Tun tum chu Aizawl hmar lama UPC (United Pentecostal Church) lo din tan dan ka’n sawi mai mai teh ang, tam tak tan hriat phak loh a nih tawh avangin. Tun tum chu Aizawl hmar lama UPC (United Pentecostal Church) lo din tan dan ka’n sawi mai mai teh ang, tam tak tan hriat phak loh a nih tawh avangin. A din tanna ni leh thla tak lam chu ka hre lo a; mahse, ka sawi tum zawk chu a lo din chhuah dan tih mai a ni. Kan hriat theuh angin a rawn din tantu tak chu Pu Kamloa a ni. A mah kha a tir chuan Welsh Mission hnuaia Compounder a ni am eng emaw vangin a banga, Lushai Trading Company din a din leh a, chung hun lai vel chuan amah kha thlarau lama mi tui a ni si a, Assembly of God missionary, sap pachal 4 emaw lai a  chah chhuak a. Welsh Mission sapta leh kohhran khaipate nen nasa takin an sawiho a. A zuk report dan kha, Biak ina hla sak an phal lo tih te a ni fahmiang. Chu chu an rawn chhuanlam nasa hle a ni awm e. Mahse, kohhran hruaituten, Inkhawm chhunga hla sak phal loh lam ni loin, kan hla bu awm ang chang 4 leh a thunawn te chu sak tho a ni. Inkhawm hi darkar khat chhung a ni, thuhril te, tawngtai te, hla sak te a hun hi hman a ni tlangpui. Pu Kamloa leh a hote duh dan hi chu hla saka lâm a, chu hla chu vawi 5/6 nawn te a ni a, programme (darkar khat) angin a kal theih loh a vangin, kham rawk thleng zai chu chu kohhran inkhawmah chuan a rem lo a ni tiin an lo hrilhfiah a. An hrethiama an hawnsan leh ta si a, Welsh Mission nena sawi pawh awm set set loin Thakthing Venga Pu Lianbuka, Bawrhsap Office Accountant hna thawk inah an zaikhawm thina. An zai nasa mai thin. Chutia an inlak hran takah chuan tuna vai sikul kan tih chhakah sawn, Welsh Mission Biak in tiat chiah leh a shape pawh inang chiahin UPC biak in chu a din ta a ni. Chutah chuan District pastor hmasa ber a ni zui ta a; mahse, a term a zawh khan, District pastor chu thlan emaw a ni si a, a tling zo ta si lo kha anmahni chhungah an buai an buai leh ta a, pawn lam miin kan hriat dan mai mai kha chuan an kohhran khaitu tur ber chungchangah khan an buai an buai ni berin kan hria. Khatia an buai an buai lai khan UPC (NEI) hi a lo ding ta nawlh mai a, chutah Pu Kamloa ho chuan UPC of Mizoram tih te emaw ni kha an din leh a, a tawp lamah phei kha chuan Pu Kamloa bawk khan UPC 7th Day te a din ni tain ka hria, tunah la dam tak maw?! Ka thian tha berte zinga mi tlangval pakhat chu Pu Kamloa pawl, a tawp thlenga zuitu a ni nghe nghe nia. Thakthing Venga (Pu Lianbuka in) an inkhawm lai chuan keini tleirawl chu UPC vang ni loin, ler vangin kan kal nasa thin, inchhunga leng lo, nula tleirawl tukverha bawk chunga bawh ve kha, UPC vang ni loin a nuam ve hrim hrim.