Zalen chanchinbu pawh hnaih lam (fly) hi a vanduai nge keimah zawk hi tih pawh ka hre thiam ta lo e, a phek sir bik hi a chuar titih bik emaw ni lawi ni, thumal lang kim ve thei lo a awm thla thluah zel mai a, hmun tam takah phei chuan ngaihruatna pawhin a chhuidawn hleih theih loh a nih hi. Chhiartu thahnemngaite’n min rawn hrilh/zawt a, a ngaihna ka hre bik si lo. Ka beidawn tawpah chuan ka tawp tawp mai ang chu ka ti ta mai mai a ni! Tum tum chu tawng kauchheh pahnih ka’n chawk hiar teh ang. Aizawl mi upa lam chuan in hre chek ang a, tuna Chanmari West kan tih khawi i emaw lai saw HMARKAIA NU VENG tia kumkhaw kha leh chen ka lo lam ve thin (Aizawl chhim lam mi tam tak pawhin an lam) kha kumin September thlaa kan komiti-naah HMARKAII NU VENG alawm an ti ta mai a. MAK ka tia sin. Amaherawhchu, Hmarkaii Nu Veng hi ka’n lam ka’n lam nawn a, Hmarkaii tih leh Hmarkaia tih hi Nu nen lam zawm chuan a lo inhnaih thei em ni ta berin ka hria. Tunah chuan a veng hrim hrim a awm ta lo a ni. He komitinaah bawk hian October ni 19 khan ROTEKAWLA SEPA tia min tam takin kan lo sawi thin hi ROTEKAWLA SEPUI a ni an ti leh ta tlat mai pek a. Rotekawla (Sakhawliana tih thluka lam tur) leh a thlahte hi Kanghmun khua khu an lo ni awm a, zirtirtu pakhat ka zuk phone chuan - “Tunah hian a tupa kum 90 mi vel leh a nau leh an farnu pawh an la dam a, kum 83/84 vela upa a ni tih tun thla laihawl vel khan min rawn hrilh ta mai. Kum 86 ka ni ve tawh a, ka hriat tirh ata Rotekawla sepa ti vek niin ka inhre hlawm a. Ka thutpuite pawh chuan ka hriat dan ang bawkin an hre ve tho a ni. Chu mai pawh a ni lo, Rotekawla sepui ti hi kan la hre ngai hlawm lo a ni. Tichuan, Kanghmun zirtirtu pakhat, Pu C.Lalduhawma chu ka zuk tahawh ta ngawt mai a, Rotekawla thlan lung leh a sepui lung-phun thlalak min rawn thawn ta tawp mai a. Hei ka rawn tar chhuak e. Rotekawla thlan ziak hi a chiang tawh lo hle, remchangah chiang zawka min hrilh turin ka ngen ang. A sepui hriat-rengna thlalak hi Pu Zoliana Royte, Retd. Director hoa 11-9-2010-a phun a ni a, hei pawh hi a thu a chian meuh loh avangin, a chhiar theih ang angin ka rawn ziak e: ‘Rotekawla sepa (Rotekawla sepui tih zawk tur) Rotekawla hi Suakpuilala Sailo, Manga thlahin Kaihkawn a awp lai (1866-1886) hian kum 20 mi a ni. Tuna lungphunna hmun hi Rotekawla in hmun a ni. Rotekawla hian sepui fing tak a nei a, se rual dang fin duh lovin se rual zinga mi la hrangin an tlat lohna lam apiangah a tlatpui thin. Kanghmun zawlbuka Upa thukhawmte’n ram chhuah nikhuaa hotute thurel ngai pawimawh lova, ro hran neih tum tlat an awm hian upaho chuan, “Rotekawla sepui ang mai, ho hran neih tum reng mai” an lo ti thin a ni. Lungphuntute MUP UNIT Kanghmun Zoliana Royte, Director Sports & Youth Service, Govt. of Mizoram Dt. 11th Sept., 2010 Kanghmun Rotekawla hriatrengna lungphun zawk hi chu a chiang lo em mai a, a theih chuan Pu Duhawma tanpuina ka la dil leh ang a, thir zumin emaw chhui sela chhiar theih a ni mahna. Hun dang atan i dah tawh ang. Mak ka tih erawh chu kum kha leh chen kha SEPA kan lo ti a, SEPUI ti reng ka hre ngai lo hi a ni. Awle, independen tumna lamtluang lam kha i’n hrut leh teh ang. Mashimpur Concentration camp kan zuk thlen chuan kan hmaa thawn, hmelhriat - Thanhawla (tuna CM) te, J.Thanghuama MDC te, Dengchhuana Kulikawn unau thum te, U Thangdela (Lalhema & Sons) te, Ex-Jem. Lalsanga te, C.Dorema te, Ngurhuzaua, Kulikawn te, Thankima leh LCHNA te unau (Pa Lianbuka fate), KuluSingha te, Nithanga, Dawrkai Veng te, leh mi dang thahnem tak an lo awm tawh a ni. Sipaiho kha an vin em em vek mai a. KA TI leh dek Thin tih ang mai kha kan ni ber. Tlai khat chu ‘Naktukah kel kan talh ang a, in ei dawn nia’ an ti a. Chumi zan chuan TE RAWNG RAWNG thawm hi kan hria a, kan ei tur kel chu an talh ta mai em maw ni le te kan ti vel a. A lo ni ikhaw lo mai a, an chawchhum (?) an vel lek chu lo niin! Kha mite kha anmahni inhrem pawh an tina khawp mai. A tukah pawh chuan rawksaiah lungtum rit tawk an ahtir a, an tlantir ngat ngat mai nia. Kan zuk thlen ve hmain camp hualin, tangho chu an utawk sawhtir a ni awm a, U Thangdela (Lalhema & Sons) phei kha chu pa dul nei tak a lo ni bawk nen kha - a bai hlen phah ta niin ka hria. Kei hi hyder-acidity nei, englai pawha soda emaw, Digene tab ak reng ka ni a, Aizawl Thanaah police-in ka Digene tab min chhuh sia, zan khat chu ka pumna a lo chhuak a, U Lalsanga te’n vut an thlawr chawp a, kha zan ang khan ka na khât hle a ni. A tukah Lalkunga, Sipaiin a ngum an vuak khik nen Silchar Civil Hospital-ah min va hruai a, kei chu military camp hospital-ah min dah zui a, Kunga erawh chu a hnute zawn vel atanga a khup thleng deuhthawin an plaster khawng tlat mai, zun ram thiar theih nan a kap an tikaw ringawt a, thu ni chiah si lo, ding ni chiah bawk si lo hian an cher khawng tlat mai a, a malpuiah “thla thum thuam tur” tih an ziak lehnghal a, a khawngaihthlak teh asin aw (Mahse, kan chhuah hnuah Bethlehemah a lo awm ve a, mi pangngai ang thoin a dam leh a ni).