Aizawl, Mission Venga seilian e ti loin, lehkha zir zawm zel ve ta lo na na na chuan hlo thlawh mai loh chu tih tur dang awm hek lo. Ka nu hi, kut hnathawh lamah chuan hrat khawkheng an tih hi a tling awmin ka hria. Lo hal zawha nipuiin hnahpui a chhuah hma atang hian hlo kan thlo tan mai thin. Mission Veng hian lo tur ram kan nei zim em em a, kan neih chhun nia ka hriat chu Vailui (Mission Veng leh Khatla inkar lui) leh Mission Veng leh Tlangnuam inkar lui - Sakhisih/Luipui, chumi lui pahnih kar cheh mawng lam, tuna Jubilee Biak In thlang deuh atanga chu lui infinna thleng chu ni mai awmin ka hria. Thingtlang angin kan hna lak a na lo a, tin hnih hmun nei chu a nei zau pawl kan ni mai awm e. Kan veng ram a zim em avang chuan kum khat bawhah kan fai pak zel mai. Chuvang chua Maubawk ram lam hi kan bawh deuh ber thin, khung di-hmun-zawl kan tih vel, tuithum kam thleng thleng khuan, Buhchhun pawh Maubawkah kan pe fo mai. Ka nu chu lehkha zir miah lo (sikul lut lo) a ni a, a hming hi a ziak thei tawk a ni. Chhiar erawh chu mission sapte zarah a chhiar thei ve nuap nuap a. Chuti e ti lo chuan nau chharte chu a thiam ang lawi si. Kum 1947-a lo min neihpui hmasak ber chuan Maubawk ram, Vailui kam, arlei piah deuh hnuai ram parh tha deuhah tin hnih hmun kan vat ve a, mau fek hmun mai a ni bawk a, a kang tha phian a, mahse nipui a tla teuh mai a, hnahpui a chhuah hma atangin, “Kal rawh le,” a ti mai a, a pawhin kan pawt ngar ngar mai. Thlam te ka la sa ngai der si lo a, kan ri pa, Pu Lian ketea (tiang pahniha kal thin) thlam chu ka han entawn thin a, thlam ban hi bang pawn lama awm vek thin a ni tih pawh ka hre ngai lo. Buh seng hunah a lo rem thlap mai a lo ni tih chuta tang chuan ka hre chauh maw le! Thlan ban turte chu ka zo tawng tawng hi ka pu khawm a, ka nu chuan, “I hah mai mai, a ngai lo,”?a tih pawhin a chhuat sang vei vawia thengthaw deuh taka sak ka tum tlat avangin sei tak tak ka pu khawm ruih mai. Engtin tin emaw nalh fahran lo, nghet deuh chuan ka khawr pum ve ta nge nge a ni. Mak ka tih em em mai chu - kan ri pa, Pu Lian ketea kan tih mai te kha, fa nei lo, nupa chauha khawsa an ni. Ei zawnna dang an neih loh avangin lo an nei kum tin thin (Mission Veng bik tan - Partlani te in khu an in hmun a ni). Chumi kum pawh chuan ka sawi tawh ang khan kan inri a, ri chin hriat nan mau kan kham a, anni ai chuan kan thlo fai hneh zawk daih a. Tum khat phei chu hnuhhram an thlawh hneh loh avangin tu tute emaw tlawmngaiin an pui a, chumi tum pawh chuan nipui chu a zam titih tawh nghe nghe a ni. Kan ri kham chin buh chu lang thei khawpin a inthat hleih tlat mai a, Pu Liana te buh chu a dum no hlep mai a, keini lam buh chu buh pangngai mai a ni. Ka nu hnenah hian ka zawt thin, “Kan lo hi Pu Liana te lo aiin kan thlo fai daih zawk si a, engati nge hmuh theih khawpa buh hi a inthat hleih le?” tiin. Ani chuan, “Fanauah malsawmna an dawng lo a, buh leh thlai lamah Pathianin a malsawm a nih hi,” tiin min chhang mai thin. Mak tak a ni. Buh seng a lo hun a, ka nu pek chuan riahchilh a ti nget mai pek a, zing khawvar hlim, khaukhuap pawh an la khawng lai atang hian kan bung dun thin, daiin a tihhuh avangin thlam tlaitlanah te, thlam kawtah te kan pho hul te te thin. Hna rum ka thawh nasat vang ni maw, hmarcha hi ka ka-ah thak tawk a awm lo, pum hnih pum thum hi ka hmawm rual mai thin. Ka pa lo pa lo feh ve chang hian, “Em em a,”?a ti hlak hlak thin. Buh lak lai chuan kan riah tak avangin nula rim ka thulh miah chuang lo, ka ngaihzawng in lama a awm leh in lamah ka rim a, ram a riah leh (Damdiai kamah lo an nei ve bawk a) ram lamah ka rim tho mai, thal lai a nih vang ni maw, a thim tehchiam pawhin ka hre lo, kawlphekhawnvar ka nei lo a, meichher ka chhi ngai bik lo! Dan naranin kan thlam ka thlen meuh chuan zanlai a pel ngei ngei tawh thin. Ka nu khan a hlau ang tih nachang pawh hre lo khawpin ngaihzawng neih ka tina a ni ber mai! Thlam kawtah fasuar rinawm tak, hlam hnih aia hniam lo siam ka tum a, thian thate leh nula tlangval, duhtawkte kan suk pawh dawl tura siam ka tum a, vaua rawnal chu a sei thei angin ka pu ngat ngat mai a, a banah pathum zel ka kawp a, sang vei veiah a chhuat ka siam a. Ka pa’n a han hmuh chuan a thin a rim lo chauh maw le, “Em em a, hetiangin tuman fasuar an siam rinawm teh tlut ngai lo,” a ti hlak hlak mai. Ka tum a hre si lo! Tichuan, buh chil ni chu a lo thleng a, ka thian tha zualte leh ngaihzawngte nen ar kan phur thla a, fasuarah chuan kan han chil a, 4/4-in inkuahin kan han chhir bial vel a, a phawk zualin buhpawl an han chhir/pir kual vel a, chhip sam lamah buhpawl a kai phung mai a, chuti chunga hlim em em leh dim baksak loa nulate nen inkarthlaka inkuah chunga kan han chhir bial thinte kha - Zawra (George)?pawh khan ngai chuang bik lo! Kan let tawp tawp mai a - nuam tak a ni, nuam tak. Tin thum dawng ema tehin phur 40 kan thar ve a, kan lawm kher mai. Ka fasuar siam pawh kan su chim zo miah lo reng a ni, tlem chuan a awn deuh chauh a ni. Lo neih hi hrehawm ka ti em em lo. Buh phurh hi a hahthlak em a, hah lai tak tak chuan kan lo thar tam lu deuh em ni aw tih erawh a awl deuh, thahnemngaih nachang hriat hma a ni bawk a. Khang hunte kha a lo kir leh tawh dawn si lo a, buh min chilpuitu ka thiante lah kha - ka hriat sual loh chuan pakhat chauh a dam tawh nia. Thiante u, mahni lenlai ni theuh kha a ngaihawm ti tawh u.