March ni 8 kha ka pianchamphaphak, kum 90 ka tlin ni a ni na vang vangin chhungte hrilh darh loa chu ni chu hman satliah mai mai kan tum a. Nimahsela, Mission Veng lama kan tu leh faten pawisa thawh khawmin, “Kei cheng sang, kei cheng sing,” te an tia, min rawn lawmsak ta chiam mai a, keimahni chhungkaw riruat a nih loh avangin, Bvt-a ka then leh rualte pawh ka hriattir kim thei lo. |hian pathum erawh engtin tin emaw ka sawm hram hman chauh a ni. Kan leh mikhual awm ta vek vuk mai nia!
A tuk, ni 9-3-2019 Inrinni zing lam dar 11:15 chuan Mizoram mi lar leh ZONET hotupa, Pu R.K.Lianzuala boral thu kan hre ta mai a, âwih a har ngei mai. RKa kha kum 53 chauh ni mah se, MIHRING a ni, tupawh mai hi tha em em leh bengvar taka biaa kawm thiam a ni. Kei takngial pawh hi ‘Pa Chhuan’ tiin min ko nia. Kei chuan ngaisang em em mah ila, mipui tam tak zinga kal chi ni tawh hek lo i, kan nu chuan a han vui ve a. Vuitu mipui tamzia a rawn hrilfak haw nia. Kei chuan ZONET TV la ka ni bawk a, chuta tang chuan ka lo thlir ve a, ka hmuh leh a hnua ka hriat dan chuan mitthi vuia mitthi ina kal khawm tamna ber niin ka hria. An in chu sawi loh, a bul velah, remchâng lo tak takah pawh an khat hmur mai a ni. RKa te ang mihring hi Mizo zingah hian an tam lo mai ni loin, awm pawh awmin ka ring tawh lo.
He THIHNA kan tih hian tumah a hlahthlem miah mai si lo a, a duh chu dim miah loin a la tawp zel mai sia leh. Kan tum leh kan beisei Vanramah chauh kan tawk leh dawn a nih tak hi. Mizoramin Mizo mi pawimawh a chân ta a nih hi. A chhungte chu sawi loh, ramin a chân nasa takmeuh a nih hi.
Thu dang aw… Hei kei pawh kum 90 ka lo ni ve ta reng mai, duhsakna avangin ZALEN, Chawlhni chanchinbuah hian ‘KA HUANG’ min pe vein hei, kum 5 lai em ni ta, ka chhuah kar tin ve mai a, a awmzia chu 52 weeksX5 years = 262 week. Hapta kar 250/260 vel chu Pathian zarah ka lo ‘huang’ ve ta a nih chu. Sawi tawh angin kum pawh a lo tam ve thawkhat tawh mai bakah ka mit ding lam hi Gloucoma an tia maw ni, vengin tum 2/3 min zaisak tawh a, Shillong thleng thlengin ka kal a, ka mit ding lam hi chu chhawr tlak a ni lo, vei lam chauh hi ka hmang ngawr ngawr mai a nih avang hian KA HUANG hlei thei ka ni ta lo zual. Chuvangin, he ‘KA HUANG’ hi ka hnen atang chuan a tawpna ni tawh rawh se. MANGTHA VEK U LE.