Tun tum chu Tlang tui chawi thung aw. PHE tui tih ang reng hi a awm ang a, kan la hmang tangkai nasa dawn tihte chu hriat phak rual a ni lo. Krismas leh kumthara hman tur tuikhur tui chawi khawl a tul a. Krismas tuizem lian pui pui ang ni lo a san lam feet 4 vel a diametre feet 3 vel a ni bera, chutiang tuibel chu 4/5 kan hawh khawm a, krismas hma deuh fein kan chawi khawl thin. Hei pawh hi nula leh tlangval mawh a ni vek mai. Keichu Mission Venglai ka nih avangin kan krismas tui chawina chu 1. Sakhisih, tui tui deuh mahse thala kang mai khawpa hna tlem a ni. 2. Tlangbawk Vengah Lungkuang kan ti a, hei pawh hi a hna a tlem. 3. Darnam... darnam tih takah, a hna tha em em mahse a tui a tui loa, chhan ek in a bawh reng a, hnar fing ho chuan thingpuia lumin dar rim a nam an tia, thingpui hmel pawh a mawi lo. Dawrkai Veng chuan 1. Sakhisih leh Lungli an chawi ber. Venghnuai tuikhur pawh. Kulikawn chuan Dam tuikhur (Tlangnuam hnuai, Mission Veng ep. (“Dam tuikhura inbual ka phawk nia le, ngaihtha fein silk pawnfen a hlim a, Biahthu di pawh kimten a hril bawka, PHAWK LOH HAWNIN A HAWNG ZU NIA LE!”) tih hla chhuahna kha. Venghnuai tuikhur pawh an chawiin ka hria. Tlangval, keini ang mi ler leh harh tan chuan tui kang nghah hi a nuam. December thla a lo ni tawh a, tuikhur vel hi a vawt ruih tawh mai siam naupang meichher ken kan tihthimtir hmain awmtual kan chhem a, nula meilum ai mal chunga lu han nghahte kha keini ngiang pawhin ka ti ve thin nia! In ngaizawng fal bik deuh phei chuan fianrial deuhah meichhemin ai pahin se sein thu eng eng nge an infah pawh kan hre ve nang!   Heng hun hian tlangval kan zalen zual a, nge kan ler hrim hrim, veng dang tuichawinaah kan kal a, kan ngaihzawng/nula rim ve thinte tuium phurhte kha kan han chhawk vel a.. A! sawi loh loh tur kan sawi mai em niang le! Tum khat chu Dam Vengah Cheng khat thawhin Krismasah ka tel ve a. Chutih lai cheng khat chu a tlem lo a nia aw. LDA-in Ration Compensation Allowance nen Cheng 100 an hlawh tawk niin ka hria. Vawkte lakhran rual kha Cheng 5 a ni. Heta tang hian chhut mai teh u. Tunah Sangnga! Zan tlai tawhah tlaivar tur deuh chauh zai tawhte kha chuan min ngaizawngte an awm ve chuan hnai takah kan thu dun tawh a insi thei thei kan insiktir palh lui tawh thin. Pump khawnvar (petromax) pakhat chhi thei kha chu eng nei tha pawl an ni mai si. Zanlai pelh tawh lam phei chuan petromaxin a saih loa, Laltin (K/Oil lantern) ung tak kan chhi tawh a, tumah tak kha kan in hmu thei tawh bar lo. Zai tui se tui suh se, nula kan thutpui tum chuan a thuhmun reng a ni mai. Kumthar zana, “I pamhmai, i pamhmai,” tih hla kha awawaw!