Chawlhni hmasa a, KA HUANG ah khan ka chhut sual ni lo, khawl lam pang tih sual pawi deuh mai chu DENGCHHINGPUII tia ka chhut kha Darchhingpuii tiin an rawn chhu sual tlat mai a, a laizawn la dam Bâwihtein min ngaidam se tiin ka rawn ngen a ni. Chhut sualah pawh a pawina chu a sual kha hming pangngai a ni ve thei tho si a, thu pangngai chhut sual nen a inang tlat lo. Kulikawn lamah tuan tawh rih ila, Kulikawn chu kan hre vek awm phawt a, ka hriat tirh atangin sawti deuh reng saw a ni. Mi an khawsa thei tawh a, a building lam an chhawn a, in khatah tam tak tak an awm teuh thei tawh a, ka hriat theih tirh atangin a dawrkai phei saw chu a khat tlat tho a ni. Ngaizel lamah leh Tlangnuam dam lamah leh Khasi Veng kan tih lamah erawh chuan an pung nasa hle. Dam ka han sawi a: “Dam tuikhura inbual ka phawk nia maw Ngaih tha fe in silk pawnfen a hlim a Biahthudi pawh kim ten a hril bawk a, Phawk lo hawnin a hawng zu nia le” tih hla a lo lang tlat. Thangtharte u, tui kang nghah hahthlak nawmzia te in hre phak tak si lo a, Khrismas ruai tui tur chawi te kha, tui hna a lo tlem tawh a, tui kang nghah loh theih lohah khan a remchang lai laiah meilum ai tur hnahthel ro ilo mai maiin kan han ai dar dar mai te kha a hrehawm lo teh a sin. Kulikawn hi veng dang ni mahse anmahni hriatrengna ni pah fawmin- Pu Lianzinga fate pahnih, Thangzuala (TZa) leh Tluanga te unau tlawmngaihzia leh taimakzia kha- Mission Vengin mitthi kan neih chuan a veng neitu tlangval ang hrimin an lo thawk unau thei ziah mai. Inchai leh inbuan kan ban titih tawh sia- chirh hmanga infiam te kan ching a, kan inhnawih berh vek thin- Tum khat chu an unauin Khumbeu thar an rawn khum ve ve a, chu pawh chu tlangval phawkin chirhin mam em emin an lip saka, kha khum leh tlakin sil thei ta maw? Chuti khawpa nel theih chuan Mission Veng thlanmualah an rawn kal ngun nia. Kulikawn len min tihhmuhtu chu ka thianpa Vankunga, tlangval hmeltha deuh mai a ni. Kei ka hmelchhe si, kan kal dun chuan a hmel ti tha sawttu ka ni mai! An changkang deuh a, thirsakawr chuan te kha an nula te khan an thiam riau a, ngaizel kawngah Lungpui chawlhhmun thleng thleng khan zanah an chuang thin a lo ni. Keini pahnih lah - thiam der lo. Ka thianpa chu an ngaizawng deuh bawk a niang an phur BIK thin nia. Ka chuang thei a nia aw! Kum 1949 kha Offg. LP Teacher hna kum khat ka thawk a, chuta ka thawhna hmun chu Chaltlangah a ni. Mahse Mission Vengah min sawn thla leh thuaia. Tuna sikulsen khi kan luah a B pawl atanga Pawl III thleng zirtirtu 3in kan vila. Pawl III final exam paper Mizo min entir a, Kulikawna Dr HK Thanglura fapa Lalsangliana chuan a thiam chungchuang khawpa, mark paihna tur reng reng ka hmu zo loa zirtirtu dang ka rawn a, an han en ve a thina, paihna tur an hre bik lo. A tawpah chuan punctuation vel avang khan mark 4 mark 5 vel paih mai rawh min ti a, mark 5 ka paih sak ta ngawt ringawt mai a ni. A ziak mawi si, a thiam ka ti tak zet a ni. Kulikawn tih hian ka lung a tileng hrim hrim - V.Rosiama tih ri a awm chuan Vawk hmul a ni ringawt mai a, Pu Zatluanga CI te kha tawngkam thiam turu, tum khat pawh Balhla zu a fakna a chhuah vak a, Thlumtinchhingi tiin a vuah nghe nghe a. Pa frank tak, mi pawi sawi ngai lo a ni a - tum khat chu pisa a tlai a, Head Clerk-in SDC Wiscott (Khasi) hnenah a lo put up tawh si. A va luta, a keu chawt chawta, 10 am tih an ziak ve dawp mai a niawma, Uisakawta (a hming chhia) chuan, “Tunah dar 11 pel tawh, engati nge 10 am i ziak mai?” a ti a, ani chuan, “A khai, he lehkhabu hi chu dar 10 leh dar 4 ziakna bu a ni lawm ni ka ti mai,” a ti mai a, a kal daih mai a ni awm e. Kulikawn paho kha pa fing pui pui awmna a ni bawk a, Council neih te pawh an rawt a, roreltute pawh khan an ngeih lo viau awm a sin, an hlau tlat a, Khi bazar Bungkawn atanga Vaivakawn kal thlakna a Councilthanga te khi chu Council neih tumna avanga hming rawn pu chhuak a nih khi. Veng pa fing var hmasa an ni tlat a ni. Kulikawn ka sawi hian ka tan lai, min parole laia min khawngaih em emtu J. Lalduhawma te nupa te kha, min boral san nupa ta mai sia, ka thinlung hian a theihnghilh thei lo. Shillongah khasi in luahin Rs 300/ subsistence allce in chhungkua 6 kan han khawsa a, Chakai khawrh nen, phuihnam, Ankhate, kan zawrh te kha min leisak ngei ngei ringawt mai kha a nia. Min boral san nupa leh ta mai sia. Ka lung hi an ti leng vawng vawng mai a ni.