Ka huang chhiartu duh tak, Chawlhni hmasaa KA HUANG-ah kha chuan dik lo a tlem tawh khawp a, 15 vel emaw chauh a nih tawh kha! LDA (Lower Divn. Assistant) tia ka chhut LAD an rawn tite kha chu tihluihte pawh a ang rum rum e. A chhu chhawngtute hi Mizo an ni lo em ni ka hre chiah lo a, an chhiar tawp lo tih chu a lang. Engle khawle, kei chuan sawisel tawh loh a thain ka hria, ka bei a dawn hunah ka titawp tawp mai zawk ang e. Kar hmasa chanchinbu velah khan Naga hel NSCN eng pawl emaw kha Tuensang District-a Noklak/Pangsha velah 4/5 lai kap hluma an ziakna kha ka chhiar a, kum 3/4 lai ka lo khawsak vena hmun leh kha Noklak kha U Zothangseia nen thawk hmasa pawl kan nihte ka rilruah a thar chuai chuai a; chuvangin, chutih lai chanchin (1954) tlem chu han ziak leh zuk châk tlat ia. Pangsha-ho chu Burma ram depa khawsa an ni, in 250 vel ni tain ka hria. British sawrkharin unexplored area-a a dah lai khan Naga Hills District-a khuate an lo zuk runin lute an zuk la thin a niang, British khan sipai (Assam Rifles) tirin tum hnih expedition lai neiin an in leh an chhek inte an halsak vek hnuah an kirsan leh mai thin. Hnam kawlhsen tak an ni nain sawrkhar chu ngam rual an ni lo tih hriain kan han awm ve (1953) te kha chuan sawrkhar thlawp ber an ni. Khatih lai kha hel pawl chu NNC (Naga National Council) tih chauh a awm, Pu Phizo kha a la dam bawk a. Kan zu thlen tirh vel khan inthah a awm ka hre lo. Mahse, 24-10-1954 (Chawlhni) kha kan Dak Runner PAMPAN min thahsak a, kha kha ka hriatah chuan Naga rama inthahna tan ni mai maw ka ti hial (Tuensang District bikah). He Pampana thah hi amah a ni tih hre kher lo mah se, eng emaw thil tha lo a thleng dawn tih Gorkha & Ralleng puithuna avangin a hriat chu an hria a ni. Ni 23-10-54 in Tuensanga porter-ho hlawh bill submit tura ka tirh an ni. Chawhnu lama tir ka nih avangin kawnglak, Chingmei khuaah a riak a, a tuk 24/10 chuan Tuensang HQs chu an pan leh ta a. Naga underground 4-in an umphak a, 2-in an karcheh a, pakhat hma lamah a kal a, a palina chu hnung lamah. Yimchungrr tawng an hman avangin Pampana chuan a hre nial nual a (NEL NUAL ti suh), a kalpui Kongkhaua chu - engpawh thleng se min buaipui suh, tlan vak ang che a ti a. Rei lo deuh hnuah pakhat chuan Pampana chu chem hnung lamin a hrawkah a khawng nghek mai a, chu velah Kawngkhaua chu (tlangval chak tak a ni) a tlan phat mai a, a hma lama awm khan a lo sat a, lungte a rap hrual emaw ni, a sat tha hman lo a, a hnung zangah hian a ser hnu pawha inchi 11-a seiin a sat a, chuti chung chuan Tuensang panin a tlan ngar ngar a, in hmasa ber Darthawma inah a tlan lut a ni. Chutih lai vel chuan keini - kan Base Supdt. Zothangseia, kan OC Jem. Damar Bahadur, leh Primary Zirtirtu Obangtemjen te chuan OC inah chuan an perimetre chhungah lehkhaden kan lo deng a, kan inchawi a, kan man khawl chuan behlawi rah kan lei a, kan chhumtir a, kan ei hawng hawng mai! A dang a awm lo. Mak ka tih tak chu, khaw la thim hma, ni