Ka pian leh murna chu Mission Veng, Aizawl a ni a, Bawrhsapin Bvt-a ram min pek avangin kum 1969 khan ka zuk awmchilh ta a ni. Hei, kum 50 a tling ta tep mai!

Sikulpuii bula Sikulsen kan tihah khian sikul ka lut tan a, kum 1937 kha a nih ka ring. Chung lai chuan vai (Gorkhali) naupang pawh pawl hrang neiin an kal ve mai. Zirtirtu Pu Zalawra leh Jay Bahadur (Keleka) an nei ve bawk. Khatih lai kha chuan vai nena insual, vai velh tih kha kan thupui ber a ni awm e. Tin, Assam Rifles lane boy kha lian fu fu an kal bawk. Vai (Gorkhali) khan Lushai Kuki min ti a, min ten em em thin. PHE tui tihte la awm hek lo, Darnam tuikhur tuite an hmeichhe ho khan an rawn chhipchhuan a, kan sava vehin kawng tawt lai deuha kan han hrut hian, “Chhis,” an tia, tui chhipchhuan kha an bun vek thin. ‘Jutha’ an ti mai a, chu chu keini naupang pawh khan kan run riau a, kan nek lui hram thin.

Sikul lamah pawh chuan Lushai Kuki kha kan nia, keini chuan jutha leh tha lo nei ve loin NGAM kan tum ber mai a ni. Kan rualpui hi chu ngam-saah kan dah a ni ber ang, kei aia lian tu emawte hian, “Hei hi i ngam em?” an han tia, “Ngam lo,” kan ti ngam si lo a, NGAM kan han tia, “A chalah chil hnawm rawh le,” an han tia, an lo duh bik si lo a, kan insual chu a ni der zel mai.

Kan insualin kan chimawm ve hrim hrim a, Vai Hmeichhe Veng (Khatla)-ah sawn Vai nu pakhat bawng chaw phur ni tin mai hi a awm a, “KA PI CHIBAI,” tih hi a haw em em mai a, kan chhaih thin a, a thinrim hian a chemkawma min sah tumin min um a, min umphak si lo a, a tawpah hian a pawnfen a hlim a, a dawrh vak a, “La raw,” a ti thin a, chu chu kan hmuh châk ber a lo ni bawk si, kan hmuh tawh phawt chuan, “KA PI CHIBAI,” tih chu ngei ngei a ni ringawt mai! Um lah min um nasa, dawrh leh min dawrh khum nasa. A bawng chaw phurh lai pawh hian ‘KA PI CHIBAI’ phawt chuan a kei lawk a, min um ngar ngar mai a, min umpha se, a chemkawm khan min sah duh tak tak ka ring. Mahse, min um phak si lo a, a tawpah kan hlawh chu DAWRH KHUM kha a ni. Kan hlawh tha ngawt asin! Hmuh a harsat tehreng nen.

Lane Boy an lo kal takah chuan kan rual U-te nen an lo intibuai em ni tehreng, U Romawia (Pu Tlangbawiha fapa) chu New Street thlaah khuan Thirtea te, Motilal-a te hoin an vaw thlu der nghe nghe a, Mission sapte leh sipai sapte pawh an inbei nasa an ti a. Pu Niara (Evans) phei chuan sipai sap kut a thlak thelh tihte kan hre ve. Chuta tang chuan Lan Boy sikula lo kal ve chu an khap tain, vai naupang pawh Kawngchhak leh kawngthlang kara UPC Biak in thlanah sawn an sawn ta vek a ni.