Ni 8-3-2016, Thawhlehni khian kum 87 ka pumhlum chiah ang. He lei hrehawm, kan mikhualna ram kan tih kalsan hreh em em si, kalsanna hun tur chu tam a awm ta lo e. ‘Van khi ka in a ni,’ tiin hla kan sa vel a, mahni ina haw hreh em em kan ni deuh vek si! He lei hrehawm ti, nun tlakna pawha ngai lo intihlum chu kohhran vui dan famkim pawhin kan vui leh duh bawk si lo. A ngaihna tak hriat a har! Kar hmasa khan Sikul kawn ka rawn thleng chiah a nih kha. Sikulkawn, New Street, Pu Mena bangla thlang huamin Pu H.B.Lalnghingloa (L), tuna Zothansangi in huamin lamlian atana Pu Thangbawiha (L), Nithanga pa in huamin a chhuk thla ngil a, Luipui (Sakhisih) a pawh a, lui dung a zawh ngar ngar a, Vailui (Mission Veng leh Khatla inkar luite) nen an inpawhna atangin Vailui dung a zawh chho ngar ngar a, Sikulkawn a lo chhuak leh a. Chu ram huam chhung chu Zosapin Tlangnuam lal Lal Singha hnen atangin Rs. 100/- a a lei a ni. Chhiartu duh tak, he ram cheng za man hi han ngaihtuah la, tuna hralh dawn ta ila, Cheng CHAM-TA-POA sang pawhin a lei zo lo ang ti raw! Chu ram chu Zosap ta a ni ta a, chuvangin thu pawh sawrkhar phalnain a nei. Mission Veng chhungah in 75 aia tam awm phal a ni lo, ek in (Pit latrine) neih theuh tur, vawk vulh duh chuan a huang hung ngei ngei tur a ni tih vel a ni. Hei Dawrkai Veng dawrkai in chhak ta ber (YLA Hall dawt hi) hi Pu Lianhranga dawr a nih hi. Tunah chuan ka hriat danin Thana, Circle Interpreter-in a lei a, tunah MCM (Mizoram Cotton Mills) an tar thinin ka hre ta. Chu dawr chhiar chuan dawr 9 (pakua) a intlar a, dawr a nih avangin kar neih loh an phalsak a, Rangva in a ni tur a ni, tin choka hrang theuh, an dawr hnungah an sa tur a ni. Hei hi kangmei laka fimkhur thu hlaa tih a niang. Chhiartu hriat atan - Nithanga te leh U Tlangliana te dawr atang chuan Mission Veng huam chin a ni tawh lo, Rahsi Veng chan a ni. Amaherawhchu, J.Lianchungnunga VCP a nih lai khan Khamphei chanve thleng emaw lai leh kawng chhak lamah U Rochhinga (Tlang babu in thin) in vel thleng khuan Mission Vengah a belh ta a ni. Ka sawi hun lai erawh hi chu VC pawh la awm hma daih a ni e. Kulikawn khu chu a awmsa reng a ni a, Rahsi Veng (Thakthing Veng) leh, Venghnuai leh Dam Veng pawh. Chung hun lai 1933 velte chuan Dam Veng leh Rahsi Vengnuai khu chu Di in ni vek maiin ka hria. Dam Veng 1933 (?)-a a kan tum pawhin ka pa nen kan zuk kal ve a, Pi Kawlnibawihi in leh U Mandaia in chauh mei chuan a zuahin ka hria, fai hneh tak a ni. Venghnuai pawh khu di in vek a ni a, Mualpui loa neih kum tawh chuan leh mualpui leh sihpui ruam thala a kan tawh chuan tlangval an pung khawm a, Venghnuai hnuai ram kang an thelh a, nulain tuiumin tui an pe a, an hah thin khawp mai. Awle, tun tum chu Mission Veng YLA thlalak ka rawn tar lang sia, ka titawp mai ang e. Dawrkai Veng han sawite hian mitthlain Pu Lianhranga, Pi Bira, Pu Zobanga, Pu Zoa leh Dawrkaii, Saidengi te an lo lang, lung a leng thar.