Tutein emaw Aizawl leh a chhehvel ram loa neih dan leh a ram neitute ramri lamte han ziak teh min ti a; mahse, heti lam hi chu ka lo chiang vak lo hlein ka hria a, chuvangin tun tum hi chuan thil dang anga ka ziak pawr pawr theih loh avangin ka ziak rih (NOT hrih) lo mai ang a, hun dangah muang mara ngaihtuah theih huna ziakah ka khek ta zawk mai. Ka rilrua awm ve - ka thil tih tak loh, tuna ka ui leh em em hnuhnawh ka rawn ziak ve leh tawp rih mai:- Aizawl pahoin Tlawng khu Kahsamar (Blue Stone) mound 2 (kg 78)-in vuak an tum a, khatih lai khan kahsamar mound 2 chu Rs. 320/- man a ni. Mi pakhatin Rs. 4/- zel thawh an ti a. A kal tura te ka han hriat hian an tawinawkin an chhangchhe dawn ema ka hriat avangin tel ka tum ve lo a, K’u Zuala chuan Tlawng kal hrat ka nih avangin tel se min ti em em a, “Ka thawh kep mai ang che,” a tih pawhin ka duh tlat lo a, “In chhangchhe em mai, engmah in ang lo ang,” ka ti tlat a. A thinrim lek lek a, kan len tha chu ken a tum a. Kei chuan, “In khar thlangta ber thlangah khar dang ka siam ang a, ru tui hlau sangha tlanchhia man ka lo tum ve ang chu,” ka ti a, a lungawi vak loh avang chuan khar thlangta ber pawh chu a sawi thlang khawp mai! Tichuan keini unau leh kan kawmthlangte unau nen Ninganiin kan chhuak ta a, Suardarh thlang daiha li lian ve tak kawng lam daidulah khar kan ping ve ta a. Rawthing 2 vuak zawma khar chu fit 6 zeta sang tur hian kan ruahman a, zawngbilhin kan tah tlat mai a, khup thleng lekah hian kan ping ta a, ngar kan hem phei thluah bawk a ni. Tlang vuakho chuan Reiek kai chhakah khuan rusum, Zirtawpni zingah an rawn thlak a. Sangha tlanchhia chuan kan khar chu Inrinni zing khawvar hma deuh atangin a rawn nek tak tak ta mai a, kan paliin kan zuang lut a, kan man theih dan danin kan kutin kan man nawk nawk mai a, khata sangha tam ang kha ka la tawng ve ngai lo. Kharin a dan tlat avangin khup/malte chen lek vela thukah kan innek nuai nuai mai a, a nal si a, kutlawnga man mai chu a har si, kan ri nawk nawk mai. Engtin tin emaw kan pali chuan em chu kan kalh ve hram thei chauh a ni. A chhakah kan khar dang lo siamin, sahthlak mai theiin lo siam ila, khati taka an rawn nuk hnu deuh khan khar chhakta chu sat thlain chho leh thei loin siam tlat mai ila chu - BEL CHHUNGA SA ni mai tur. Chuti a nih loh pawhin kan khar khawimaw lai kha ti-awngin bawm lian deuh lo dawh tal ila chu phurh sen rual loh kan man ngei awm sia tih hi tun kum 60 hnuah pawh ka ngaihtuah thin zuk nia! Phur 4 emaw chauh kan man si! Ui tak ka ni hnuhnawh. Kum 1962 thal lai khan tuithum kamah thlanvawng tlan Sakhi ka chang a, Hnahkiah kungah ka thu a. Ni tlak hma daih hian Nghalpui no hruai hi a lo tla phei sun sun mai a, ka maniature-ah chuan Remington long, hollow point an tih kha ka load sa vek a. Ka chhukna changel hmunah chuan a pui chu a ding ta chat mai a, changel kung karah chuan kutphah tiat lek hian a pang dum tha zet mai chu a lang a. Changel hung chu pel hret se chiang em ema lang tur leh duh lai taka kah theih tur a ni. Tin ran chungin ka nghak ran mai a, ka silai mu hollow point mah ni se .22 mu te chu a te si a, a thih mai loh hian a uiawm dawn em a, tih ka ngaihtuah avangin ka tin reng ringawt mai a. Khatia a din chaih atang khan a note ri sup sup pawh kha a reh diak mai, pakhat mah ka hmu lo. Tichuan ka chhukna hnu rim chuan a tihlau a niang chu, a kir hmang mai a, an lo kal lam thawm a nat tehlul nen an kir lam chuan thawm reng an nei lo, a bo diak mai a ni. Kha sanghal pang dum ka hmu kha thelh rual loh khawpa hnai a ni sia, hollow point a ni bawk sia, kah mai awm tiin tin thleng hian ka ngaihtuah thin. A dar emaw, a nak emaw ni awm takin ka hmu a, kap ta ila chu thi nghal lo mah se chhui theihin a awm ngei awm sia tihte hi ka ngaihtuahna kal zel zuk ni ta mai mai a! Hmanni lawka ka sawi, Thaidawr nula (lengleh)-in Tiau luia Nghaleng dawipuiah min sawm ka tih kha. Kum 19 emaw lek ka la nih avang khan min sawm nasat tehlul nen ka han tihhlawhtlinsak ngam ta lo kha - sex lam te a tel nge tel lo pawh ka hre lo, chu lam chu ka ngaihtuah pawh a ni lo, an tih dan phung hrim hrim kha - “Bawm ka keng ang a, nangin lung i phawk ang a, sangha keiin ka lo man zel ang,” a tihte kha engtin nge a man zel ngawt theih dan tur tihte leh a sawi ang khan paw hawngin an chhuatah nghat ta ila, a pa khan eng ran nge a talh teh reng tih te kha tawnhriat atan a that tehreng nen, ka’n ngam tlat lo mai kha tunah te hian ka UI VAWNG VAWNG mai nia. Tunah lah “min sawm a” tih bak sawi tur reng reng ka nei mawlh si lo, ka dawihzep lawmman hi pawi tak a ni!