Tichuan, Indipenden mai tum kha le - tlawm em emin Sikulpui kawna kan in luahah chuan ka han khawsa leh ta rih a, sipai tawh phawt mai chu salute pek (chibai) hi ka nap niin ka hre ber - hmuihmul buk te, Assam Rifles te an inkal pel suau suau reng mai si. A tuk lawkah chuan Office lam chu ka pan a, office building lo nei tawh hek lo i - Civil Hospital-ah a bul kan han tan leh a - dawrpui a kâng bawk si, mi office kâng ve loho office file leh lehkhapuan ilo te dilin kan han intan a - ka file siam hmasak ber chu Welfare of Staff tih a ni dawm mai a. Khatih lai khan Assam State hnuaia district kan nih lai kha a ni si a, Civil Surgeon-in district pakhat a enkawl a - hei tunah chuan Civil Surgeon (District Chief Medical Officer in ti mawi kawi ta vel emaw ni) 8 tawpin an enkawl ta a nia, a staff tam lamah tam daih tawh mah se, a area thuhlaah a ngai reng a, khatih lai kha chuan motor sotor tih vel kha sawi chi pawh a ni lo - kephah hlai puia pen pâwk pâwk kha a ni mai. Saiha MCW te kha centrally sponsored scheme a nih avangin Civil Surgeon, Aizawl vekina an hlawh leh i zawng zawng chu a draw vekin ka hre ta. Sikulkawn atanga Civil Hospital kal leh hawn ringawt pawh chhun pachang a ni na vang vangin kan phâwk hru reng mai. Ka hnathawh ber chu staff awm leh bo tih ang reng zawn khawm a ni. W/T kan hmang nawk nawk mai. Ka chhungte pawh kar khat hnuah emaw chuan an lo chho a, kan khawsaho leh ta a. Nimahsela, March 31 chuan office-ah Assam Rifles section khat an lo kal a, ‘I u-in a be duh che,’ min rawn ti rip mai a! Ka hre thiam ve nghal mai a - Ka u-in min biak duh avanga sipai paruk rukin min koh thu awm suh. Ka thiante ka chah nghal thlap a, ka pawisa neih chhun chu ka pe nghal bawk a. Tichuan, Quarterquard-ah min dah mai a ni. Quarterquard Cell khi 20’X10’X18’ high vel a ni ang, a liang chang a sâng vak mai a ni. Chutah chuan 20 chuangte min han khung thin a niah! A kilah tel tin ruak zunna turin an dah tawp mai a, 20 vel kan awm reng mai si a, a hîng duh khawp mai. A chet miah loh lai chuan zia tak a awm; mahse, mipa 20 vel chu kan zung fo lo thei si lo a, chet loh lai a khât ngei mai! Dailenna chu Lammual chhim lam hnuai, khawchhak lam epah hian min escort thin. Kan LAL ang reng, daikal turte silai nen ngat min veng nia! Kan tan lai chuan Havilder major (Gorkhali) Mizo tawng thiam hi a tang ve bawk a. A hming chu ka hre lo, Narain Singh-a thian thin - Ae-ek-hnima kan tih ve mai thin nupui fanau a zuk chhanna velah eng emaw buai a awm em ni, Quarterguard-ah an dah ve hlauh mai a, Havilder major lai a lo nih avangin sipai rawn kal hlek an awm chuan, ‘Hey, Gatha, biri deu,’ ‘pan deu’ tih a hrat a, a zar kan zo nasa khawp mai. Tichuan, tlaiah tu tu emaw min thlang chhuak a, zanriah ei hmain police thana-ah min hruai phei a, chaw ngheiin kan zankhua - kan rual hian Zemabawk pa, kekawrte ha lo, puan veng hi a tel ve a, mei heh ve tak a ni, pulitho (vai hlir) khan min dap vek a, kan neih zawng zawng, digene tab, leh kawnghren chenin an la vek a, Zemabawk pa chu a lo fing khawp a, biri zial 3/4 vel a hum a lo ni a, a puan ven kha phelh rawh an han tih khan biri chu hum tel chungin a puan ven lai chu a thet huk mai a, a lang ta vek a ni chek ang, OUT an tia, an pass ta mai! Tichuan, pulit lock-up-ah chuan feet thum thing khum ke nei lo, 5’X3’ zaa khen beh mai pakhat hi a awm a, 10 chuang kan nih avangin kan thu kim thei mang lo. Chu khum hnuai chu tihfai ngai loh a nih hmel. Zingah, Ex-Jem Lalsanga hnenah khan, i titipui pahin pulit pa kha nawalh fung, bengek kherna tur han dil teh, a hmain i beng kha i zungtangin kawm kawm la kan ti a (kan khum hnuaiah khan nawalh bawm ruak kan chhar vang a ni). U Lalsanga chuan a han dil ngei a; mahse, a meimi a kheuh thla vek ta mai si. Mei zuk kan châk si, khum hnuai chu kan han dap leh mar mar a, MAK TAK MAIIN bawk khat kan han hmu hlauh mai a, tuin emaw a zakhnuai ro takin a hru a, a zakhnuaiah chuan a han chep vang vang a, kan nawalh bawmah chuan an han nawt a. MAK TAK MAIIN a alh phat mai a, Zemabawk pa biri 3 emaw chu kham lo em emin kan inzuk kham nak nak mai! Kha nawalh bawk khat kha engtika lock-up khum hnuaia awm tawh nge tih pawh hriat hleih loh, hlawu tawh daih awm a nia; mahse, a vawi khat nawhnaah a alh phat mai nia, kan lawm teh asin. Chhunah District jail-ah min hruai thla leh ta a, kan vaiin 100 dawn lai kan ni. Cell-ah chuan U Tlangliana leh U Johna an lo awm ve hlauh mai. Keini chu a enga mah hre lo kan ni a; mahse, U Tlangliana khan experience a lo ngah tawh avangin jail-a ei leh in kan dawn zatte chu a bu ang maiin a lo hria a, min hrilh ta vek a ni. A chhan chu chaw kan kham loh viau vang a ni. Mahse, convict lohho chuan buhfai chatak 4 leh a chanve chauh kan dawng a lo ni a, zing thingpuite pawh hi an dawng lo a lo ni, Aizawla convict hi chuan thing an phur a, chung thing an phurh hralhna vel chuan thingpuife ilo an lei a, min lo pe ve lek hi a lo ni tihte min hrilh fai vek thei nia.