Tunlai thangtharte vanneihzia leh nihlawhzia hi, kan naupan, tleirawl chhoh ve laite nen ka khaikhin hian an an vanneihzia hi an hre mang si loa tiin ka ngaihtuah thin. Chuvangin, chhiartu tuten emaw an pi/pu/nu leh pa, kum 70 chung lamte an duat zual zawk theih nan tiin hmanlai (ti ve tawh mai ila) kan khawsak awlsam lohzia ka rawn ‘KA HUANG’ tawp mai a nih hi: Kei hi chu Mission Venga pianga seilian ka nih avang leh hmar lampang (Dawrpui/Chhinga veng vel) lam khawsak dan tak ka hriat loh avangin keini Aizawl South lam nunphung ka rawn ziak a ni ber mai. Ka sawi hun lai hi 1935-1950 inkar vel a ni ber ang chu. Chhiartuin hria se ka duh phawt chu Motor, Tui connection, Electric, Gas thuk, Septic Tank, motor cycle tih ang reng hi a awm lo a, motor chu jeep 2/1 leh truck (a lu tawi) 4/5 vel chu a awm ve chauh tih hriat hmasak nise. Tui hi a vâng em em theuh mai a, tunlaia nula pakhat duhtawka a inbualna tui hman hi, ka sawi lai huna chhung khat hman aiin a tam hialin ka ring thin. Mission Veng chuan kan tui tlan chu - Darnam (Vai lui hnar kama awm) leh Sakhisih (Luipui hnar kama awm) a ni ber mai. Tui-um leh khawnvartui tin hi tui chawi nana kan hman ber chu a ni. In lamah a chhun khawlna tur tuibel te emaw neih pawh thil awlai a lo ni lo lehzel a, tui um 15 vel leh K.Oil tin pahnih vel leh mahni bel liana kan chhun khah pam lai kha kan tui ngah lai a ni ber mai. Pa khawsa thei deuh chuan Tui-bel fit 3-a sang, fit 3 hawlhtlang an nei nual bawk a, thallaia chutiang bel nei khat liau thei reng chu awhawm tak an ni. Ni tin insukte chu khawi lam - Chawlhni atanga Zirtawpni thlenga kan hak balh kha Inrinni hian suk tur kan vawm khawm a, tukthuan eikhamah, puan hlai deuhin mipa chuan kan ak a, nula awmna in chuan emin an taw-tawn lawih mai a. Puan sukna hi luiah a ni mai, kan veng chuan Vailui, Hmeichhe veng nen kan inkar lui hi kan chhawr ber a, mahse, reserve ngaw kara mi a lo ni bawk nen, a vawtin a dam riau mai a, Chawlhnia hak tur a nih hlawm avangin Hmeichhe veng lam dep luikam sang deuhah te kan pho thin! Inrinni chu chhung tin insuk ni a nih avangin hmun chan loh hlauin kan kal hma hle thin. Mission Vengthlang kawn zawn chhak hretah khuan hmun kang deuh lai a awm a, Tiaupho kan ti mai a, chulai chang chu kan vannei hle a ni mai. Chu luiah chuan insuk zawhah kan inbual a, chu chu kan kar tin inbual dan a ni tlangpui. Nula lam erawh chuan an inchawi chawp a, zanah inchhungah an inbual deuh ber thin. In kan han thleng a, kan puan suk a ro hman lo ang tih hlauin a kang lai laiah kan pho a, kan vil deuh reng a ni ber. Chawlhni zing a lo thleng a, Istiri, meihawl thin ngai ngat mai, suankang ngei maiah khan meiling tlem kan han thun a, meihawl kan vur a, chhemtheiin luhai burin kan chhem a, chu chuan kan nawt thin. Vankunga (Pastor Chhuahkhama fapa) nen phei chuan kekawrtlawn hi kan zut mar a, awngphah hnuaiah, nawn dan ang zaihin kan phah a, kan delh mar