Naupang tê ka nih lai khan, ka hriat theih chinah, ka mihring hriat theih hmasak ber chu ka nu hi a ni—tûna ka nu la ni ta reng hi.

A hnute hnèa ka chen lai zawng zawnga ka nun kha ka hre sî-se zozai tawh lo a; mahse, ka taha min thlêm thintu a nihzia te, hlauh ka neiha min vêng thintu a nihziate erawh, ka la hre faih faih thei.

Nî khua a lo rei a. Mâwl luat nun ka pêl a; ‘mâwl zual nun’ tawng chhoin nu leh pa thu leh hla mamawh loa awm nachâng hre khawpin ka inti fing ve ta hial mai. Ka tàl tâla tàl mai mai min phalsak khawpa rilru zau pû reng, ka nu leh pate chu ‘thing’ hi ka’n ti thin khawp a—khatih lai khan!

An remtih loh tûr ngaihzâwng ka nei lui ngat a—an mahni run luih ka châk luat vângin. Tin, ka ngaihzâwng thu-hlaa inhnamhnawih ve tûla ka hriat loh vâng pawh a ni bawk ang chu. Mahse, kha nu nen khan kan ni rei chuang lo—min lo kawp a! Ka la nangiang mai!

Chaw ka ei thei lo a, ka mu thei bawk hek lo—kha hmeichhe pakhat avang mai mai khan. Ka nu khan ka hrehawmna zawng zawng kha min hriat thiampui vek a; mahse, ka hrilh hranpa loh avang pawh a ni ang chu—min zâwt chîk duh lo; hrilh enah ka en duh chuang bîk hek lo. A tawrh hnu vek, a tawn hnu vek a ni. Chûng chu ka tawn ve eih eih chuah a. Táwn ve eih eih ka nih erawh min hrilh kher loin a man thiam vek a… a sawi kher lo… a ni mai a!

Zirna lamah ka tluang chho purh zêl mai a. Sawrkar hna sâng tak ka thawk hial ve ta a. Ka làwm tlukin ka nu chu a lâwm ve ringawt. Hna sâng ka hmuh avânga a chapo ka hlauh luat avângin ka zilh lêt fo mai. Mahse, ka nu chuan, a fapa chanchin sawi hi nuam a ti ngang mai a—ka khap sêng lo fo mai nia.

Zan khat chu, office lama ka thawh zawh loh hnà ka hàwn tûn mai a. Ka mut dâwn meuh chuan zanlai a pêl ta hial.

Ka pindan kawngkhâr inkik det det rî ka hria a. Ka va hawn chuan ka nu lek chu lo niin!

‘Bawiha, ka tibuai che em? I pindanah hian, i hna leh i i hrisêlna atan hrim hrima tawngtaisak che i remti em?’ a rawn ti a.

‘Ho lutuk! Ka tawngtai vek tawh! Hnà ka tan hma leh ka zawh rualin Pathian hnênah ka hnà ka hlàn vek tawh! Nû… va mu mai mai teh!’ ti tuar tuar chungin ka nu chu a pindan lamah ka nawr phei ta sawk sawk mai a.

‘Aw le, Bawiha…’ tia min chhânga paha a khum a pan lai chu ka hre thei.

Chumi zân chuan ka muhîl thei ta tlat lo mai!

Ka nu khan engkim min hrilh thin a nih kha… hmâna naupang tê ka nih lai atang tawh khan. Adama chanchin te, Mosia chanchinte leh Lota te chhungkaw chanchin te; tin, vawiin thlenga ka mi ngaihsân, Josepha chanchin zawng zawngte pawh … ka nu chuan min hrilh vek thin. Ka pa nêna an inngaihzâwn dân chanchinte leh chîn dân tha, awm dân mawi leh thil tha tinrêng mai kha ka nu khan min lo hrilh vek mai thin a ni a.

Vawiina ka hausak tâkna chhan te, nupui pawh… A! Duh duh thlang thei ka nih theihna chhan zawng zawngte hi… ka nu khan engkim min lo hrilh lo ta se…

Tin, ei ru dinhmuna ding theia lian ta thûr thûra ka la ei rûk miah lohna chhante leh lung si zân leh insitna tel miah loa Kohhrana Pathian Ram Thawhlâwm ka thawh theihna chhante hi… ka nu leh pa min tawngtaisakna avang te; annin, kei, naupang tê thawnthu tha min hrilh keuh keuh thin vâng te; mi lawilo leh mi hawihâwm lo ni chunga ‘Bawiha! An theih ang saw i thei ve ang,’ tia min fuih tâng tâng thintu—ka nu leh pa avang hi a ni chiang asin!

Ka pian nia na tuartu, ka thih nia ka ruang hlâwm tur—ka nu hi—miten eng ang pawhin demin hmusit mah se la—khawvêla ka dam chhunga ka nu a ni reng ang a—ka hmangaih ber a ni khumkhua tawh ang!

Happy Ruby Wedding Annivarsary
to my Mom & Dad
Siamliani & P. Siamhranga
@December the 10th,
Twenty of Twenty