Zirtawpni, October ni 14, 2014 khan I&PR Auditorium-ah All India Radio, Aizawl-in P.S.Chawngthu Symposium a buatsaih a. Chutah chuan a unaute leh a tu leh fate min sawm ve avangin kan kal ve hlawm a. Chutah chuan a chanchin Pu Darrokima'n tlin tak maiin a sawi a; tin, zaithiamte pawhin a hlaphuah thiam takin an sa bawk. Chawhnu dar 2 atanga tan a nih avangin, a thlasik khua tawh si a, hunin min daih lo lam a ni. Master of Celebration P.L.Liandinga'n hneh zet maiin a kaihhruai a, a chuti zawk mai nghe nghe a ni. (Darrokima kha PU ka'n ti ta mai a, tun chinah chuan a nih ang angin mi dang pawh ka sawi mai mai dawn a nia). P.S.Chawnthu tih lo chhuah dan hi chiang (chiangkuang ni loin) deuh zawkin ka'n sawi ang e. A laiah hming chu Pahlira a ni. Puitlin thlenga dam zingah U pahnih a nei a, a pathumna mipa bawk a nih avangin piang leh tur chu hmeichhia a nih tawh nan tiin PAHLIRA an sa a ni (mahse, keini chhungkuaah a dik lo hle, a chhang linaah hmeichhia a piang chauh a ni!). A cher em avangin Sena tia koh vek a ni ta a, tun thleng hian K'u Pahlira ka ti thiam thak lo, a hla duu mai! A chhang hnihna ka ni na a, kan inkara mi naupan laia a thih avangin inchhangbung ang maiin kan awm ber. K'u Sena hi a tet deuh lai pawhin lehkhabu eng eng emaw chhiar reng mai a ni. Shillong-ah Earle hostel-ah awmin high sikulah a kal ve a; mahse, pleurisy (chuap natna) a vei tak avangin matric pass loin a lo hawng ta a ni. Mipa rual kan ni bawk a, kan ninhlei (inhlei ni loin) bawk a, khang hun lai kha chuan chini te ei phak hek lo, kurtai hi a ni ber mai a, ka nu khan a chang chang a lo thlang thin ni ngei tur a ni. A vit phel nawi duh lo a, choka almirah-ah kan dah a, a lut apiang hian a ki lai kan keih-thla a, a mum talh talh a, puansukna sabawn tlang tiah vel a nih tawh chuan a mum tha em em tawh mai a, a ki lai, dih thlak tur hi a awm tawh lo, ha-hmai hlai 2 hnu hi a inrin bel tul mai a, chuti chung chuan kan dit reng tho. K'u Sena chuan chutiang chu a ding hum a (veikhawr a ni), a vei lamin lehkhabu eng emaw hi a chhiar a, dap phah khumah pawnpui tel a delh a, kurtai dih pah chuan a chhiar reng peih nia! Eng eng emaw hi a ngaihtuah a, 'Diktawn hi tawn ila, chhun reh laiin kawng zawh ila, kan tawh hmasak ber chu kan nupui tur an ni,' tih hi tute emaw sawi a lo hre ve ta a. A tawn ve ta a, biak inpui lam kawngah a kal ta a, tum loh deuh maiin Lianzoa pi (Sande sikul zirtirtu Pu Zalawra pizawn) a tawk hlauh mai a, a lungawi lo em em mai a, a lo hawngin a rawn report a, Diktawn a tih ve chu Sakhituipur a lo ni! Khrismas tawh phawt chuan thleng kan dawh thin (24th december zanah). Tette atanga dawh kan nih avangin ngaiah kan neih a, lian fe fe kan nih thlengin kan dawh thin. Mipa rual na na na, a tho hmasa chuan a tho hnuhnung thlenga ei tur eng emaw in ei ruksakte kan ching a, Khrismas zing chuan kaihthawh kan nuam teh a nia! Khrismas dawn pawh ni hawt loin tum khat chu thleng, a chhun dawh ve rawk mai a, a mu ta a, a thawh leh meuh chuan ka nuin khawihnun (mombati ang