Ka Huang

Ka Huang (Sept. 28. 2014)

Chhuanliana BVT - Sep 28, 2014

Ka Huang (Sept. 28. 2014)

Chawlhni hmasaa Saichal khuaa Zalen nula ka rim thu ka ziak kha - Saichal khaw chhuak (?) tu tute emawin an lo chhiar a niang chu, min rawn hrilh nual mai. Tu emaw chuan, “Khawchhiar, i thlennate fapa kha ka ni,” min rawn ti a. A dang leh chuan, “Saichala i nula rim kha Hmingliani nge Kaphnuni i la hre reng em le, Kaphnuni a nih chuan tuna Engineer Liannghinglova ni hi a ni ang,” tih te, “I nula rim kha Pathian thu lama kan mi hriat lar, P.C.Biaksiama U a ni ang,”?te an rawn ti nawk mai!! Keia nula rim mai mai an lo chhiar hi ka lawm a, Saichal khuain ka lung a tileng thar. Kha ta Zalen nula ka tih kha - Lal kan neih lohna chin pawh kum 60 lai a lo liam ta mai a, tlema hrilhfiah tulin ka hria. Tun hma chuan VC an awm lo a, Lal an awm thin. Lal chuan ro a relpui turin upa tlem azawng a nei bawk a. Lo hi nambar loin Lal leh upa thu chuan an en thin. Lal chuan Ramhual in eng emaw zat a siam a, dan naranin chhungrual, buh thlo chhuak tam thei awm a thlang chawk thin. Chutiang leh Zalen an ti a, chu mite chi hnih chuan lo, mipuiin an ena an thlan hmain an thlang hmasa thin. Buh thar hunah pawh tute emaw kham khawp thlo chhuak zo lo an awm chuan Ramhual hnenah khan chung kham khawp thlo chhuak zo ve loho hnenah chuan Lal leh Upain buh rate an siam anga hralh turin thu an pe thin. Buh chhun pawh vantlang aiin an chhung dawbawl a, buh pawh an ngah nge nge deuh zel a ni. Zalen hi chu Lalin duhsak a lantirna a ni awm ber e. Ka hre kilhkelh lo. Kha mi zana Ramhual leh Zalen ho (Lal lamtang ni awma hriatte) an/kan aukhum zan khan, Saichal khaw laili deuh kawn zal lai kawng chhak maiah hian, tawng ri ka hriat dana pa ber nei tawh lo, nula an nih pawhin upa lam 2 aia tlem lo awmna, la kai lai hi kan chho aukhum a, “Tunge Zalen bâng duh lo?” Mipui chuan, “Pi......... chu mi i,” an/kan ti thup thup a, a rual chiah lo nge, ring bik a awm - inchhung atang chuan hmeichhe puitling aw hian, “Chumi aw lar lar chu (mipa a hming ka hre tawh lo) a va ring ve!” an rawn ti a, chu pa chuan, “Uai, min han malman chu le!”?a tih lai ka hriat chuan khawtlangin an malman a, an aukhum dual dual chu a ni si a, engvanga min han malman chu le ti ni maw tiin ka ngaihtuahna a kal nghal. Ni e, kha lai hun vel, Lal la bâng si lo, khawtlangin ngawhngo chhuah an tan vel lai kha chuan sawrkar hnathawka lal zawng zawng kuli lak kha a nuam lo khawp mai. Aiduzawlah pawh khian min check tawh nghe nghe a. Lal awmna khua tawh phawt maia kuli (porter) thlak kha a buaithlak khawp a, harsatna eng eng emaw an siam a, Lal hnenah han in-report ila, khawper kal hun a ni, naktukah kan ngaihtuah ang te hi an lo ti ta dahrual a, duh lo mah ila châm a tul zel mai a. Chu lai chuan Aiduzawlah U?Sapnela (P.C.Sapnela)?te inah ka thleng a. Lal zawng zawng ni tin sikithum (75 paise) a lak a buai erh reng mai ai chuan zin chhung min zui a, zin ni apianga Rs. 1/- hlawha inchhawr kha ni tin siki (25 paise) chawi belh mah ila, zin chhung na na na chu awmpui ang hawt an lo ni a, châm ni tein puan suk ilo leh hritlan nikhua pawhin unau ang