Tun tum chu kan thu mal O emaw, U emaw, UH emaw, a tawpa ‘V’ telh leh telh loh chungchang hi ka’n thlasik mau puahpui pawp pawp teh ang. Thangthar lehkha thiam zawkte benga rawngah a lut mahna. HMANGAIHNA AW (Thuthlung Thar) kha thu mal tawpa O/U/UH/OH a awma ‘V’ telh miah loa chhut chhuah a ni. Thuthlung Thar dangah hi chuan telh vek a ni. U Zairema khan ‘V’ engzat tak thai bo maw? Nimahsela, Bible lehlin thar leh turah khan telh turin an nawr nasa mai a, an telh leh ta niin ka hria. ‘V’ kan telh dan hi han chik deuh teh: Nau a piang a, a hming satu chuan Lalpa au loa kan awm theih loh hi kan AU chamchi mai si a tiin LALAU a thlang a, mipa a nih avangin Mizoin tuan leh mang ata kan hman mipa chhinchhiahna ‘A’ in an zawm a - LALAU-A tia sak a ni ta a. An thenawm nau pawh chu Kan lalin min ko reng mai si a, nau piang leh chu LALKOH tiin i sa ang an ti a, hmeichhia a lo pian takah chuan LALKOHI tii hmeichhe chhinchhiahna an belh leh ta a ni. Tichuan, nausen piang thar hming chu LALAUA leh LALKOHA tih an ni ta. Amaherawhchu kan tawng hian kan leili hi a thatchhiat em avangin thatchhe takin kan lam ta a, LALAUA chu LALAUVA tiin kan lama inhriatin kan ziak ta bawk a. U leh A inkarah V kan zep ta rawk mai a. Chuvang chuan ngaihtuah chiang lo chuan kan lam danin kan ziak a ni an ti rawk ta mai a; mi tam tak chuan awm hluah hluahin kan hmu ta mai. MAHSE, chhiartu duh tak, chik lehzualin han lam ve ve hlawm teh. LALAUA tia V i telh loh chuan AU tiin i lam a ni. V i telh erawh chuan AUVA tih kha U ri thleng loin AVA tiin i lam ri thei chauh a ni. U i lam tel luih talh chuan AU-VA ti lo chuan a lam theih miah loh. I telh loh erawh chuan U kha a nih ang takin i lam thlap mai a ni. Thenkhatin kan ziak angin kan lam lo, kan lam angin kan ziak an ti chawk a, a ni miah lo - KA LAWM E hi KA LAW ME tiin kan lam. Kan lawm loa kan law chauh a nih chuan M chu e-in a chan miau avangin. Kan lam rik anga ziak chu CRP-ho kha - Silchar kawng dungah a khât tawkin KA LAW ME tia an tar kiau kuau kha! I DAM EM pawh hi kan lam dan tak chu I DA MEM kan ti mauh asin. LALKOH pawh hi LALKOHVI tiin tam takin an ziak. Ka hriat ve Lalkohi chuan V a telh duh miah lo. Mahse, a tam zawkin Lalkohvi tiin an ziak. An lama a rik chhuah dan chu LAL KAWVI tiin a ri a ni. OH kha a ri hlei thei lo. Ka hnaih deuha tih mai tur pawh KA HNAIH DEUH VA tiin an ziak a, V telha a rik chhuah dan chu KA HNAIH DEVA tiin a ni. U/UH hi a ri thei lo. V tel lo chuan U/UH kha kan lam ri tel deuh a ni. Thangthar mi thiam tam tak hi chuan a chunga ka ziak ang chi-ah khi chuan V an telh duh tawh lo, nimahsela rual U lam hian tel tur niawmin an la hmu a ni chek ang. An ngaihtuah chik lo mai mai niin ka hria. U Zairema (Rev.) bawk khan, “Bible puma V tul lo zawng zawng hi hawrawp 2000 chuang a ni,” tiin ka hre ta. Heng kha thu ziak hi han chhiar teh: “Lunglei chu Hnahthial ai chuan a hla deuh va, Sailova leh Auvi leh Kohvi pawhin hla an ti teh asin.”I?lam dan nasa takin chik mah rawh - Lunglei chu Hnahthial ai chuan a hla deva, Sailawva leh Avi leh Kawvi pawhin hla an ti asin tiin i lam lo thei lo. U te, O te i lam rik dawn chuan bah deuh hlukin DEUH VA, SAILO-VA, AU-VI, KOH-VI tiin i lam kulh kulh lo thei lo. I?telh loh thung chuan DEUH A, SAILO-A, AU-I, KOH-I tiin a nih tur angin i lam nalh nalh mai nia. Tum khat pawh kan kohhran hla bua ‘DEUH A’ tih hi ka zawng a, a thenah deuh va an ti a, a thenah chuan deuh a an ti ve tho. Hei takte hian telh a tul lohzia tilangin ka hria. Hawh u, hmeichhia hi chu lo V zel sela, kan thu mala kan sawi tak V khi chu i bân vek ang u.