Zawhna: Ka pu, mipa kum 42 mi ka ni a. Nerve tha lo ka ni a, zing ka thawh hian ka lei hmawr leh kut hmawr hi a hik/chawmawlh thin a. Tukin ka zing tho chu hemi mai bakah hian ka kâ a thur vek a, ka tui in pawh a thur vek a. Engnge a chhan ni thei ang?

Chhanna: I kum ngaihtuah chuan nerve tha lo i neih hi a chhan hriat hmasak a tha hle mai. Zu in nasate hian nerve tha lo, Peripheral Neuropathy an nei duh khawp mai a, Vitamin (Thiamine) tlakchham vang a ni fo thin. Chutiang a nih chuan multivitamin (Beplex Forte) hi ni tin vawi hnih kan eitir a, thla khat vel an ei chuan a reh ve mai zel; mahse, zu an in chhunzawm zel chuan hma a sawn mawh viau thung.

Nerve tha lo chhan dang common leh chu zunthlum (Diabetes) hi a ni. Zunthlum control tha loah hian neuropathy hi a awm duh hle. Chuvangin, zunthlum i neih leh neih loh hriat a pawimawh leh bawk ang. A dang leh chu thisen sang (Hypertension) control that lohah a awm fo bawk. Chuvangin, i BP lo check la, a sang a nih chuan enkawl that i mamawh tihna a ni thei bawk.

Ka thur i rawn sawi tak hi erawh nerve lam fel lo vang ai mahin pum lam fel lo a nih duh hmel viau mai. I la in-checkup ngai lo a nih chuan Endoscopy lo ti thei la, pumpui lâwng (Gastritis) emaw, pan (Ulcer) emaw i nei palh thei a; tin, pumpui acid chaw kawnga fawk let leh (reflux) vangte pawhin a awm thei bawk. Ka thur hi a reh ve leh mai thei bawk a, a reh lova a awm reng a nih chuan i pum check-up uluk chu a tul hmel viau mai.

Nerve tha lo kan tih hian chi hrang hrang a awm thei a. Hnungzang lama thazam chhuk thla spinal cord fel lo eng emaw ber vangte pawh a ni thei bawk a. Tin, electrolyte imbalance kan tih mai, Sodium, Potassium, Calcium level fel lo vangin heng insawiselnate hi a awm thei bawk. I nerve tha lo neih hi doctor-ah mumal takin i inentir tawh em i sawi lo va. I la in-checkup lo a nih chuan uluk zawkin lo in-check-tir thei la a tha ber awm e.