CHAWHCHAWRAWI lehkhabu kha ka chhuah ve bawk kha. Chu aia RAWIIN KA HUANG hi chhuah a nih hi. Mi huang a ni lo bawk a, inthlahrun lam pang chu KA HA a ni ringawt! He ka huang tlaktlai lohzia leh chhawr nahawm lohzia hi chu chhiartu’n in hriat vek hi! Ka ri te, Chawnglungmuana leh Hrekima hi chu chhiartu hian in chhawr ngawt ka ring. Keia thil chhuah ve hi chu Chanchinbu tihnawk tu! SIKULPUI khi mi tam ber chuan kan hre awm e. 1907 a din niin, a hming a putna chhan pawh hi, North Lushai Hills a Middle school awm chhun a ni. Pawl IV a\anga pawl VI thleng a awm. Sikulpui tih loh rual a ni lo. A sak dan te khi, sap pachal ruahman a ni bawk a, Sikul kawn a\ang khian fit 6 vela zauin rahka 52 a awm chho a, a laiah chawlhna tur niawm takin fit 5 vel zawl an dah bawk a. A sir tawn tawn ah tui luan kawr nalh em ema Bilat lei (cement) a chul mam, naupang kum 10-12 vel chu duh thala tawlh theihna khawpa lian hi an siam bawka, a kawr sir pawn lam te chu tlan zawi zawi theih khawpa lianin bilat lei bawk chuan an zut mam leh thlap nia! Sikulpui luh dawnah chuan (tunah a la awm emaw) rahka bawk chhawng thum a awm leh a, a sang ber chu fit 6 vel em ni ta’ng, lung tlawn khat chiah a ni a, rahka pahnihna chu, a chung aia seiin lung tlawn thumin an rem nia Sapho kutchhuak kha an uluk thei teh a nia! An thil tih reng reng kha an uluk em em mai a lo ni. Ka ngaihdan chuan AIZAWL COLLEGE intih khian Sikulpui leh sikul kawn leh Aizawl mawina nasa takin a tihmelhem a ni. Tuna College sakna sikulpui hma lamah khian Khiang kung 4/5 a awm a, sikul kawt zawlah pawh khiang kung 2 a awm \hin. Tlai khawhnuah, kan tawt em em hnuah BEAUTIFICATION, CLEANLINESS te kan tharthawh leh sia. A tir phat a\ang khan ruahman ila chu Aizawl khawpui hi a mawi em em tur a ni. Ngaihtuah mah teh. Bawrhsap (Governor) bangla te, Pi Zaii Bangla te, Pu Mena bangla (Dawrkai chung) te hi. Sap rorel laia an in sak kha a thawl, fal nalh zel nia. Aizawl hi mi kan zel avangin a tawt lo thei lo kan ti a ni mai thei, plan fel tak nen chuan khawpui zau zel tur hi ruahmanma fel taka siam hmasak theih a ni zawk. Tuna kan khawsak dan hi chu \henawm nena kan inkar chu... bang pakhat intawm a nih em loh pawh in bang insi, tukverh hawn theih miah loh a nih hlawm hi. Hmanlai chuan Sikulpui kawn atang khian Synod building (office) thleng khuan New Street ah in a awm ngai lo. Kawng thlang hla deuhah Puantahin tiin Hmeichhe sikul naupangho puan lam hna zirna hmun a ni. New street kan tih takah khian Dr. Pahanga (J.Thanghuama pa) kha a awm hmasa ber awmin ka hria. A hma chuan lamlian thlangah khian Tuikhuah thlanga tuikhuah khi an siam dawnin a mawngphah tur lei rawh chan lutiat tiata hlum, an rawhna khur a awm thluah \hin. Hei hi, a rawh ve tu pakhat, Pu Lalkhuma, Mission Vengin ka naupan laia min hrilh ka hriat a ni. Sawi leh sawi hnu, Mission Veng hi Tlangnuam lal hnen a\anga Mission Sapin Rs 100/- a an lei a nih avangin Mission sap khan thu an nei riau a, Mission Veng chhungah in 75 aia tam awm an phal lo. Chuvangin Dawrkai thlaah pawh khuan, chhuk thlaka ding lampangah chauh dawr (in) a awm Pu Lianhranga, Pu Bira, Pu Zabanga, Pu Zoa, (thlanmual panna kawng), Pu Chawngkhuma, Pu Lianhleia, Pu Suakbuta (thlanmual panna kawng), Pu Rosema, Pu Tlangbawiha. Chuti thleng chu Mission Veng chin chu a ni. Mission sap ho control a ni bawk a. Presbyterian kohhran mi lo chu, chu in 75 ah chuan an tel ve thei lo. Tin, mi awm \ha duh lo chu an hnawhchhuah loh leh an hrem (suspend) mai zel.