Zawhna: Ka pu hmeichhe kum 20 mi ka ni a, ni dangah chuan ni 3 te ka period dan ani tlangpui a, a ni 1 na ah hian ka tai hi a na thin a, a ni 2 ni 3 na velah chuan a na ngai tawhlo. Tunah chuan ka period chhung a na reng a, mut harsa khawpin a na thin. A hlauhawm thei ang em?

Chhanna: Hmeichhe thi neih dan phung hi han sawifiah hmasa dawn ta ila. Thi an neih zawh chiah atang hian an thi neih hunbi kalphung (menstrual cycle) a intan a. Tichuan an chibawm (ovaries) atanga hormones te khan chhul chhung bang (endometrium) kha naupai thei turin a rawn buatsaih a, a chhah tial tial a. An chibawm in chi (ovum) a pek chhuah kha mipa chi (sperm) nen a intawh loh chuan chhul bang chhah lutuk kha a tawpah a rawn insah huk a, tichuan thi an lo nei ta thin a ni.

Hetiang hi thi insiam dan anih vangin chhul awm dan a zirin a na in a na lo thei a. Chhul hmawr kua thi chhuahna lai (cervix) zim lutuk te, chhul inthlep te, chhul a bawk awm vanga tihrawl tang rual thei lo te leh thil dang dang vangin thi neih harsat tee maw, thi neih na hi a awm thei a ni. Chu lovah chuan thi insiamna kawnga chibawm function fel lo vang te, chhul bul tisa awm dan fel lo vang te in thi neih na hi a awm fo thei bawk.

Thi neih laia na ti vak vak thin (Dysmenorrhea) hi kan tarlan tak chhan hrang hrang vangin a awm thei a. Kan sawi bakah hian chhul leh a kaihhnawih infection emaw vung (reproductive tract infection/ inflammation) te, zunkawng infection vang te, ril chet dan fel tawk lo vanga ek mumal lo, a bikin ek khal leh ek harsat (constipation) vang te pawhin thi neih na hi a awm thei a ni.

Chuvangin in check chian a tha hle mai. Chhul, chibawm leh tai chhung tisa lam fel lo a awm nge awm lo hriat nan ultrasound tih a pawimawh hmasa anga. Tin, zun kawng lam fel lo hriat nan pawh ultrasound hi tih a tha tel bawk a, chu bakah chuan zun test (urine routine examination leh culture) te pawh tih a tul thei ang. Chhul hmawr lam fel lo awm thei rule out nan Gyne doctor in pelvic examination an tih a tul thei bawk a. Virgin tawh lo an nih chuan chhul hmawr enchian te pawh a tha hle.

Engpawhnise, a chhan ber hriat loh, investigation ah engmah hmuh tur awm chuang lo, na reng tho si an awm fo bawk a. Hlauhawm han tih tur em chu ni lo mahse enkawlna tha dawn a pawimawh a. Chuvangin nang pawh a theih chuan hmeichhe doctor (Gynecologist) lo inentir thei la, i harsatna hi an puih theih ngei che ka beisei. Kan sawi belh duh chu taksa che tlem lutuk ah hian thi neih buai a awm duh phian a, chuvangin physical exercise te pawh tih tam a tha hle.