Vawiin, Chawlhnia ‘KA HUANG’ tur hi ka puahchah vek tawh na a, ka thian, nulat tlangval laia ata tawha inkawm thin leh vengthlang maia khawsa, Khawlkungi, ni 27-3-2015 zing dar 8 hma deuha a boral thu ka’n hriat khan ka hnuk chhawlh mai a, nimahsela ka theihtawpa ka tawngtaina, Pathianin, ‘ I hre lo zawk Chhuanlian,’ min tiah inngaiin ka inhnem chawp leh vel a ni. A fanuten ni 23/3-a ICU-a an awm tih min hrilh atangin ka thiam ang tawk tawkin Pathian ka kar ve char char a; MAHSE, ram nuam zawk leh ropui zawka sawn hi Pathianin a duh zawkah ngaih mai loh chuan a ngaihna hriat a har lutuk. ‘In dila, in dil dik lo a ni,’ tih chang tea inhnem ngawt loh chuan tih ngaihna tak pawh ka hre ve lo. Hetia min boralsan tak thut siah chuan he KA HUANG hi amah thlahnaah ngaiin ‘A HUANG’ atan ka rawn let tawp mai a ni. Khawlkung, kan nulat tlangval laite kha a kik a kawiin sawi thei tawh mah suh ila, chatuan ram min pansan tak thu ka’n hriat khan ka rilrua lo lang hmasa chu Tlangveng lung kuang tuikhur chhaka Pu Thangbula a leh a farnu, Pi Hangi te, engmah thawk thei lo khsa kan theih leh tlin ve anga anga tui kan chawisak te, thing nawi kan fawmsak thin te leh naupang te e ti loa kan thiam ang tawk tawka kan tawngtaisak thin laite kha a lo lang uar uar a. Chutah, Pi Hangi a thi a, Pu Thangbula, thutunga tawlh thei chauh, kohhranin in saksaka in veng kawn, tuna Vanlalropuia kawmchhakaa an sawn taka kan nulat tlangval ve tawh hnua thih ngama a nat tuma Pu Muka te, U Vanlama te, Sapthlenga (Rinthanga) te, U Tawkruaia te nena lei chhuat bal pawh sawi thei loa kan thut nawk nawk laite kha ka mitthlaah fiah em emin a rawn lang uai uai mai nia. Nikhaw hre map tawh si lo, thi dai mai thei bawk si lo, zan nga tawp tlaivarpuinaa i lang reng theite kha fakna chang pawh kan lo inhre lem hlei loa ti raw. Tun hnua chawimawina thahnem tak i dawn theihna chhante hi kha lai hun atanga i taimak, dawhtheihzia avangte hi a ni taang tih loh theih pawh a nih loh hi. Khatih hun laia, Pu Thangbula ina zan nga lai tlaivarpuitute zinga dam rei ber pawl i ni. Ka chhut danin tumah an dam tawhin ka hre lo. Khang hun laite khan tun lai anga eng emaw hleka ‘Award’ inpekte chu ni sela, U Tawkruaia te, Sapthlenga (Rinthanga) te nen kha chuan eng Award emaw chu dawngtlak in ni maw le; mahse, Mizo danah ‘Mizo tlawmngaihna’ a ni tawp mai a, fak tak aruangin chhungten ‘EM EM A’ tih kha ‘Award’ chu a ni mai sia leh! PWD atanga i pension hnuah hei, World War II Veteran Association dinin i theih ang angin min fawmkhawm a, World War II Veteran ni tur hian kum 1945 September thla hmaa sipai ni hman nih a tul si a, tunah phei chuan chu hun chu kum 70 deuhthaw a nih tawh hi. Chung hun laia sipai lo ni hman tawhte chu tunah chuan a tua mah an/kan dingchar hlei thei tawh lo na vang vangin thahnemngai em emin min ho khawm a, War Veteran lawmman, thla 4/5 hnua kan hmuh ve thin financial sanction chhuak hma tura a tar a tara Secretariat-a i han kal tang tang maite kha tlawmngaih vang a nih loh chuan eng dang vang mah a ni thei lo. Kan bill-in Treasury a thlen hnu pawha pass hma tura i thawh nasatziate kha leh kan War Veteran Association Secretary tlin tak maia i thawk tang tang maite kha hei i thih hnuah kan rawn fak hnuhnawh ve chauhche a nih hi. Heng War Veteran leh War Widow-ho lawmman dawn hma theih nana i hahna zawng zawngte kha a lawmman dawngtu tam ber chuan kan hre phak si lo! Min kalsan tak siah chuan War Veteran Association Secretary tur hi tumah an awm theih tawh pawh ka ring lo. Chatuan ram min pansan rual rual hian keini pawl pawh hi tiavai mai dawn em ni ang le! Sakawlin sakawl a hrangi tih a ni tak nain sakawl dang thlaktu tur che hi i kalsan takte zingah hian kan awm ka ring lo. He laiah hre phak tawh lo mah la, i awmna anram nuam tak atang takin ka MANG|HA che hi mi hriatsak rawh aw. MANGTHA LE!