Whatsapp group khawi khawii emaw hian thiam lo chung chungin ka inrawlh ve a, nuam ka ti phian lehnghala, mahse ka tel vena member te hi hi chuan min ning viau mai thei. Chung ka tlana group khawii emaw laiah chuan Thlahrang/ramhuai hi an sawi tak ang reng khawp a, a ngaihna pawh kei chuan ka hre ve lo. Ka dai zim ni maw, Keimah hi ramhuai ka ni anga hmuh tur chuang a awm lo ni maw, min hlaua an inlar ngam lo ni maw, inlar tur hian ramhuai hi a awm lo ni maw, a lem ni maw? Kan naupan lai ti ve tawh mai ila, kum 1937-40 vel kha em ni ta- Aizawlah hian Thlahrang (1) Thlahliana farnu Aizawl Civil hospitala thi an tih nula chu Sairang kawngah khuan ‘Ka U Thlahlian’ tiin a tap thla vak vak thin an ti. Thisen a pik puat puat te an ti. Naupanga thu chang kan ral hlauh ve khawp thin. Sairang -Aizawl kar a bawngtawlailir khalh thinho khan an hmu thina te an tia, an sawi rapthlak ang reng thin khawp mai. (2) Reiekah khan Luttea thla a hrang a, in riak tlangvalho te mu lai pawh bawnghnute tein a theh thin tih an sawi vul hle bawk a, inriak tlangval pawh an ti hle niawmin an sawi thin a, chu pawh chu 1937/39 vel lai kha a ni ang. Kum 1962 atang khan Reiek lal fapa, Lalzarliana Sailo (L) nen clerk hna kan thawhdunnaah chu thu hlui chu ka sawi chhuak a. A ni chuan tih mai mai a nih kha sawi vak chi pawh a ni lo a ti hluka, kan reh ta mai. Hmarkaii Nu Veng (Aizawl) ah sawn thawk khat lai, kei chuan ka hre pha lo, pa ber thihnain ah thlahrang a che bawk a ni awm a, ka pa (Ch. Pasena) leh Pa Saitawnan fiah an tum ta niawmin ka pa in min hrilh. An sawi tlangthan dan chuan an pa ber a thih tak avang chuan dan pangngaiin tlangval an riak thin a, (tunlai hian tlangval khawhar inriak hi in mumal ta lo em a, khawsak dan a dang ta a, hmanlai chuan a zualpui pawh hapta kar khat te chu an riak ngei ngei a, a rei fal 5/6 te chu kar 2 kar 3 te, chu aia rei rei pawh an riak thin.) Chu khawhar inah chuan tlema a rei deuh atangin an pa thlahrang emawni chuan lungin zan khatah vawi hnih vawi thum a rawn vawm thin a, chu in chu di in a ni. Tlangval inriak te pawhin an fiah hlei thei lo niawm tak a ni. Ka pa min hrilh danin, a thian pa Saitawna chuan a ring bau lo mai sia, zan khat chu kan pahnihin kan va kal ta a, pa thlang lamah, inhlat deuhin kan thu ta a a ti. Zanlai velah chuan lung a lo tla a, An nu chuan ‘Chu’ a han tia keinin khawiah nge kan ti a, “Zem bul lamah” tiin min chhanga, kan han zawng a, lung chu a lo awm ngei a. Kan thu leh vang vang a, khawvar hma chuan a ri leh rak a, an nu bawk chuan ‘Chu’ a ti leh a, keinin ‘Khawiah nge?’ kan ti a, ‘Kawmchar lamah,’ a ti leh a, kan va en chuan lung chu kan chhar leh a, lung ngei a ni si a, kan hrilhai ang reng khawp mai a, kan hawng ta a a ti. Ka thianpa Saitawna kha a beidawng duh der lo mai a, thlahrang a nih a ring thei lo tawp mai a, mahse lung 2 kha chu a lo tla ngei a, kan kawl ran mai bawk si a, thil awm dan chu a ngaihtuah a ngaihtuah a, a tawpah chuan, ‘Pasen, tirawh, i zirtirtu trainee zawng zawng nen hian zan khat chu i va kal leh teh ngang ang,’ a ti a, Tichuan, Zirtirtu trainee zawng zawng nen chuan kan thawk leh ta a. Mi kan thahnem bawk a, pawn lam kawmchhak, kawmchar, kawtah te kan thuttir a, inchhungah pawh an mutna khum sirah te nen, zem bulah, kawmchhak, kawmchar, kawtah te kan thuttir a, inchhungah pawh an mutna khum sirah te nen, zem bulah, kawmcharah te kan thu thluah mai a. Saitawna nen chuan pathlang lamah bawk, inhlat vak loin kan thu leh a, chuti khawpa mi kan thathnem tak vang chu ni maw, thlahrang pawh chu a reh vang vang mai a. Kan ning hlawm khawp nghe nghe zawk a, mahse thawm reng reng a awm thei si lo. Zanlai pelh fe hnu chuan Saitawna chuan ‘Ka zun a chhuak’ tiin pawnah a va inthiar a, a lo lut leh a, kan thu leh ta vang vang mai a, zing dar thum velah chuan lung a lo tla leh tawp mai a, In neitunu chuan ‘Chu’ a’n ti leh vat a, ‘Khawiah nge?’ ka’n tia, ‘Ka hre lo’ tiin min chhang ta a ni a ti. Tichuan khua te a lo vara kan hawng leh ta a, Saitawna chuan a prove ta a ni a ti. Eng dang vang a lo ni lo a, tlangval in riak zinga pakhat nen khan kha lusunnu kha an lo induh niin, inriak dang tihthaih nan khan inneitunu chuan lung hum lutin, khum atanga khan ditip lamah lung kha a vawrh thin a lo ni a, chuvangin lung thlakna lam kha a hre zel a, Saitawna zungin lung a rawn hum luh a vawm chhoh ve kha chu kha lung tlakna lam kha a hre map lo tih kan prove thei ta a ni tiin min hrilh nia. Mi tam tak sawi dan chuan pa ber thihna nu ber la valai deuh inah hian pa ber thla a hrang duh an ti chawk mai. Inriak umdarh kha a tul ni tur a ni. Ka hriat sual loh chuan Hmarkaiinu Veng thlahrang, lung vawm ching pawh khan Inneitunu chu nupuiah a nei ta nge nge an ti.