Tichuan, Assam Regiment rawngrut (recruit) ka ni ve ta ran mai a, Clerk tur ka nih avangin Learner clerk kan inti ber. Tin, clerk rau rauah hian chi hnih Combatant Clerk leh Civilian clerk an awm a, combatant clerk chuan silai hman dan te, lam dan zawng zawng zir tel vek a ni. Civilian clerk chu, Civil ni siin Uniform an ha ve chauh a ni thung. Ka thiante kha chu Aizawla nambar pek vek an ni. Kei chu Shillong-ah thla chanve lai hnua in enroll chauh ka nih avangin ka nambar pawh 4328214 chauh a ni ta. March 1945 vel atangin Regimental nambar an hmang ve chauh a, a hma chuan Col. Brawn-a te khan pakhat atangin an lo tan ve chawr mai a ni. Kan thlen hlim khan an lu an meh kawlhsak nghal mai a, thosilenah an tang chat chat thin! Kei pawh tuk khan chu hazam ka han meh kawlhtir ve dawn a, min tuam vek tawh - K’u Chhunga (Ch.Chhunga CM?hmasa ber kha, Shillong-a lehkha zira a awm lai a ni a, a lo chho a, lu meh tura ka lo thu chu, ka chhip samah a tham a, min hnuk ta mai - Sipaia i tan ka phal lo a tia, bahrikah min hnuk thla a, sipai e ti loin ka’n tap leh rih thin. Mahse ka tum laklawh tlat tawh avangin, min hawnsan ve ta mai bawk a. A?tukah lu met tur bawk chuan ka han thu leh a, min met tep tawh tihah Civilian Clerk Satish Chandra a lo kal a, ‘Nang chu Learner Clerk i nih kham Batallion order Part I-ah Clerk chu lumeh kawlh a ngai tawh lo, a sei lai inches khata meh tur a ni,’ tiin min hrilh a, hazam chu a hrilh bawk a; tichuan, kawlh ret lo chuan min met ta a. Kei hi Assam Regiment-a lu ziah kawlh loh hmasa ber ka ni ta. Mahse, PT-na (Physical training)-ah JCO kan tawh tawh phawt chuan meh tur a ti ziah mai a, ka ning hle. Kan Uniform dawn chu, Sikh palian pangngai hak theih awm khawpa lian a ni. Olive green rawng la hman a ni lo. Uk sen kher khur inting ang mai a ni, darbak vek a la ni a, boot leh mawza leh lukhum a awm loh avangin kelawngin kan kal mai. Ngurkhuma nena kan kekawr chu kan tet bik avangin kan ha zo lo nasa bik a, Ngurkhuman thleh sarihin a tlang a thlep a, keiin thleh ngain ka thlep a, kap lam a tawka kan pawh chhin chuan kekawr kawng tlang chuan hnute a khuh lo chauh a ni. Darbak hmanna tham a awm lo, buara kan hmang mai thin! Drill vela ka instructor chu Naik. Darchhinga a ni. PT?leh rifle lam chu ni tin kan tihchhawk a. Zing dar 9 (tuna dar 8 in tih tak sek hi)-ah tukthuan kan ei a, dar 10-ah kan office thin. Ngurkhuma nen kan pahnih chuan Family Alottment section (Record Office)-ah kan awm a. Kan hna ve ber chu - 1st Assm Regt., 2nd Assam Regt. leh Trg Battalion-a mahni chhungte pawisa thawn thla tin duhho pawisa kha Money Order-in kan thawnsak thla tin a, MO receipt lo kir kha IRLA kan ti a (Individual Running Ledger Account), phek hlaipuiah MO thawn ni, receipt tih ang reng leh thawn zat, MO receipt hmuh kir leh ni (chu receipt chu a data kan enter hnuah Guard file-ah kan bel leh thlap a ni). Money Order form kha sipaiin kan hman chu a hrang a, a paw dang a ni a - MO BA form kan hmang thin, chu chu thla tin hian thawn hmain type writer-in kan chhu vek a, AWL LAI RENG A AWM LO. Assamese-ho khan an tangka hmuh ni kha an phung hawrawpa an ziak thin avangin kan zawt sek mai a, an ninawm hle. Money Order kan chhut nasat avangin type-writer pawh blind-a zir loin zungchal leh zunglaiin kan chhu ve ngawt ngawt mai a ni, tun thlengin. Tuk khat chu, bahrik atanga ka mal kal chho chu, rin loh deuh maiin sipai