Tar alamah Whatsapp in tih hi ka ninhleiin khawi khawii group group-ah hian thiam leh thiam loin ka inrawlh ve a, a thente phei chu chhiar theih pawhin va chhuah suh i! MAHSE nuam ka tih zawng tak a ni lawi si. Heti ang khelhna chi phone hmai hi ka duh aiin a zim a, ding lam zungchal hmawr hmang ka ni sia, ka chhut tum ding lam a hawrawp hi a lo inchhu leh thin. Entir nan W aiah E, E aiah R. Chuti reng reng chuan ka chhu mai. Type writer ha ang vela in-hlat hi ni se a ziaawm tur! Private chhiar loin 20 dawnlaiah ka inrawlh ve e ka tia, type thiam vak lo mah ila, nuam ka ti tlat sia, whatsapp thiante hi mi thiam pui pui India ram pawna mite pawh an ni awm hlawm e! Awmna kan inhrilh hlawm si lo, kan hming hlawm lah chu kan duh duh kan inchhal ni maw te ka ti mai mai. Inhre mah suh ila, kan inkawm thin sia nuam ka tih zawng tak a ni. Ka type thiam ve zo lo hi a pawi ka ti ber. Tu emaw ti mai ila, Ni 12-10-2017, Vanneihtluanga pianchamphaphak ni tak mai khan, Duhtea Hnamtea inti hian, hla, a tlar bul ber hawrawp chhuk chhiara Chhuanliana BVT tih hi hla-thuin a rawn phuah a, ka chhuang em a, hei ka rawn chhu-chhuak ve ngat a ni. Mahni huang atan chuan a lua lo ang chu maw ka ti mai: Chhingkhual kar hla sakhmel ka tawn hmain, Hai ang tar, a sakhmel chhawl ang uai hnu, Hringmi hrai chawi hei ang awm maw e, Unau hmelhai lah ni si si lo hian Annem sihhawn biahthu min lo hlan le! Nang ang reng Khuanu malsawm awm ang maw? Lunglam vaiin ar bo zawn changin, I ankain hai ang min thang leh si; Annem biahthu hlan ban zai relin, Nau ang nuarin hnutiang chhawn mai lo la; Ami leng tan i thiam leh finna hlan zel ang che. Biaklai Khuanu’n zah ngai mal tin sawmin, Van hnuai hringmi zaleng zawng tan; Thliah loh te'n vul zel nang che. Whatsapp-a kan thu inthawn dan hi ka ngaihtuah nasa ve thin. Thenkhat hi chuan uanthuan nana hmangin, Mizo hawrawp pawh hmang tha duh loin aw aiah O, Z aiah X tih ang reng an hmang a; nimahsela, tam tak hi chuan Mizo tawng an zir thiamna hmun tur a ni tih hria se an uanpui ka ring thei lo. Private-a an thian kawmngeih ngawih ngawih te an biak fiamnaah erawh chuan thuhran. Whatsapp hi thangtharin zo tawng an zirna (ziak leh tawng an zirna (ziak leh tawng) a nih avang hian uluk taka an hman hi ka duhsak tak meuh hlawm mai. Lehkha thiam tak tak, naupang tak tak si, Professor, daktawr, tih ang reng an kat nuk niawmin, an thu ziak atang hian ka hmu a ni. Mizo tawng hi tawng harsa tak angin lang lo mah se, thu inzawm leh zawm loh lamah hian a ram buaiin kan buai ni ber te hian ka hre thin. A chhan ber nia ka hriat ve chu, thumal kan nei tlem em em a, kan thumal (chu pawh chu thu 2 zawm khawm a nih chu) Amah kan nei a, erawh kan nei a, chu kan nei bawk a, chu thu awmze nei sa 3 chuan AMAHERAWHCHU kan nei leh ta a- zawm tur nge, khawii chin bun tur nge? Sapin Beef an tih mai ang hian Bawng-sa ti loin thumal hran hi nei ve ila chu zawm/zawm loh ah kan buai nep ngeiin ka ring thin. Keini chu hrilhfiahnain kan tawng a- Bawng sa- Meat of cow tiin, ‘paran’ te lo ti tawp ila paran a ni kumkhua mai tur. Heng vang hian kan tawngin harsatna nasa tak a tawh phah niin ka hria. Zawm leh zawm loh hi kan kumkhaw hri tur a nih awm hi maw!