Thil engmah hi lutuk reng reng chu Tha a awm lo,’ tih hi, sawi leh sawi hnu, Sikulpui Hall bangah an tar thin a, naupan lai (1940-42) chuan sikul kal apiang hian chhiar loh theih pawh a ni lo. Nimahsela hei, upat lamah a pawimawhzia ka hmu chhuak dawn chauh niin ka inhria. Chung hun lai chu K’u Sena (P.S.Chawngthu) khan ‘Ka awih lo, a nih leh Pathian thu hi awih lutuk ila, a tha lo anga maw?’ tia min zawh hian ka dang leh thin, naupang thuchang. Tunah hian la dam sela, ‘Pathian thu hi kan awih lutuk phak lo,’ tiin ka chhangin ka inring. Amaherawhchu, kan HRE lutuk thei chuan ka ring thung. Tunlai hian Pathian lehkhabu lehlin dan hrang hrang (version) chanchinbuah kan lo chhiar ve nial nual a, (NEL NUAL a ni lo) a sawi dan hrang hrangah thu kan inchuh lek lektein a hriat theih rum rum mai. Mizo hian, dik tak chuan Pathian thu hi khawvel pum puiah kan hriat ber ka ring thin. Tunah hian Khristian zingah a hnam ang zawngin inelna awm ta sela, Khristian 1000 zingah khan hre ngai miah loin 5 theuh min pawng thlan ta se (pick and choose), Pathian thu hrilah inel ta ila, inpuahchahna hun nei miah loin, Mizo Khristiante hian Gold Medal kan la ngeiin ka ring. Keini ang zawng turung mai mai pawh hian Pathian thuchang min tilunglengtu tih te kan nei ve nual phak a nia, ralkai chin chuan Pathian thu eng eng emaw kan hre ve tel tul mai a nih hlawm hi. Saphoin TV-a an sawi an han lehlinte hi, Senior department ngaihthlak tawk awm a ni lekfang thin, thu mawl tete vek a nih hi. Keini Mizo erawh hi chuan thu ril pui pui - khawimaw lai Thuthlung Hlui chang lar lo tak takte kan phulpui hlut thei zel a nih hi. Kan thian pakhat chu, ‘Inkhawm ang,’ tia an han sawm hian rang fahran hian, ‘Thu thar a awm em ni?’ tiin a chhang vat thin. Pathian thu chang lo, Pathian Hlate pawh hi a nawlpui hian kan hre viau hlawm a nih hi. Amaherawhchu, Hriat tam ai chuan Nih nghet lam hi kan mamawh chu niin a lang. Dik tak chuan Mizo Pathian thu awih hmasa - Khuma te, Khara te angte khan keia hriat zat hi an hriat ka ring reng reng lo; nimahsela, an nih chanve chanve pawh hi niin ka inring si lo. Pathianin Lal Isua rin avangin min chhandam a nih an hria a, an ringa an ni tlat mai a ni ber a. Chu an nihna chu khawiah pawh an hmang tlat ngam a ni. Pastor Liangkhaia kha a tlangval laiin Pathian thu a awih a. Lal leh upain zanlaiah, ruahpui vanawn sur laiin an khua, Khandaih atangin an hnawt chhuak tih a nih kha. Khanglai khan Pathian thu eng tehchiam a hriat a rinawm loh. Mahse Pathian thu awih a nia, an khua atang chuan a chhuak mai a ni. Kum 1930 hma lama Mizo Pathian thu awihte khan an awih tak meuh niin ka ring thin. Ka pain Mizo Khristian hmasate awm dan leh nih dan tawite a ziaknaah chuan Chawlhni leha Lalpa Zanriah kil tur a nih chuan a hma kar khat chhunga nupa emawin intihthinrimna deuh neia an inhnial deuh chuan chu Lalpa Zanriah chu an kil ve ngam lo, kil ve tlaka an inngaih loh