deuh, khawithlar atanga an siam chhawn leh a ni a, hmeichhiain an puantahna hmanrua zut nal nan an hmang ber) a lo dah bul mai a ni awm a, a lungawi lo nasa mai! Shillong atanga a lo hawn hnu chuan a tleirawl chho ve tawh si a, kan kawmchhak Pi Zaii boarding (chawm in)-ah hmeichhe sikul kai, thingtlang nula hmeltha tak tak an awm thin a. Pi Zaii kha a thikthu a chhe ve bawk, tlangvalho lah, khatih lai na na na chuan nula rim zan tin an ni si, boarding nula rim ruk chu an hrat khawp mai a, chung tlangval zingah chuan K'u Sena chu a hrat pawl tak ni awm tak a ni. Min hrilh nual danin tum hnih tum thum chu tlanchhe hman loin, an almirah lianah an thukru a ni awm e! A nih loh chuan thlang lam tukverhah an zuang thla a, an tlanchhe mai thin a ni awm e. Chung boarding nula rual zinga pakhat nen chuan an lo inngaizawng em ni tehreng - nula chuan love letter a rawn thawn a, K'u Sena'n a thlauh palh em niang, ka pain a chhar hlauh mai a. Red & Blue pencil ngei maiin mark a pe a, 90% a pe niin K'u Lianin min hrilh a, a lukham hnuaiah a dahsak leh hmiah mai si a, hapta khat dawn lai chu kan meng rah rah hlawm mai! Chu a ngaihzawng chu 'Sakhmelah zawng kan indi e, ka dil ngam lo ngur chawi i ni; a riang val ka tahna tur rengan, i piang Khuanu hualin' tia a phuah tak ni. A hla phuah hmasak ber a ni awm nghe nghe asin! A phuah chhan nia ka hriat kha a dik chuan a HMELTHA THLAWT reng a ni! La dam tak maw? Hmangaihte na na na tan chuan hla phuah thiam ve ta riang ruang chuan nalh taka phuah pawh a awm e. Mak ka tih fo erawh chu U te an ni na vang vangin Sialsuk khua, a la tlawh ngai hlek loh, ka pa'n lehkhaa a zuk hrilh mai heti taka Sialsuk khuaa cheng ni awm taka a phuah thei hi a ni. Ka'n ziak chhuak ang a, Sialsuk khua leh Sialsuk tlawh tawh thinte chuan in hre uar thei ang ang: 1. Awmhar hnema tlai tla engah, Chaih tlang chuanin ka thlir..... (Chaihte tlang) Dar ang an leng rualduh kimin; Sial zopui mual an mawi. 2. A tlang khanthuam mual lian zauah, Hnahnem katchat karan; Thiam zir naufa hlimten lawina, Thaikawi run lian ngir e. 3. Siktui daifim damten luang del, Thingsaingal thiang karan; A mi leng zawng ruang tin bualna, Leipui sang dawhna hnuaian. Thunawn: Chei chuan ngai lo, Khuanu leng siam, Tuk ram par tin bawm hi; Vanhnuai mi hril Sial tlang sang lur, Leng zawng par ang vulna. A laiah hming chu Pahlira a ni ka tih tawh kha - Air Force atanga a tlanbo khan rei tak chu a chinchang kan hre lo a. Kum 10 emaw hnuah Karachi (tuna Pakistan) atangin lehkha a rawn thawn a, PHILIP SIENO CASTELLO tiin a rawn inphuah a, heta mak ka tih leh thin chu ngaihtuah lawk vekin a inphuah em ni dawn tehreng chu P.S.C. chu PAHLIRA SENA CHAWNGTHU tiin a siam rem leh thlap mai. Hei hi a thih hnua ka ngaihtuah chhuah chauh a nia, la dam nise la chu ka zawt tur, a theih tawh si loh. Ngaihtuah lawka a inphuah nge, a lo remchang tlang ta mai mai, hriat ka châk thin. A ho angreng khawp a, a Padmashri hmuh ve te kha chhungkuain kan lawm tak pawh ka hre lo, a ui vawih ngawihpui mai mai a ni.