Tichuan, tleirawl feet 5 vel awrha sang chuan bel thum ka bel a tul ta vang mai sia, office thutthlenga ka thut pawhin lei rap pha loin ka ke ka then theih haih haih a ni si, ka zak em em mai a. Tum khat phei chu kan Jem. Hd. Clerk Phukhana’n ka bel loh lai min hmuh avangin ka bel paihsak (degrade)-ah min vai nghe nghe nia. ORs (Other Ranks) mai ni loin NCO (Non-commissioned Officer)-a chhiar ka lo nih ve tak avangin NCO Club-ah rum peg thum kan dawng thei a, tin a duh tan chuan a bâng a tam avangin mahni quota bak kan lei thei teuh fo mai. Sipai naran (ORs) chub-ah chuan peg khat chauh mi pakhatin a dawng thei. (Peg thum chu - ‘sipai dawng no’ an tih thin khat kha a ni). Ka Mizo clerk thian tam tak khan an la grade ve lo avangin NCO club tukverh atangin min rawn leitir thin a, ka lei sek mai a. Tum khat chu Battalion Havilder Major (a bânreka lallukhum chuang sana anga bânreka bun) Tumbukuka kan tih mai chuan tum khat phei chu, ‘Naupang te si rum i heh em mai,’ tiin min khak nghe nghe nia, Kan chaw chu - zing lamah atta ro, tlai lamah chaw pangngai a ni. Atta ro hi thleng tiat lo deuh 4 zel mi pakhat tana sem a ni. U Ellisa (Lunglei lama Edwal Roya nau) chuan per 9 - 11 a puar tawk a, kei pawh, te tak te e ti loin ‘Ei lama ka U ‘ tih takah per 5 - 7 ka ei thei, a changin bajein min pek belh a, a changin thiante- per 4 ei seng loin min pe thin. Ka chaw heh vang chu em ni dawn kum khat chhungin ka thang uak mai a, 1946 September thlaa ka chhuti phei chuan feet 5 leh inches 6 ka pel deuh tawh nia. Sipai tan kha ka ngeih ang reng! Indopui kha kum 1945 September-ah a tawp ta mai si a, sawrkharin demobilisation order a chhuah lo thei ta lo a; tichuan, kei pawhin DVR (Deferred Velunteer Regular) an tih ka pawh tak hlauh bawk avangin 17-4-1947 atangin sipai hna chu ka bansan ta a ni. Kum 2 che che chauh sipaia ka tan avang hian Robula sanghal (mal) awk ang ziazangin sipai bang (World War II veteran) chu ka ni ve ngat nia. Robula sanghal thang kam pawhin sanghal no, a hnungzang la tial hi a awk mauh mai a, nghal rual no a ni ang e tiin hnu dang an han zawng ngial thin a, chu sanghal hnu chauh chu an hmuh theih chhun a ni. A hrilhhai chuan a iptepuia khung thawk pahin, “Nghal mal awk chu kuli awl an tih phawt chuan ka awl thei hrim hrim,” a ti thla rawk mai nia. Chuti ang chuan kei pawh hian, sipai bangin an hmuh theih, WW II lawmman te, canteen dawr theihna smart card te ka dawng ve thei vek nia. Dik tak chuan Sap zu lei theihna pawh ka duh chuan smart card siam thei ka ni, MAHSE, ka siam lo. Tuna ka awmna BVT-a ka hmun pawh hi sipai bang ka nih vanga kan Bawrhsap, S.Barkatakia’n kum 1949-a min pek maw le! Aw le, thu dangah pakai tawh ang. Ka upa tawlh tawlh a, ka lung a leng tawlh tawlh mai! Hrehawm tak a ni. A hun laia eng tehual ni pawha ka ngaih lohte kha rilru a ‘A?hlui lo, a thar leh thin’ hlain a tih ang maiin a thar leh thin. Khang - eng kum ber nge ka hre reng ta lo, 1950 hma lam ni ta maw - Mission Veng thalaiin Pa Laia huan tlanga kan picnic te kha - tunah chuan mi thahnem tak an boral tawh nghe nghe. Inhuatna awm reng reng lo maia nilenga fiamthu thianghlim han thawh khawm a, hlim em em maia zaite kha a lo nuam. Thil duh ang ang ei, duh dan dana khawsak theih, in tha tak neih tih ang rengte hi kan awh kumkhua ni mah se, thatlai huna lungkham tehchiam nei loa hawklakte kha a lo nuam takmeuh a ni. Mission Veng thalai, Pu Laia huan tlang chhip zawla kan han picnic chu, duhtawka kan ei puar hnuah a huho ngatin kan hawng leh tlang a, chuta mihlim hla (chutih laia lar em em) ‘NEVER VER COME’ tih kan han sa rual suau suaua kan lâam kawng tluan bawk. A hma chu a awmzia ka hre lo, vai zai kan tih ang kha a niang: ‘Aw, tawi ni an never ver come, Ka sai eraw ka sai e, Meraw meraw andar meraw an sistar Hawri hei hawri hei, Ka sai eraw ka sai e’ tih hla a ni, a thu leh a thluk a tha a, lâm a rem a, Pu Laia huan tlang (tuna Mission Vengthlanga Jubili Biak In tlang) atanga Mission Veng Pu Zawla kawt (tuna Pu Lalfakzuala, IAS retd te in bul vel khu) thlenga MERAW hla sa leh lâm ngat maia han tleitlak chu hah viau awm, chuti hehu pawh kan ni lo. He picnic ka hriat chhuah apiang hian Ringluia, IAS (L) te, Lalzidingi te hi ka hre zual bik thin. Tunah lah chutih laia ramhnuai kawng chu in tha pui puiin a ngir khep khup ta mai si. Mi reng reng hi kan fel kuau vekin kan intifekfawn ta riau mai a. NUAM pawh a vang ta e. Engkim maiah SIAM SALEM nih kan tum ta vek mai a nih hi. Tun tum chu tawi deuhin aw - Chawnglungmuana leh Hrekima’n hmuh ngah teh se. Anni thu ziak hi chu mihring thu zia a nia, keia ziak ve hi chu EK DUI mai a nih hi!