tlak tawh si hian sipaiho chuan ar an um ta khup khup mai a. Kei pek chuan engati nge ar an um vak tiin ka zawt a. OC chuan a khuang a, an talh dawn a, an um a nih saw a ti mai a, an man a, kan lenna in chu vawi thum an ar chuan an vawm khum a. Kei lah pek chuan a nu em ni, a pa a nih chuan a khuan loh nakah ka’n ti leh a, ani chuan a khuan hi a hun lo, arpa pawh ni se khuan hun a ni lo a ti a, kan thianpa, Ao Naga pawh chuan, keini pawhin ni tlak hnu, khaw thim hmaa ar khuang hi kan duh lo, eng emaw thil tha lo, kang mei emaw, thihna mak tak emaw thlen thinah kan ngai a ti a. Kei chuan engati nge nang chu Khristian i ni a, hetiang puithuna atthlakte i rin te ka ti vel a. Tichuan, zanriah ei a hun a, mahni in lamah kan haw ta a. Thawhtanni 25-10-1954 chuan zing dar 5 velah sipaiin W/T a rawn keng a, ‘D/R Pampan killed by miscreants, ASC Kongkhau Seriously injured’ tih hi min rawn pe mai. Kha puithuna atthlak ka tih kha a thlen tlat avangin, a atthlak lo em ni tiin nasa takin ka ngaihtuah a ni. NGE sapin co-incidence an tih hi te ka ti. A thlen hnua ‘Nimin tlai thim hma khan arpa kha a khuang ka ti reng a,’ tih hnuhnawh pawh ni loin, an thah lai bawr vel ni awm khan an sawi kha a ni a. Tichuan, a nghawng chu Kuthur khua run turin Pangsha-ho kha an lo lian phei ta mai, Noklak khuain ration, chaw leh zu kengin an umzui, keini kan Base Supdt. leh Medical Officer te nen thulhtir tumin kan um, sipai section 2 nen, kawng thlangah min nam thla zing teh asin, mel 5/6 emaw kan inchai hnuah kan inthulhtir thei ta hram. A zuai ta emaw kan ti rawk mai. 15-11-54 chuan kan chhak tlanga Yimpang khaw hal khu chu a dum ngun mai a, Ralleng naupangho chu an lawm em em mai a, khi kan hneh e, an khua an hal a nih khi an ti a. Zing dar 10 velah an lo thleng thla a, lu 56 chu kan khaw daiah chuan an hung fur mai, a rapthlak teh a nia. Ka awmpui naupang Mongjona pa pawh chuan lu 2 chu a rawn tan ve a; mahse, amah pawh chu a ban an sah bunsak thelh mai a, thingtang ngil deuh hi ram hruiin an rawn cher hnan a, a kar chu thi khar hlir a ni. Chuti chung chuan min hmuh veleh ‘MONGLING KAW’ nui sang chungin min tih khum, a lawmawm tiraw tihna a ni ber awm e. Chutih lai chuan kan Base Superintendent Zothangseia chu an transfer tawh a, Assistant Political Office (sual zet mai) Sushital Kar-an min ho tawh a, a intilal si, a dawheh si, zin miah lote hian tour diary a’n siam a, Noklak to Panso, Panso to Sanglao, Sanglao to 1st jungle camp, jungle camp I to jungle camp II te hi a ti vel a, khumah a mu reng sia, ka hne em em ringawt thin. Office hun chhunga mei zuk loh a ti bawk a, Ngurkhuma hnenah Player’s Medium tin khat ka chah a, office dawhkanah ka dah a, châk lo chung pawhin kan pu hmuh ngei tur chuan pawnah tri colour flag phunna bulah hmuh loh theih lohin tui tiawm em emin kan zu lui ngat bawk thin. Kan inmul lo ngei mai. A tawp lamah chuan min rawn zukpui ve thin maw le! Runluih chu thiam ve tak kan ni. Kha la dam tak maw!