chawk thin. Istiri-a nawh hi meiling/meihawl ngai a nih avangin a remchang fo lo thin a ni. Tui chawi lam chu, parual chhung kan ni a, kan hmeichhe hmuh hmasak ber chu 1934 December-ah a piang chauh a ni. Chuvangin ka nu kan pui lo thei lo. Um khat pu te, um hnih khirh te, um thum khirh te kan ni nawk mai a, kan in, tuna Hmeichhe sikul hnuai mai a ni si a, Darnam emaw, Sakhisih emawa tui, zo tawk han khirh nal nal mai chu a hahthlak kan ti thei teh a nia. Thingtuah tur lah phurh chawp a lo ni a. Kum 1940 hma lam kha chuan thingfak 40 cheng khat ni tain ka hria. Forest reserve a zau si a, thing phurhna a hla thei khawp mai. Hun tam takah chuan Forest reserve chhunga mi kan ru ve thin. Forest Guard Tiangtiala te, Vunga te ho kha kan hlau thei teh asin. Zing mei chhem, a, thuk mei thi vek tawha kan han tihnun hrim hrim kha thil nuam a ni lo. Khawnvartui hman phal a ni si lo, phuai kan siam a, nawalh - Horsehead bawm khat 60 sticks - pawisa 2 man kha kan nei ve thei tawk a, a chang leh thenawm mei kan chhi thul, tun lai nena khaikhin ralah chuan tunlai khawsak dan hi chu Vanram tla fual a ni hawin ka ngai thin. Ka dailen zawha ka’n flush apiang hian ka ngaihtuah loh theih loh thin chu, “Hei, Pathian zarah 9 kan khawsa a, kan daikala kan tui hman hi, Mission Veng kan awm laia kan chhungkaw ni khat hman ai khan a tam mai awm mang e,” tih hi zuk ni ziah a! Tunlai hi chuan thangtharte u, tlai ber deuhthawah in tho a, thil awmsa vek in hmang a, meichhem lah kan hmet hleka a alh mai a, istiri a nih leh kan hmet leh mai a, a sat dan thlengin kan control thei a. Tui a nih leh tap atangin kan herh hawng leh mai a. Kan inbual leh tui tihlumna kan hmet leh mai a, a phingphisiau kan duh leh kan hawng leh mai a, khawii-ah emaw in kal dawn leh scooty, bike, taxi, car-a chuang lo chuan in che hleithei lo chu a ni mai a. Ngaihtuah teh mah u - kum 1940-42 khan Sikulpuiah sikul ka kai a, chung lai chuan Hlimen (S) leh Durtlang leh Tanhril atangin ke ngatin asin sikul an rawn pana an hawn leh. Independent hma a ni bawk a, khatih laia kan zing dar 9 chu tuna kan zing dar 8 intih hi mawle. India a independent khan, “Darkar khatin hun kan titlai e,” an tih avangin kan thatchhe zo ta em ni? Sikul kai hma hrette thih hreh taka in hreh hlawm mai. Kumin September 1 khan tuna kan sikul kai hun dar 9 leh ni chhuah chu darkar thum leh minute 59 zetin a inhlat asin. Ni chhuah leh sikul tan kar darkar 4 hi rei tak asin. Hun awl kan ngah hian mi tam ber chu kan thatchhe belh zel niin ka ngai. Hmeichhe tam tak Chawlhni zinga buhtham khawn pawh hi an phunna tam tak chu an khawn tur chhungkua an thawh har vang zuk ni chawk a. Hawh u, thangtharte u, tan i la thar ang u, hun awla kan hman thei mai khawvar leh tukthuan ei karte hi i hmang tangkai ang u, kan hlawkna tur a ni si a. In vanneihzia leh in awlzia hi ngaihtuah ula, inlamletin hmang tangkai teh u. In inchhira hnekin in lawm zawk daih ang.