ifficer, sap-sawn Lieutenant (tam takin Liutenent tia tun thlenga an lam hi keini chuan Leftenant tiin kan lam thin) Davindena ka tawk thut mai a, sipai uniform lian em em ha, lukhum khum lo, pheikhawk pawh bun lo ka la ni si, ka intisipai ve tawh si - salute chu ka han pe ringawt mai a. A ding chat mai a, ‘Tumhara nambar kiya hai?’ min ti a, ka lo naal lo nasa mai si a, muang fan raih hian 4...3...2....8 ka’n tih chuan, ‘Bloody hell, You may go,’ min ti a, ka kal vang vang mai! Ka junior hle tih a hre mai ni tur a ni. Tum khat chu kan PT zo, chaw ei hma hian Laldawla (Pu Darhuaia, Kulikawn thin fapa - Garo Minister nupuia nei ta kha) khumah kan lo awmkhawm a. Dawla chu a bawkkhup a, PT dress vekin kan la awm. Kan Commandant, Lt. Col. H.E.Madge leh kan Adjutant Capt. D.S.Ewell an lo lut thut mai a, a tu amah salute pek nachang hria pawh kan awm lo, a hmu apiang chu attention-in kan ding mai a, Dawla chuan hmu ve hek lo, Adjutant chuan a mawngtamah a’n vaw tawih mai a, a AWIH thawt mai a, keiniho lahin engmah sawi ngam tawh si lo. A’n vaw leh tawih mai a, Lalliana vuak emaw a tih avangin ring zet mai hian AWIAH tih pahin a lo lehhawi chu le... CO leh Adj lo meng nasa mai a’n hmuh chuan rang em emin a lo ding chhuak a, a hming leh a nambar a note a. ‘Tunge senior clerk?’ a ti a. Hav/Clk Sangnghina a lo nia, a hau a, min chhuahsan leh ve ta mai bawk. Clerk hna ni tin thawk chungin ni tin Clerk sikulah kan kal bawk a, darkar khat emaw kan zir tuk tin thin. Tin, darkar khat dang chu sap tawng Basic English an tih mai kan zir bawk. An sawi hmangin chu basic English-ah chuan word 800 thlan chhuah bik a awm a, chu word thiam vek chu simple English-in an tawng thei an ti - Thutthleng chi hrang hrangte hi SEAT an ti khawm tawp mai a, sa chi hrang hrang pawh MEAT, an-hnah chi hrang hrang pawh Vegetable tiin an khaikhawm tawp zel mai a ni. Tichuan, reilo te kan zir hnuah April ni 17, 1945-a lut ka ni ka tih kha, June velah chuan Clerical leh Basic English ezam chu kan nei ta mai a. Result an rawn puang a, thahnem takin clerical chu kan pass a, English chu 60% hmu phak lo chu III Grade Havildar Clerk kai phal a ni lo an ti a. U Biakthuama, Zawngin lam mi, Tlanghmingthanga (Pastor Liangkhaia tupa) leh kei chauh chu Basic English-a 60% pek kan lo nih avangin kan pathum chauh chuan up-grade theih kan ni ta si. Khosem khai turin (thutiam la turin) thla hnih che che chauh service ka la nei si. U Darchhinga ten i la naupangin i la te lutuk, khosem khai phak i la ni lo ang min ti a, khosem (oath taking) pawh ka zir ve lo. Mahse, a tawpah - i tel ve tur a ni tiin Order a lo chhuak ta si. Ni 17-4-1945-a sipaia tang hlawl chu ni 1-7-1945 (thla 2 leh ni 13)-ah a mik amak hre lo chuan Oath taking Ceremony-ah chuan min tlar ve ta si a, sawi miah loin OATH chu ka tlingtla ve ta ringawt mai a, chu ni 1-7-1945 atang chuan Hav/Clerk (Grade III) ka ni ta reng mai. Ka la te nasa si a, bel thum bel chu ka zak em em mai a, sap leh Negro sipai lian pui pui kara kei fit 5 leh inches 4 pawh la tling lo, hmel la naupang bawk siin bel thum han bel chu - ka mur chum chum reng mai. Chuvangin ka kawrah pawh bel thum chu ka thuibet ngam lo a, hmun thumah hook ka thuibet a, ka kamit banah (hetih hunah hi chuan Olive green uniform kha a lo chhuah tawh avangin mahni fit tawkin dawrji (puanthui) kan thuitir hlawm tawh a ni) A ban ding lamah hook bahna tur ka thui a....