Mahni huang e ti lovin tu tu te’n emaw an hriat châk zawng chhuah turin min rawn ngen si a, tun tum chu CHAWNGKHUM DAN TLANG HUAT LOH tiin thu zangkhai lam ka’n chawhchawrawi teh poh a ni ang che.

1. Kan ni Rualkhumi, Venghnuai khan tawng dan lamdang tak a nei ve tlat mai a. “Pasena te inah ka han leng a, a nupui Chawntuahi’n thingpui min lo pe a, AN NO-IN,” zu ti kher thin a.

2. Thawhlehni sawrkhar chawlh a nih avangin U Lalropuia (LDC, DC Office) khan Thawhtannia office ban atangin, a tuk chawlh alawm tiin zu a in vak mai a, a in tam deuh a niang, a tuk office chawlh, Thawhlehni chu a mut bo thak mai a, Nilaini zingah a harh chauh mai a, Thawhlehniah a ngai mai si a, a chawl mai a. A tukah chuan office-ah a va kal a, Head Clerk U Vandailoa khan, “Lala, niminah engati nge i lo office loh?” tiin a’n zawt a. U Lalropuia khan Thawhlehni a mut bo tih hre hek lo MAK ti em emin, “Nimin a awm em ni?” tiin a zawt let heu mai maw le.

3. Tuk khat chu Pu Zatluanga CI kha office a tlai a, Head Clerk chuan, “I lo kal dawn ta lo emaw ni tiin Pu Uisakawta (Wiscot, Khasi SDC) hnenah Attendance Register ka lo putup hman tawh asin,” a ti a, ngawi rengin Pu Zatluanga chu Pu Uisakawta pindanah lutin Attendance Register chu a keu mawlh mawlh a, 10 AM tih a ziak mai a, Uisakawta kha a lo lungni lo nasa mai. “Pu Zatluang, tunah dar 11 engah nge min dil loa i ziak mai, tunah dar 11 pel tawh,” a’n ti a. Pu Zatluanga chuan hmanhmawh lo zet hian, “A! he lehkhabu hi chu dar 10 leh dar 4 bu alawm,” a tihsan a, a dang der zawk mai.

4. Pi Lalsangi pawh - a fapa Dawnga an inchungah a lawn a, a far phah ang tih hlauin chhuk turin a ko a, a duh lo a, a tlan vel a, a thinrim chuan hming lam meuha hauh a’n tum a, a fapa hming chu a theihnghilh ta tlat mai si, vanvadakin thinrim sen teuh chungin, “Masang ka tih a ni si lo,” a ti vak mai nia (Masanga chu a tupa a ni a). Amah chu tlu tawp tawpin a la nui lehnghal.

5. Dr. Thanliana kha District Family Planning Officer a nih lai khan Inrinni hi half holiday-a hman a ni thin kha a nia, Inrinni tum khat chu, mi dang zawng zawng an hawng tawh a, a clerk pakhat Hminga a chhawr a, chawhnu her a nih tawhte pawh chuan a la chhawr ta ngat ngat mai a, Hminga hawn ve châk tawh chuan, “U Than, vawiin chu Inrinni a nia, half holiday a ni sia,” a’n ti dek dek a, U Thana chu MAW? Hminga chuan, “Ni e, hei mi dang pawh an hawn zawh vek tawh hi.” Dr. Thanliana chuan, “Ka awih law,” zuk tia le!!

6. Chhim lam mi, Hauhthang hmingthanga te pafa thum khan tuilian an kân dawn a, an pa ber Hauhthanga chu tuilian chuan a la ta mai, a fate pahnih chuan an dai kai hram a. A naupang zawk chuan, “Ka U, i zuk pui tawh mai ang,” a’n tia, a U chuan, “Khu lai kawi khu han liam zet rawh se,” a ti. An chhan hmain eng tin tin emaw a kai ve ta hram a, a lo chhoha an hnen a rawn thlen chuan engtin mah, engmah sawi chuang loin an hawng ta mai. Ngaihsam ve tak an nih hmel.

