KA HUANG tum thum tawp mai ka’n chhuah thei lo chu, chhiar thintute ka zah ngawt mai. Engdang vang ni loin dam loh vang leh thihnain kan inchhung a rawn den vang a ni. February ni 23 khan chu thihna kut vawt chuan ka tunu a rawn chelh ta nge nge a, tuar thiam harsa ka ti ngei mai. Ka nu leh pa leh unau 6 ka lo chan tawh a, Pathian zarah ka mittui far khat pawh an titla lo. Mahse ka tunu hi chu, eng vang tak nge ka hre lo, ka mittui a titla nasa hle, tun thleng hian. “Zan tlai bawar mah hi siang an lawi thin, han lawi ve ang che i run kaina’ tih hla hi theihnghilh a harsa dawn hle mai. Tun tum chu ka'n chawhchawrawi teh ang aw. 1. March ni 14, Thawhlehni khan SBI, Main Branch kawngkapui tak maiah khian ZALEN chanchinbua ka thenawmpa, Dr. Chawnglungmuana’n min chibai chawt mai a, kan inhmuh vawi khatna a ni awm a. ZALEN-a kan inhmuh zin ve teh reng nen, tisa chuan hmanni chiah kha a ni. Kawmthlangpa Dr. Hrekima hi chu ka la hmu lo. A thu- thiam ang hian ka thiam ve chak. A thu ziak ka chhiar hian a hming hi a pu zo awmin ka hre thin. Kei ve hi chuan ka hming hi ka pu zo awmin ka hre thin. Kei ve hi chuan ka hming hi ka pu zo lo nasa, a rit a nih hi. 2. Sawrkarin tunlai, Aadhaar Card, Ration Card, Epic Card, pass xerox copy ilo a dil, thehluh tura ka puahchahna lamah lehkhathawn original, April 15th, 1929-a mi ka phawrh nawlh mai a. Hei 8-3-1929 a piang niin, ka pain a thian nu, Miss Zomawii pa hnena ka pian thu ni 15-3-1929 a a zuk hrilhna, a rawn chhanna a ni. Zomawii pa chu Sir Herbert Lewis a ni, chung lai chuan Member of Parliament a ni awm nghe nghe e. He, a lehkha rawn thawnah hian “PS I am sending this letter by the new Indian Air mail” tiin a ziak nghe nghe a ni. He lehkhathawn hi 15-4-2017 hian kum 88 a tling ve mai dawn a, lehkhathawn ori upa pawl a tlin ve hial ka rin avangin ka rawn chawk chaw rawi ve ngawt a ni. A lehkha pawh thleh chi vak a ni tawh lo, a pheka dah mai chi a ni, Penuch, Caerwys, S.O., Flintshire atanga a rawn thawn a ni. A upat ve tawh em avang hian tihchhiat mai chu uihawm tak a ni. Kei aiin thla khat leh ni sarihin a naupang a nih chu! 3. KA HUANG, 19th February-a pu SR Vala 1946-ah Pawl 6 Sialsuk MAV sikulah ka zirtir ka tih kha a lo dik chiah mai tih a boral tak avanga a chanchin an ziaknaah khan an rawn ziak kha ka lo chhiar. Khati ang mi ropui, inngaitlawm te ang te kha a ni hlu ni. Ka hriat sual hle loh chuan IAS an beih dawn vel khan u Lalchungnunga leh U Sangliana khan fiamthuin, “Vala, IAS hi hmelchhe tan a ni lo, hmelchhia an duh lo, bei ve lo mai rawh,” tiin an chhaih fiam a ni awm a, an zuk interview a, Vala chauh kha an rawn ko ta mai si a. Vala chuan U Lalchungnunga leh U Sangliana hnenah chuan IAS tura interview-tute hian hmelchhia chu an duh lo in tih kha hmelchhia an lo hre ngei mai tiin an fiam let ve an ti tih IAS a zawm tirh vel khan an sawi thin nia. 4. Ka rilruah engmah a lut thei rih lo. Tawk rih teh se, min hrethiam mai rih teh u.