Kar hmasaa ka MANGTHA ngawt che u kha ka kansel e. Tih makmawh ka chungah a tla a ni. Kha MANGTHA avang khan message ka hmuh nghek mai bakah, Upper Kanaan atangin pa zahawm tak mai, Pu Arnold Sangliana s/o Pastor Kawlthawma, car nalh tak mai nen kan in.. Bethlehem Vengthlangah pawh la thlang lehzualah a lo tlan vang vang mai a, la titawp lo turin min rawn ngen tawp mai nia! A hriat pawh ka hriat ngai miah loh a ni. Ani pawhin Bethlehem Vengthlang pawh hi a la tlawh ngai miah lo a niang, a kalkawngte min rawn zawt hmasa tete nia.
Engvanga heti taka ui derna ka dawng hi nge tih pawh ka hre lo. Dik tak chuan diary bu tê hi ka lei ve bawk thin na a, Pu Suakhnuna diary ang mai, ni tin a ngaia ziak a tul tlat tawh. Pu Suakhnuna diary-ah pawh Monday “Vawiinah pisa ka kai, a tul apiang ka ti.” Tuesday -do- Wednesday -do- Zirtawpni thlengin. Putar chuan engmah kan ti tawh si lo a, “Vawiinah ka mu,” tih kha a ni ni tin ringawt tawh mai. Chuvang chuan a nia, ka han Mangtha rawk ni. Engle khawle, ui dertu ka hmuh tak nualah chuan ka han chhunzawm leh poh aniang chu.
Tukinah ka watsapp-ah Pi Teii (i a dawbawl bik) thusawi lai thlalak an rawn tilang a, ka lung a leng thar tlat mai. Kum 1948 ni tain ka hria, ka nun nen lo kan nei ve a, tin hnih hmun. Ka tlangval harh, ler zual lai a ni bawk a, buhchil chu thian leh rualte nen tiin Fasuar, a rinawm thei ang berin ka siam a. Ka pa phei chuan min hau leh thin, ka tih rinawm avangin. Thian leh ngaihzawngte ka sawm a. Ka pa chuan Pi Teii (Rees Roberts) kha a rawn sawm ve bawk. Fasuara buh chil ve kha a châk tlat sia, a lo lawn ve a. Tlangval 3-in kan kuah kual a, kan han chilpui tak tak mai chu, dim lo mai bakah, uar deuh chunga chilpui kan ni bawk a, kekawrtlawn pawh a ha bik si lo a, a tlu hawl hawl mai a, a malpui chawn vel chu pawlin a chhun lo thei si lo a, a sen hian a sen tiak tuak mai a ni. Kha Zosap ka hmuh ve phakah chuan intifekfawn lo ber niin ka hria.
Kum 1945 khan Mission-in pawl VIII a siam a, chutah chuan ka lut ve a, Pi Zaii te ho angin a malte zahpui hek lo. Biology class a lak hian a mal hmuhna awlsam bik thutthleng (bench kil ber) hi Lianzoa (RIP), K.C.Lalvunga (RIP) te nen khan kan inchuh a, building hranga zir thin kan nia, Biology class a nih tawh vaih chuan kan pathum chuan kan seat inchuh chuan kan tlan vat thin. European vun na na na chu a ngo bik sia, tunah lah kum 75 liam ta kha a ni ta daihin, ka thiante kha an boral zo ta vek mai si, titipui tur hi ka duh ngawih ngawih thin. Bethlehem Vengthlangah pawh vengthlang lam lehzuala, tihian mahniiin ka lung hi a leng vawng vawng mai a, chu chu ka tih theih tawk a ni ta mai a nih hi.