Vawiin (Vawiin ni ni loin) ka pian champhaphak a ni ve ngat mai. Heti khawpa sual, mahni siamtu pawh hre lek loa zu hmun sa hmuna thlei kawi mai mai, a eng kawng maha tlaktlaina pawh nei lo, kum 86 thleng thlenga min zuah hi ka va lawm tehreng em! Ka pension dawn - March 1987 kha chuan thiante hnenah, “Kum 65 bak hi chu chuang ka ti tawh,” te ka ti vel a, hei ka mi a duhthusam kha kum 21-in ka pel ta chu a ni reng mai. Lawm em em chungin ka rualpui, ka kawm thinte chuan mual min liam zawhsan tawh a ni ber mai. Mission Vengthlangah Khawlkungi (Padma Shri) leh Sangkhawnghina (Tumbila). Kulikawnah Thangliani, Pu Kila fanu Chhingpuii kha Ramhlunah awmin an sawi a, chung chu an ni deuh maiin ka hria. Khua hi a har ngawih ngawih mai zawng a nih hi. Chuti e ti lo chuan dam rei ka thlahlel em em lawi si! Dawihzep leh huaisen thu kha han chhunzawm leh lawk ila: Ralleng chu an huaisen ka tih kha - ni 3-3-2015 chanchinbuah pawh Assam leh Naga ramri buaiah Assam lam mi pahnih an that tih a nih leh mai pek khawt kha! Police tih angreng leh sawrkhar a inrawlh hmain an lo ri ve pawp mai zel! An dawizep lo, an ram hauh tina deuh an nia. Keini hi chuan engvang tak ni maw, sawrkhar kan phut ngar ngar phawt mai a nih hi! Kan huaisen zawh loh vang ni berin ka hria. Kan ngamtlakah thung chuan dan leh hrai kan ngaichang tak tak bik lo. Kumin kum tan tira Republic Veng tualthah rapthlak tak zan pawh khan police an thlen vek tawh hnuah pawh tualthattu sawisak tumin an thuhrukna in ni awma an hriat mi dang in chu sak that leh ngai khawpin kan vawm chhe mai a nih lawi si awm kha. Dan zawm duh mi kan nih chuan police an lo thlen tawh chuan an kuta dah tawh mai awm, an lo thlen hnu pawhin sawisak tumin kan phi nasa leh si niawm tak a ni. Heng thu ka sawi hi, ‘A tha e, tha lo e,’ tih lam ka sawi lo, Mizo hi kan huaisen vak lo a ni ang e tih sawi chianna ka sawi mai a ni. Curruption-te hi duh lo em emin kan insawi thin hlawm a - kan hmaah, kan ei mai theihin awm ta sela kan hnial thak duh/ngam ang em? tih hi mahni theuh i inzawt ang u. Aienga maida pawlha sawi aien hlang te, chengkawl bial/sawl lian pui pui ‘Tuirini chengkawl’ tlat te, Mizo vaihloa sikawng pawlh reng sia pawlh miah loh zawrha zawrh tlat te, cheng nuai khat/nuai hnih aia tam daih kum khata la lut sia fate scholarship form-a ziak tlem te ang te, BPL member ni thei miah lo khawpa khawsa thei si BPL member-a indah tlat maite hi kan Pathian hian min hmu reng tia kan iak kan iak lai si hian, mihring chu bum thei mah ila LALPA hi kan bum thei meuh ang em? Hremhmun ticket a ni mai hlawm lo’ng maw? Kan vengah hian tum khat chu ka VCP ve khanglang tawh a, khatih lai khan BPL tih vel hi a lo chhuak ni tain ka hria. Khatih laia BPL chhungkua ni thei chin chu:- an chhungkaw thla khat pawisa lak luh an chhungkaw member zata semin Rs. 250/- a pel lo tur a ni tih a ni. Tunah eng chiah nge ni ta chu ka hre lo; nimahsela, ka thlir ve dan chuan BPL member ni lo thei lo tak tak thlang chhuak dawn ta se, tuna BPL member chanve ai hian an tlem mah mai theiin ka ring thin. Mizo (tunlai) ka inhmuh dan hi ka inhmu tha lo lutuk emaw ni, ka duh dan chu ‘Tu emaw (sawrkhar?) hian kan senso zawng zawng hi tum vek sela, keini’n kan duh duh ti ila,’ tih nuna nun tum hi kan tam takmeuhin ka hre thin. Curruption-te hi haw awm em em hian kan han sawi ve thin tak na a, kan hmaa a tlak chuan kan hnial phal takmeuh ang emaw tih hi ngaihtuah tham niin ka hre thin. Mi kutah sa hrang kan hmu lian em em zel mai a, mahni hmaa a tlakin kan phun leh nasa mai si! Kan duh dan nia ka hriat chu sawrkhar hian a thlawnin min chawm tawp mai se, tui, eng, leiman, ration tih ang reng zawng zawng hi min chawisak vek mai se tih hi ni mai awmin ka hre thin. Ka chhut ve dan chuan PHE tui hi man ka ti em em ringawt mai a ni.A chhan chu ka pain kum 1938/39 khan tuikhuah a siam naa unau 8, nu leh pa nen 10 tan chuan thal chhung min daih mawlh hek lo, Vailui kama Darnam tui kan zuk chawi taih taih mai thin. Nu leh pa min hrilh fo chu, ‘Tui in heh, ren rawh u,” tih hi a ni. Tunah te hian ka han inchawi chhintir thin a, emaw hlawhfa lain emaw - tuna kan hman ang hi hmang tur chuan cheng sangthum sangli pawhin min daih miah lo ang. A pawi zawk chu tui metre te hi a la felhlel a, mi thenkhatin an dawn aia tam daih pawisa an chawi ta hi a fel hunah chuan kan ziaawm ka ring thin. Light lamte pawh hi, Mission Venga seilian ka ni a, ka hriat theih tirh ata Lalthin (kero lantern) 2 kan chhi thin. Tunah chuan pindan tinah, khawlai en tur, TV, Istiri, tui tihlumna nen lam electric kan ti mai a nia, chuti ang hmang chung pawha sangkhat vel pek chu man ka ti takmeuh thin. Thawkkhat lai khan curret a awm loh avangin kan thenawmten mombati hmangin an zan hnathawh thin a, kuhva an kheh a, kar loah Rs. 50/- man an chhi mai a ni!! Sawrkharah hian leiman ilo, eng eng emaw hi chawi ila, tunah phut phut lang lo mah se nakin deuhah chuan ‘KAN SAWRKHAR’ tiin mahni ta enin kan en thei deuh mahna. Kan sawrkhar hruaitute tak pawh hian an la experience tam bik lo a, engtikah emaw chuan thil hi a kal rual fel thlup mahna. Sawrkhar lak chawi kan neih chuan chu kan chawina sawrkhar lakah chuan phut pawh kan la neiin kan la huai ngam ngei ang. I nghak fan fan ang u. Kan sawrkhar pawh hian uchuak loin tax ilo hi khawn sela.