deuhin kan inbuaipui thei a tiin, chuti ang mi tur chu, U Sapnela pa hnenah chuan min zawnsak thei emaw tiin ka zawt a. Chu thu chu Union OB lamin an lo hria a, “Sawrkar hnathawk pawh va ni suh, sikithum la thei rengin Rs. 1/- a mahni pawisa ka belh mai ang a han ti vel hi,” tiin an lo buai a ni awm e. Tu emaw min fiah turin zingah a lo kal a, kei lah pek ka lo la tho ikhaw si lo, min kai tho hreh si a, a chhuak leh ta mai a ni awm a, U Sapnela pa chuan min hrilh chhawng a, “A nih tak chu, Union President inah chuan ka zuk kal ta ang e,” tiin ka chhuak a, sawrkar lehkhate chu ka keng nual a. Min kawhhmuh chu Pu Chhunbura (P.B.Nikhuma, P.B.Rosanga, Lalzuala te pa) a lo ni a. Zirtirtu a nih avangin kan lo inhre viau mai a. Hnang a lo hlai a, ka kal chhan ka han sawi chuan, “Mai mai a, engmah a ngai lo, nang i ni tih kan hre lo alawm,” a ti chul mai a, mahse ka entir lui ve ta tho tho a, i thianten min hre ve hlei nem tiin. Thu dang sawi lo chuan chhungkaw chanchinte kan inhrilh kual ta vak zawk a ni. Baktawng hi hmanlai motor sotor awm hma chuan riah bi a ni deuh a, Aizawl atang hian mel 27 (km 43) vel a ni. Aizawl atang hi chuan a hla lam hret chu a ni a, Satinahmuna riah chang pawh kan nei fo mai. Baktawngah pawh hian kuli (porter) chungchangah chuan a buaithlak tum a awm. Khawper kal hun a ni an tia, Signal-in a thelh mai lawm ni, a man chu ka chawi ang a han ti ila. Kuli koh chungchangah signal hman phal a ni lo an lo ti bawk si. Ka châm zing lek mai. Chhimchhak kal nan chhuahka ber a ni mai si. Chuvang chuan Baktawngah chuan ka tlangnel phah lek lehnghal a, tlangval tan chuan a nuam ang reng. Kei lah pek hi min be lumlam peih deuh nula hi chu, bullut tum nei an sawi ang maiin ka birh tlut tlut zel mai. Tum khat phei chu nula lo zawhnaah te ka tel ve vel maw le, kurtai ser hnih ka thawh lehnghal! Ka lenna ber erawh chu - sawi law law mai ang, min ngaizawng azang pawh ni hlei lo, Rohmingthangi a nia, lal muala khawsa, Mizo in pangngai tha fel taka sak a ni a. Vawi khat chu ka thian Seikungan chawi eiah min sawm a, Aikam khirh tham tak meuh hi belthleng lianpui maiah a hung a, chakai duh tana duhthusam a nih laiin ka lo duh mang loh lam chi a ni a, ka puar fahran lo. Chu thu chu Rohmingthangi te inah chuan ka sawi a, a pa chuan, “Chakai pawh duh lo chuan eng tak nge i duh a?” a ti a. Kei ta pek chuan, “Baibing duhtawka ei tur awm se,”?ka’n ti thlarawk a. Rohmingthangi pa chuan, “Baibing duh nafam chuan naktukah ka rawn hawn ang a, a tuk leh tukthuan i rawn ei duh phawt chuan baibing ka lo rim ang e,”?a ti ta mai. Hnial chi a ni tawh mang si lo, ka “Ni e,”?ve ta a. A sawi ang ngei chuan a rawn hawn teuh mai a, an zan mun a, tukthuan kan han ei chuh, ka ren lo ve ngei mai! Lung a leng e - Rohmingthangi te tak kha a la dam chuan kum 80 thuartham a ni ngei tawh ang a, khawiah tak tuan ang maw? An lo zawhnaa ka kal vena, Nuzawni chu a la dam tih ka hre chiang a. Directorate of Industries hnungah khian Health Department atanga retire-in a khawsa tih ka hria. Ani nen chuan Department khata thawk kan ni a, kan inhre ta zel a ni. Lung hlui a leng thar thin e.
Share now