Dr Hrekima Titi

Ka Nu

Dr. C. Lalhrekima - May 29, 2021

A lo thiam ngang mai reng a. A thiam satliah a ni lo, a taima em em bawk! 

Ka nu hi a lehkhazir laia ka pa aia thiam thei zawk a ni, an ti. Pawl 3 a zawh hnua a thiam leh tuina zawng nia a hriat ‘kut hnathawh’ thlang ta zawk a ni a. A lo thiam ngang mai reng a. A thiam satliah a ni lo, a taima em em bawk! 

Pathian thu zir zawma ka pa a bo vang vang hlanin lo neiin min lo enkawl a. Feh kawngah lukhum a phiar a, feh loh niah puan a tah bawk a. Chumi a hralhna chuan lawmte ruaiin, hlawhfate a la leh thin. Vawk a vulh a, vawk hriak chawm tur kha kan nei kumtluan thin ni maiin ka hria! Kan la naupang em zawk a, a thawhrimzia kha kan hre kim lo zawk ang. Hah thikulin a thawk a ni ber ang.  Amah pui turin ka pi (ka nu nu) kha a awm ve reng bawk tih hi sawi hmaih phal chi a ni lo; ka pi chhawm zeltu ka pa nen! 

A kut a themthiam em em a. A la phiar leh a puantahte kha miin an duh bik thinin ka hria, ka ngaihsan vang ni maw! Puan-ropui a tah manah kan chhungkuain wardrobe hmasa ber kha kan nei thei, Chanmari-a kan awm laiin! 1981 velah, a kum chiah ka hre ta lo. 

Mipa naupang paruk hrual hi a har ka ring. Mahse ka nu, pawl 3 pass chauh kha finna leh chaknain Lalpan a thuam a niang, min enkawl hneh viau tlat! Lalpa hi a tih a ni ang, nu mawl kha a fing tlat zel. A chunga awm commander, pasal tha thu a awih bawk a niang.

Mangaiha mei zu ru a tihdan kha ka la hre reng. Lehkhapuan hlai tawkin mei a zial a, sikul kaltir loin nilengin a’n zuktir mai a nih kha! Tlaia kan sikul bân chuan a lo meng sen rum tawh mai! Tunlai thlirna atang chuan tih chi loh lutuk! Atthlak tak a ni. Rawn tur dang a nei lo a, tihdan tur hrilhtu pawh a nei lo ang, Kawrtethawveng-ah khan! Mahse a result a tha tlat si! A sim chiang teh e, khatih lai khan, kan pasitor-a hian! 

A vin thin ka ring, a vin thin tih erawh ka hre miah lo. Mipa naupang paruk enkawl tur khan vin that that a ngaih ka ring ve tawp! Kan hlau em mai! A vin a, a ri thak a, a sitrik viau a lo nih pawhin, tu nu dang nen emaw tehkhin tur kan hre chuang lo a, nu nihna tur niah kan ngai vek a niang. 

A rum viau thin ka ring bawk. Rum deuh loh chuan Jca te, Cona te, luhlul si, harh si kha enkawl an har ang! Nauthana te, harh si, fing si, hnial hneh har si enkawl tur chuan a rum ka ring ve tawp! U ber hlei hlei hi a nia, enkawl hara ka rin chu! Ngawi renga luhlul si a nia! Middle skul a kal laia chanchin ngaihnawm nei pha ngat khawp kha a ni a. A lo rum viau thin a nih pawhin, chu chu nu awm dan turah khan kan ngai leh tawp a nih ka ring. Ka nu tihdan kha kan pawm zel a niang, kan depressed phah lem lo a nih kha a! 

Kan han tlangval a, nupui kan neih dawn tak hlawm khan ka tim deuh a. Keini min enkawl anga a mote a enkawl vaih chuan an tlin rei lo ang tih kha ka hlau a ni. Kum 47 a nihin mo hmasa ber a nei a. Kum 49 a nihin a mo pahnihna, ka nupui ka nei leh. Kum 63 a nihin a mo parukna a nei. Zei loin fing tawk lo fo thin mah se, a mote hi a thiam tawkin a hmangaih ve a. Hei, Sangtei leh Mami pawhin tlan miah loin inneih silver jubili an lawm zo ve ta der mai! In dan hmain kan nupuite hian kum 10 chuang an hrawn deuh vek! Nu mawl kha Lalpan a pui a ni leh pek ang! Pui lo se chu, ka laka damlo rawn vui tam tak ang mai hi an ni ve ngei hlawm ang! 

Keini leh ka nu hrawn tur tak zel hi Lalpan nupui min pe ve hlawm bawk a ni. Ka nu fel vang a ni vek lo chiang ngawt ang. Kan nupuite theuh hi an lungawi lo ve fo ang tih ka ring, keini chhungkaw lakah hian. An tuar a chhel ve bawk a ni. Keini leh ka nu leh pa min nei tur chuan tawrhchhel pawh a ngai dawn em asin! Kan nupuite u, kan lawm e, ka nu lakah in dawhthei a, min hmangaihpui thei a, kan lakah in dawhthei bawk hi a ropui! Kan mualpho hrih lo zel e. 

Nupui neihte kha kan han châk ve a, chhungkaw nun hi a lo harsa fo si. Nupuite tan a ngai a, nu leh pa lama tan a ngai bawk si! Kan nupuite theuh fel zarah buai chhe lutuk loin kan la heti ve hram hram zel a nih hi, kan mawl nufa hlawm tehlul nen hian!

Nimin 29.5.21 khan ka nu hian kum 75 a lo tling ta. A tu leh faten zahna chibai kan buk hi a phu hliah hliah e (mi dang chuan lo zah lo pawh ni se). Lehkha zir sang lo na na na chuan thiam loh a ngah ve khawp ang. Mi zawng zawng tana nu tha an tih ang tur hi a nih ka ring lo tawp! Mahse kan tan chuan nu tha ber a ni tawp! Mipa pasarih (pa ber nen) enkawl tura a bika duan ni mai hian ka hria. 

Fing tawk lo mah se, tihfuh loh nei ve fo pawh ni se, a tu leh fate hmangaihna hi a phu e. Kan tihfuh loh lai leh kan ât chang khan min lo hmangaih reng thin si a! 

Nu leh pa zawng zawng hian an tu leh fate bik chawimawina hi an dawng ngei tur a ni. Chu chu Pathian thu a ni. Nu leh pa chawimawina chuan hmangaihna, ngaihdamna, thuawihna, ngaihsakna, duatna leh thil tam tak a keng nghal. Pathian thu a nih miau avangin a pianchamphaphak-ah hian ka nu chanchin kan ziak ve hial a nih hi.

Tu leh fate hmangaih em emtu nu Pathianin min pe hi kan va lawm em! Ka nu, min dampui reng rih teh! 

Deuteronomy 5 : 16  - LALPA i Pathianin thu a pek che angin i nu leh i pa chawimawi rawh; tichuan, LALPAN ram a pekah che hian i hmuingil ang a, i dam rei dawn nia.

Share now