Chawlhni hmasaa ka PASAL THAT DAN ka ziak kha thenkhat chuan tleirawlin an ngaisual ang tihte min rawn hlauhpui deuh a. Mahse, ka’n ti talh teh ang: Ramsaa chhiar ngat panga laiah thal thlah ve tawh chunga pakhat mah ka kah thluk loh thu ka sawi tawh a, a tawp khar nana ‘CHUTI ANG CHU KA PASAL THAT DAN CHU ZUK NIA!’ tia Interjectional mark nen meuha ka khar ang khan mihring tungchhoa kal pangngai tan chuan KA THEMTLAW ZIA ka sawi a ni tih an hriat vek ka lo ring mai a. Engle khaw le, a tira bracket chhunga ‘pasala tha ni loin’ tia ka chhutte pawh ‘a’ an hmaih a, pasal tha ni loin tih tein an rawn chhu chhawng a, Tangtial tih tur lah Tialtial te an rawn ti mai mai a, proof reading an tih hi a awm lo emaw ni. Chhiartuten keimah min zawt leh lo thei si lo a, a chhu sualtute an kel-e-awl hlauh si a nih hi. Kan sai ram chhuah kha chhunzawm loh theih niin ka hre lo. Khatia ka sai kah ve bak 10 emaw lai kha chu an tlanchhe chho zel a, an hmanhmawh si a, an inkhachhuan tup (a hmasa ngum chungah a hnuhnung zawk lu a awm zel) mai a, Pu Bawktaia, sai kap thang na na na chuan an chhak lam atangin a um a, pakhat tlanchhe ve mai thei lo (?) chu ka kahna chhak lawkah chuan a inkulh ta a, chu tak mai chu Pu Bawka chuan a chhak lam awihpang atangin hnai set sawtah, a mit chung bek damah tak a’n kap a, leh pawh ti hman loin a let tawp mai. Awihpang a nih avangin a sir tluk lo thei lo a, a ding lam delhin a tlu saisir a ni. Min hrilh danin zawlah chuan a awp ringawt a, bawkkhupin a thi mai an ti a, tin, chalchang a nei lo an ti bawk. Sai kahna bik tur chuan silai mu kan siam chawp bik thin. Cartridge 3 zen hi 2-ah kan siam a, a mu atan motor tapperred roller an tih mai, a pawn ngen (?) a chhunga suan chhun khah kan hmang ber. 12 bore silaiah chuan a thawl deuh a, chu chu mauin kan tichhah deuh thin, silai kaw chhungah a khang zawngin a kal ang tih hlauh vangin. Kan hlut riau mai, a van avangin. Pu Bawka sai kah khan note, sate tiat vel hi a lo neih avangin a inkulh mai ni awm tak a ni. A nu tlu reng hnute chu a’n ban ve de de a, chhangtu awm tawh hek lo, a thinrimin min phin ta thin a. Kan darh hak hak mai a, kan thian Nela (?) chuan Pu Bawka chu kah a dil a, a ui tlat si, sat hlum mai rawh a ti mai a, sah hlum rual a ni bik lo. Tichuan a hnawksak riau mai si a, a chaldarah LG pangngaiin a kap a, a tlu ta a, mahse a thi mai bik lo. Kan thian dangte kha an lo thleng a, an sat hlum ta niin ka hria. Chutih hun chu chawhnu thlang her a ni tawh a, a thenin rawnalin tlahthi an suih ngar ngar nghal a, tin hrei-fang kan ah sa chu a ha an siam mawlh mawlh bawk a. (Hrei fang chu a thir hi, a ha chu a a fawng hi). A nawn an tan hmawk a, thian pakhat nen lo chan rawh u min ti a, kan ni tlakpui ve der tho! A ding zawnga sir tluk ka tih kha, a vei lam nak chu a zang hnaih deuh atang hian a nak ruh chek bung zelin an hawng ta a, a ding lam nak khuarah chuan a thi a tling puau mai a, an han theh kang leh rih a, tlahthi kha hriam hle mah se a bil rang khawp a, kan thlak sek mai a ni. A kawchhung buaipuitute khan a lung, a lunghnun, a rilfang, a thin tih ang reng an buaipui a. Keini thian dun chuan a nawn chu a tluanin a vun kan lip a, tlahthi bawkin. Kan nilenpui ve der tho a nih chu. Kan chan vel lai chuan Pu Bawka chuan, ‘Chhuana, a hmeh tur sa chu a tam a, a lehlam zu a awm lo a ni ti rawh,” a ti fiamthu a, a ni taka, sa chu a tam kher mai. Sai sa chu chan 12-ah kan then a, chan khat chu Bawngbuk Headman, a hminga chu sai chu kah a ni nghe nghe, Pu Chala chanai a ni. KG 5/6 vel theuh chuan kan changin ka hria. Tichuan, Buhchang kawng kan rawn pawh a, chuta tang chuan Aizawl-Silchar Road kan rawn man leh a, Bawngbuk kan thleng ta a ni. Bawngbukah chuan zanriah te kan chhum a, a thin kan kang a, zu nen kan hmeh hlawm. A tukah chuan Bilkhawthlir chu a pachhuakin kan thawk ni berin ka hria, kan thahnem bawk a, a note sa te, a vunte pawh kan fai vek a ni. Lui dunga sa an insem hlanin a hapui lak ka tum a, a sak em em khawp a, ka bula hreikawl chuan dim miah loin ka chek a, ka chek thla hram a, ka ak ta daih a. An insem so an lo chhoh chuan hreikawl neitu chu Pu Bukthanga, hmanlai chuan Kulikawn Biak In kawmthlang kawng kama khawsa thin, Bilkhawthlira pem thla ta hrei chu a lo ni a, a’n en vung vung a, “Ka hreikawl chuan ngam loh a tawng a ni maw,” a ti vung vung a, a pu hawng ve ta mai bawk. Kha thirdeng kha a hah hlein ka ring! Chumi tum chuan sai vun nen kan hawn ka tih kha, thenkhat chuan Fawng (kho) khuhin an tiro a, fawngah an hmang a, mahse a rit a, lek lek peih chi a ni lo. Ka thlen inte chuan an rep ro a, se vun kan sawisak ang mai hian kan rawh a, kan tifai vek a, kan chhum hmin zan a, kan bawl a, a tui khawp mai. Sai hi lianpui si a inthup thiam ve riau a lo ni. Tum khat pawh ka thianpa nen Chhimluang dungah Sazuk kan pel a, lui kam phei zawl kan zawh chhoh lai chuan ka thian chuan, “Sai hi kan hmu phut mai angah,” a ti zo hman chauh a, hnai zet maiah sai mal tlat lian zet mai hi kan hmu phut mai a, tlanchhiat ngaihna a awm tawh si lo, min phin vaih chuan ka kap ve reng reng ang tiin ka inring ran mai a, che loin kan ding tlat a, sai pawh khan a tir chuan a beng a rawn parh hlut a, min phin mai tum ni awm takin, mahse kan chet bik loh avang ni maw, muangchangin a inher a, a kal bo ta mai bawk a. Kan su lo chauh zu nia le, mak tak a ni. Sai a kal bo takah chuan keini pawh kan hawng nal nal mai.