Tun tum chu LO leh RAWN hman dan sawi fiah ka'n tum teh ang. He thumal hi mi tam takin kan hmang dik lo nasa hle a ni. LO hman-na turah RAWN kan hmanga, RAWN hmanna turah LO kan hmang leh si. Sawi fiah awlsam lo tak mai a ni a, a tlangpui thuah chuan ken tel nei loah LO hmang ila, ken tel neiah RAWN hmang ila a dik tlangpui. Entir nan:- 1. Kunga i LO len hunah kuhva RAWN keng ang che. 2. Thanga a LO zin a, Sakhi sa rep min RAWN hawn a. 3. LO leng rawh tih aiin RAWN leng rawh ti kan tam ta. LO leng rawh tih tur a ni. A tlangpui thuah RAWN hi a sawitu hnena thil thleng tur, amah pan turin a ken tel tur sawina a ni ber. LO leng la Kuhva RAWN keng ang che tih ang khian. Engti zia teh reng ni nge ni RAWN leng la kuhva LO keng ang che tiin an/kan hmang letling ta vek deuh mai. MAH leh MA tih pawh hi kan hmang pawlh nasa hlein ka hria. MAH tih hi chu a ni lam ( affirmative) sawina a ni. MA erawh hi chu a ni lo lam (negative) sawina a ni. 1. Va en MAH teh ka tih chuan en turin ka sawm a ni. 2. Kal MA lek rawh ka tih chuan kal lo tawp rawh tihna. FAK: Fak tih hi hmar tawng atanga kan lak ve a ni chungin hmun khatah chauh kan hmang. FAK kan tih chuan Chawchhun ei tihna chauhah hian hman a ni, Chu pawh CHAW KA FAK tih nan chiah. Chawchhun kan tih chuan ei kan hmang leh tlat si. Chaw ka fak tih chuan chawchhun a ei tih FAK hian a hrilh nghal a ni ber awm a. CHHUAK leh LUT pawh hi hman riau awmna bik a awm. 1. Ram pawn atanga Mizorama lo lut chu chhuak kan ti vek . He khawl hi vai ram atanga chah chhuah a ni. Ram buai lai khan Vai sipai an chah chhuak teuh mai. Kan loah sanghal a chhuak a, Vana te bawng erawh a lut tla. Chuti e ti lo chuan ‘Kan khuaah sakei a lo lut leh lawi si. (Hei pawh hi Sakei LO lut chuan Kel a RAWN seh tih tur) Mi mal tih bawr laiah hian kan buai riau bawk. Mitin tih mai turah Mimaltin tih kan hmang nasa hle. Mimal mal tih pawh a dik tho. Thenkhat chuan Mitin te te kan la ti ta dahruala. Dawhsan lam chang intihfekfawnna hmunah hian mak tak maiin kan tawng sual tam bikin ka hre thina. Hawihawm kan tum luat vang niin ka hria. Chung zinga a langsar zual chu : I lo, ila, Lo leh ang u hi pakhat chu a ni. I lo tia kan tan chuan ang u in kan khar tur a ni. Lo a kan tan chuan ila in kan khar thung ang. I lo zai ang u , Lo bang dawn tawh ila tiin, Lo hi chu sela pawh a hman theih ang, a hmun a thuin. Liani lo kal sela tiin. Hei hi Biak inah kan hman pawlh nasa hle a ni. Sentence chheh thar ka ti mai a, keini ho hi sap dan ngaina ta reng reng hi kan ni a. Mizo chuan emaw kan hman chuan a khar nan pawh kan hmang zel: Thanga emaw Liana emaw kal rawh se kan ti khera, tunah hi chuan Thanga emaw Liana emaw kal rawh se an ti ta vek deuh mai. Chu lo pawh: Kunga nge lian Vana tih tawngkam pawh hi Kunga nge Vana lian an ti ta tlat mai bawk, Hranghlui lam tan chuan a lek huin kan hria. Sap kan sawi ta sa sa :- Lai-ah hming hi Mizo chuan tha em em, mawi leh awmze nei taka kan chhungten min phuahsak kan nei theuh a, Mase Sap bawk kha kan thik a. John L. Ralte, Jenny V. Hmar te kan ti vela, John leh Jenney hi hre thiam lo tan chuan tunge mipa a tunge hmeichhia pawh a hriat loh. Chu bakah K. Pachuau, M. Sailo tih ringawt tea hming ziak kan awm. Mizo hian hming hi hmeichhia leh mipa hming nei hrang loin kan inhman pawlh thei vek a, a tawpa I leh A hi hriat hranna chu a ni, thil chhuanawm tak, hnam neih ve miah loh nia ka hriat vei nen kan bân titih ta mai. He chhinchhiahna ang hi Khawvelah hian nei an awm ve awm pawh ka hre lo, Hmam dang hi chuan Hmeichhe hming leh Mipa hming chu shi te, ba te, te bah te a ni bawk. Keini hi chu I leh A a ni tawp mai a, chhuanawm ka tih tehlul nen B. Khiangte, L. Punte tih mai maia thlalak chuan ka ui tak meuh thin. Hawh u, kan laiah hming theuh hi i hmang vek ang u, a tawpa mipa leh hmeichhe chhinchhiahna A leh I tel ngei hian. MIZO KAN SIA.