe an ti. Hmunphun hi a man chak khawp mai. Chawngmawii (Dr. Lalhnuna nupuia laizawn) kha a ngaizawng a nih loh pawhin a hmeltha a ti hle a ni ang. “Tawmawi” a ti reng mai a ni. Thawk khat lai chu Tawhroa nen, Zadailoa nen kan pathumin kan inkawp nasa hle. Ka nu Darlianchhungi te ina a awm lai khan pheikhawk siamtir turin U Ngena a zuk kal a. Siam tur a ngah em avangin a lo hnar a ni awm e - U Ngena chuan, “‘Ka hmanhmawh lo, rei tak pawh kawl mai rawh,’ han tih ka tum a, ka zaizir thiam reng reng lo,” tin min hrilh! Tlai khawhnu lam kha chuan Bukpui lal fanu hmeltha, Thangpuii kha Sikulpuikawn bawrah khian a awm a, kan chhar fuh hlauh a ni ber ang chu, kan rim sek mai a, Thangpuii nen kan pali chauha kan awm tak tak chu liang leh khanchhuk velah te hian kan ban nawk nawk mai maw le, chutih lai chuan ‘TAPUI’ kan ti reng mai nia! Thangpuii chu tunah pawh a la dam a, mi rethei khawngaihtu Pu Sanglura Sailo, damdawi zuar nupui khi a ni, Electric Vengah an cheng. Bethlehem Vengthlanga ka awm hnu (1969) hian em ni - Zemabawkah nupui fanau neiin a awm ta daih a, Dawrpui vela kan intawh khian kan la inbe zeuh zeuh thin. Mak tak mai chu tawng-theilo-bengngawng tlat e ti loin kamtam tak a ni, a ri vak lo mai pawh a, a bulah khan HLE HLE a awm meuh lo, ngawi rengin kan ri re-ru mai nia. A vui ni (30-5-2015) khan hre reng chungin ka kal ve thei ta si lo a, Zopari te pawh zahawm ka ti hle mai. Hei hi Zadailoa ka thlahna ni teh se (Tawk mai rawh se aw - Mr. Holder of Mob. phone 8731058612) Kan rual kha tleirawl te kan nih atangin kan hawklak bik ni awm a ni. Vengthlanga kan ni Darlianchhungi chuan fanu, Sapzingi, Thankhumi, Dengchhingpuii leh Sapbawihi (U Thani chu a U lu deuh a, ka sawi lo mai ang) nula thuauin a nei a, upa deuh atanga keini tleirawl ngaihzawng nei tir ngaihzawn rual thlengin an awm a - pali an nih chu. Khatih lai na na na chuan tlangval leh tleirawl bu a ni ringawt mai. Thawkkhat chu an chokaah Sapthlenga nen, Lianzoa nen, Vanroa nen, Thankhumi nen mei thi lek lek tawh hi kan ai a, hnaih kan inchuh reng mai a, Sapthlenga (Rinthanga) em ni ta - Number Ten sikret bawm ruak hi a lo rawh em ni tehreng, a alh ta phut mai a, Thankhumi puan fem a man ta mai a, tihngaihna hre hek lo, thu chung chuan a beng a, a te vak vak mai a, Sapthlenga chuan tuium a va la lawk a, dim lo baksak mai hian tuium khat chu a leih zo vek mai a - a leih tam em avang chuan Khumpuii chuan, “I leih tam lutuk a, ka huh vek tawh alawm, vawt ka tih naka laiin,” a ti nauh nauh a. Keini lah chuan, “Chu, i pum huh vek elo,” kan ti mai mai nia. A vawt kher ang kha.