Ka Huang

Ka Huang (March 09, 2014)

Chhuanliana BVT - Mar 08, 2014

Ka Huang (March 09, 2014)

Tun tum chu lawmthu sawi kan bat tlat avangin ka'n sawi teh ang. A hmasain ka nihna ka'n phawt ang. Poet of the Century-a an puan, Pu Rokunga kha ka puzawn a ni a, emaw ni a makpa ka ni khanglang a, Rokunga Memorial Society te, Central YMA te, Venghnuai Branch YMA te, AMC te hian thil ropui tak takin a hming an chher laia lo ngawih tlat pawh dikin ka hre lo. Engle khawle, a fanu nupuia ka neih tak siah chuan ka puzawn chu a ni mai mai a, mahse kan kawt-hmai maia an lo pem takah chuan 1940 vel atang khan U Rokunga ka lo tih tawh a ni a, ka nupui neih 1965 atanga han pu thut mai kha a ang lo tlat maiin ka hriat avang leh 'Ka pu' han tih dawn chuan HLA DUU a ka hriat avang leh inhnaih lo zawka ka hriat avangin 'Ka U' hlen ta mai a ni. Chuti ang vel bawk chuan ka nupui, Zahmingthangi pawh chuan a hriat theih tirh ata min U avang chuan inneih hnuah pawh tun thleng hian min la U ta a nih chu. Tum khat pawh a nuin, 'mahni pasalte han U te chu,' a ti a, ani chuan 'Ka U loh chuan ka ko lo mai ang,' a ti tlat mai a. Lo inkoh thanna thlak dawn hian KHUAL riaua hriatna a awm niawm tak a ni. Chuti chuan kan Mizo inkoh dan kalhin ka puzawn chu ka U tiin ka ko tluan ta mauh a nih chu! U Rokunga kha pa inngaitlawm tak mai a ni tih ka chianna em em mai chu, a fanu nen 19-1-1956 ah kan innei a. Naga ram rilah ni 24-1-1956 (kan inneih atanga ni 6)-ah kan kal ta daih mai si. U Rokunga lehkha kan hmuh hmasak berah chuan a fanu (hming koh) a ngaihzia thu a rawn ziak vak mai lah tak a, Zahmingthangi'n a han chhiar chuan, ani, khawi maha la chhuak ngai hlei lo chu a mittui a tla ta fap fap mai a, ka khawngaih em em mai si a, ka thin a ur khawp mai a, rang fahranin chhanna ka ziak a. 'In fanu hi velh fo induh phawt chuan khati ang khan rawn thawn zel rawh u,' tiin ka'n runluih vel a. Chuta min rawn chhan lehnaah chuan, 'Ka ngaih em vang chauh a ni, ka thiam loh liau liau a ni e, min ngaihdam rawh, ka ti leh tawh ngai lo ang,' tiin, a makpa hnenah thuhnuairawlh deuhin zuk rawn ziaka maw le! Chuti anga mi inngaitlawm chuan Hla 100 chuang a lo phuahte hi Rokunga Memorial Society te, Central YMA te, Venghnuai Branch YMA te leh AMC te hian an chawimawi a, Poet of the Centuryah te an puang a, City Park-ah a lungdawhin a limte an dah a, YMA nula & tlangval lahin a hla phuah ngatin inelna siamin Branch tam tak an rawn inel a, chu bakah Venghnuai Branch YMA phei chuan U Rokunga kha Venghnuaia piang leh fa pathum neih thlenga khawsa a nih avangin, an ngainain lungte an phun a, a kum za pianchamphaphak (20-2-2014) khan ruai theh bakah zana Rokunga hlaa zaikhawmin an YMA Hall chu chumi zan atang chuan ROKUNGA HALL tiin zuk puang a!! AMC lah chuan Dam Veng kawng an tih mai thin lah chu Rokunga Road tiin an thlak bawk nen, a chhungte'na kan tih theih reng reng loh thil ropui tak tak a chunga an tih hi a tu leh fate hi kan lawm takzet a. Kan lawm lutuk hian lawmthu sawi dan pawh kan thiamin daih mawlh hek lo, Venghnuaia kan zaikhawm zan (20-2-2014) pawh khan a fanu Lalengi lawmthu sawi pawhin, 'Sawi sen pawh a ni lo a, sawi dan pawh kan thiam hek lo, LAWMTHU KA PUANG E,' a ti thlawt mai a ni! Hei, tunah pawh ka hmaih daih hlawm mai. Ni 20-2-2014 kha kum 100 pianchamphaphak a nih avangin Vanapa Hall-ah Rokunga Memorial Society leh YMA te huaihawtin ropui takin Hall khat tlatin kan lawm a. Rin phak bakin kan Chief Minister leh a nupui Pi Riliani te hial lokalin, Hawlan thu a sawi mai bakah a thu tluan chhuak parh mai nghe nghe nghe a ni. Chu lo pawh Rokunga Memorial Society hian kan pa hlaphuah hlang a bua siamin ROKUNGA HLATE tih an chhuah nghe nghe a ni. Hetiang em em hian kan pu leh kan pa, mi tlawm tak mai si kha mipuiin an chawimawi ang tih hi mumangah pawh kan mang ngai lo! Amah kha lo tho lehin rawn hmu thut mai sela MAK tiin a phu nawn awn awnin ka ring a ni. He a kum 100 pianchamphaphakah hian khawimaw lai laia YMA Branch te chu an zaikhawm niawm te pawhin kan hria. Mizoram pawn Tahan (Myanmar) pawhin kan ni kha an lawm a ni tihte pawh kan hria. A tawp khar nan chuan lawmthu sawi hi "KAN LAWM E" tih mai bak hi sawi ngaihna a vang tak meuhin ka hria. Sawi hi chuan UAR dan dan pawh, a thlukte han sei deuh chuan a awm a, ziak hi chuan tih ngaihna reng reng a awm chuang lo, KA LAWM EM EM E, tih bak hi chu. Rokunga Memorial Society te lah hian, "A chhungte in ni bik lo, kan chhungte pawh a ni," an ti vutuk mai lehnghal a, chuti si chuan a member pakhata mah hian a hmel zuk hmu hauh lo ale! A hmu awmchhun P.S.Chawngthu lah a boral ta hlauh si. Chuti chung chuanka ta ber a ni, ti niawm tak hian phur em emin zuk che zela maw le. MAK TAK A NI, MAK TAK.
Share now