7. Mizo District Bawrhsap (Superintendent of Lushai Hills) McDonald kha ICS lai e ti loin lamdanna riau (accentric) a nei roh a. Dr. Thanliana pa, Pu Thanga patea kan tih mai kha chu a ngam ngai miah lo. Lehkha lo lut petuah khan a tang a ni awm a. Lehkha pakhat lo lut hi a dawhkanah chuan a va pharh dek dek a. McDonald-a chuan eng kaw sawi loin chu lehkha chu a tham chuar tawp a, a paih ta mai a, Pu Thanga chuan a chhar a, a khup chhanah chuan a zut mar a, a va dah leh mai a, Bawrhsap chuan Pu Thanga chu a melh khui khui a, lehkha chu a tham chuar leh tawp a, a paih leh mai a, Pu Thanga chuan a hma ang bawkin a chhar a, a zut mar a, a pe leh mai a. Chuti ang chuan tum thum ngawt an ti dun a, a tawpah Bawrhsap chuan, “Ngati nge ka paih i rawn dah leh thin?” a ti a. Ani chuan thate hian, “Ka pu, ka hnathawh chu i hnena lehkha an rawn thawn i hmaa lo dah zel hi a ni a, he lehkha pawh hi Bawrhsap hnena thawn a ni a, engmah i la tih si lo a, ka pe leh thin che a ni, chu chu ka duty alawm,” a ti sam mai a, Bawrhsap chuan lehkha chu enin instruction te a ziak ta nge nge zuk tia!

8. CI, Rahsi tih ang reng kha pa pui tak tak, dik tak tak an awm nuk a ni chawk ang. Kan Pu Suakhnuna pawh khaaa... Bawrhsap (Chaprasi) zawng zawngin office-a an hnathawh diary-ah an ziak vek ang a, thla tin office-ah an thehlut tur a ni tiin. Chungho chu Table Diary a pe vek theuh a. Thla tawpah chuan Bawrhsap chuan a han en a, kan Pu Suakhnuna diary-ah chuan (Table diary a ni tih hriat reng tur) MONDAY zawnah Vawiinah pisa ka kai, a tul apiang ka ti. A hnuaia TUESDAY zawnah ------------do-------------, A hnuaia WEDNESDAY zawnah ------------do-------------. Chuti ang chuan Zirtawpni thlengin ------------do-------------. A kar leh MONDAY zawnah Vawiinah pisa ka kai, a tul apiang ka ti. TUESDAY ------------do-------------. Chuti ang chuan thla pum chu a lo ziak a. Bawhsap a thinrim a, “Han ko rawh u.” “Rahsi, engati nge i hnathawh i ziah loh?” tiin a hau rawk mai a. Ani chuan, “Ka pu, he lehkha them te takteah hian pachang nileng hnathawh a ziak sen loh,” a ti bur mai a. Bawrhsap chuan, “Eng nge i thawh chu?” a ti rawk mai a. Ani chuan, “Ka hnathawh chu ‘Rahsi, ka pu, Sainghinga ko rawh, ka lo thleng chauh a, Rahsi, Buchhawna ko rawh. Ka lo thleng leh dek dek a, Rahsi, Head Clerk ko rawh. Ka lo thleng chauh a, Rahsi, Dawrpuia Zungtawia (Ram Guti Dutta & Sons (?)) hnenah a bain Grand National Sikret bawm hnih va la rawh. Ka lo thleng leh dek dek a, Rahsi, Bangla-ah kal la, i pi hnena mi thingpui va la rawh, i ti a, thut pawh kan thu hahchawl hman eih hleinem. Chuvangin hetiang zungpui hmet lek lehkhaah hian pachang nileng hnathawh ziak sen rual a ni lo.” Bawrhsap dang lutuk chuan, “He DIARY hi Assam rama diary tha ber a ni, a frame siam ula, pisaah tar rawh u,” a ti tawp mai zuk tia.

9. U Lalropuia (LDC) bawk kha mikhualin dilna a type-tir a, khawl chhut kha a lo thiam ikhaw si lo a, tlar khat emaw chhut hnuah a ngawi ta veng veng mai a. Mikhual chuan, “Ka pu, i zo dawn tawh em?” a’n ti a. U Lala chuan, “Thianpa, F ka hmu zo tlat lo,” zuk tia!!