avangin. Keiniho, tunlaia mi hi chuan mithai ei mai mai niin a lang, rual u-te chuan an rin Pathian avang chuan lungawi an tum hram hram zel a, Pathian thu dal an hlau em em a nih chu. A tawi zawngin dah ila - an hre tam lo, Pathian thu awih an ni a, an nghet bur mai a ni. Keini, tunlai Mizo Khristiante hi chu - Pathian thua rinawm tlatna lam aiin hriat tamah kan inel emaw tih mai turin Bible lehlin dan - chumi version, khami version kan ti a, pawl lah hi keini ang duang chhiar sen lah a ni tawh lo. Van mi, Krista pawl, tih ang reng kan kat nuk mai - pawl hming mawi lam a nih a rinawm loh. Stephana te angte khan Chanchin tha Johana ziak bung 3 chang 16 velte hi a chhiar pawh ka ring lo, a la awm pawh ka ring lo. Lal Isua kha Pathian fapa leh Chhandamtu a nih a ring nghet bur mai a, lunga an den laite khan, Lal Isua a hmu tlat mai a nih kha. I hre tam lo ang u ka ti lo - i nghet ang u ka tihna a ni zawk. Han ngaihtuah ve mah teh, Mizoram hmar chan lam (ka hriat ve deuh lam)-ah hian 1890 velah Wales Mission an lo lut a, chuta tang chuan - ka hriat sual loh chuan Salvation Army a lo chhuak a, chutah Seventh Day Adventist, UPC (a ko chhuaktu berin rei vak loah UPC Sabath tih emaw ni a din thar leh a), IKK (sen leh var), UPC (NEI), Salvation lah Kolasib vel atangin Chhandamna Kohhran tih emaw ni, Mizo Kohhran tihte emaw ni pawh hriat sen chi pawh a ni tawh lo. Kan innghah tumna erawh chu Pathian pakhat a ni tho si. Kei ka mawl bawk a, Petera te, Matthaia te, Paula te pawh khan Trinity - Unitarian tih ang reng an khel vak pawh ka ring lo. Lal Isua hi Pathian fapa a ni a, min chhandamtu a nih ring chu chhandam a ni tih rin hi ni mai awm taka ni (John. 3:16). Han ngaihtuah mah teh - Cheng nuai 5 nuai ruk hlawh chhuak pawhin an tu an fate tribal scholarship hmuh theih nan nuai hnih hlawh pha loa inziak duh kan phu lui lui ni maw ka ti mai, Kohhrana mi intitangkai tak ni siin. Eng emaw sawrkharin rethei leh harsa zawkte dawm kanna tur scheme a siam hlek leh kan bawh tlurh zel mai - BPL member tih ang rengte hi, a criterion tak ang ngat hian lak ni ta sela - chhawk tur kan tam awm. Heng thil, kan hmuh ve phak loh hmuh tuma ni lo puia inchhalte hi a ni lawm ni curruption an tih sek hi? Hawh u, mawl takin, nghet takin Pathian thu hi i awih tawp mai ang u. Ka ngaihtuah thelh em ni lah ka hre lo - Kelkang simna dawhkana kûn hi nuai chuang ni tawhin ka ring - chung zinga sing hnih khat tal chuan chu simna chu rawn hawnin hmang sela chu - khua/veng thahnem takah, tuna lâm/bingbileh tih ang reng a lan ang hian lang vea mawi a niin i hre ve lo maw? Inkhawm uar/lâm,bingbileh te hi nun hlui zawk simna tura a bul ni se a lawmawm ngawt ang. Heng thu ka ziak laia ka theihnghilh theih loh chu, ‘U Lalbuai, zanin inkhawmnaah kan zaipawl a, ka tenor lehnghal a, ka tang lutuk a, ka aw a têng zo vek tawh, khawnge um chanve chauh min han thlit teh,’ tih type kha kan thahnem a niang a!