Amah Vanneihtluanga’n a ti alâwm, ‘Zirtirtu hna thawk ni si, zirtirna rilru pu miah si lo; daktawr ni si sumdawng ni tlata inhria… Minister ni si, contractor ni tel tlat; a rilru chuan contractor level a ni. Contractor nih a châk avânga Minister a ni.Hna hmuh nân chauha Ph. D te kan awm… Mahni khua dry village-a puangtu ka hria alâwm; Kolkata-ah a zu chhuk a, a zu rui mualpho leh si,’ tiin.

Kan nihna hi kan ni lo lutuk hi a hahthlâk! Chhaz ten min bân avânga mai mai a hruihrual melh tai nghâl ngawt tûra dina siam kan nih ni lo. Kan nihna anga awm kan ngam loh loh apiang hian alâwm kan mualpho. Pu Vanneihtluanga Minister sawi ang khi nih ve kher tum loh a him ang. Kan nihna tûr ang hi kan ni lo thin a… chu chu kan hahpui thin mai mai a lo ni.

Kohhran pawh kan fihlîm bîk lo. ‘YMA chang rêl a sual ngai lo’ kan tih fo lai hian i in check ve zêl tho ang u. Thawhlâwm thawh tam thei apiang lenna khawtlâng kan din chuan eng tin nge mi retheite ‘pâ’ kan nih teh lul ang? Kross liana hming ziah thlâkhlelh vâng ngawta thawhlâwm ka thawh tawk tawk chuan, vân lama kan hming ziahna tûr, a thlâwna, hming ziah ngai miah loa, khawngaihna avâng chauha ‘Nunna Hming Bû’ kan mangnghilh palh ang e…

Kan mamawh ber chu fianriala fìm hi a ni. Rawngbâwlna leh khawtlâng thilah kan hmanhlel fû a ni mai thei; mahse, chhûngkaw uap zawh loh nân kan hmang fo. Kohhran Upa kan ni ve ngawt a ni mai thei; ka fanuin sâwn a pai si chuan… eng nge ka upat chhan ni ang le? Kan ni tin hnâah hian rinawm ila, tin, kan nupuite lakah pawh. Chuta tang chuan ram siam that hna hi thawh i tum teh ang u.

A lèr atang ni loin—lemchan nun sim hi ram siam thatna hmanraw bûr lian berah i hmang thiam ve tawh teh ang u.Kohhrana kan inhman dân te, khawtlânga kan inhman êm êm dânte hi kan hnâah chhawm zui zêl ila… Kan sawrkar hna thawhnaah hiann chhawm zêl ila; tin, Kohhran leh khawtlâng kan hmangaih ang hian kan hnâ hi hmangaih ve tawh ang u… Ram ropui thleng tûr hian, a sawia sawi satliah lo hian nunpui ngam ve tawh ila… Kan nihna dik tak hi nunpui ngam ve tawh ila… A rui chî chu rui mai ila, insawisêl sek lo hian. A KS pawn la service mai rawh se; mahse, rinawm thung se la. Taxi ka khalh laia fare-a ka rinawm ang hian in chhûng khurah pawh rinawm chhawm zêl ila… Mahse, dân hi zah thung ila; kan chunga lêng—lal ber a ni miau a.

Kan nih loh dân anga nun reng zawng… a hahthlâk lulai êm mai tiraw…?