Vawiin Vau thla ni 8 hi Pu Chhuanliana BVT piancham (Pianchamphaphak tih kher tur a ni em kha?) a ni. Zalen hi min mangtha titih deuhin ka hria, kar hmasa khan! A titi ngaihnawm leh bengvarthlak hi chhiar tur a awm dawn ta lo a nih chuan a lunglenthlak dawn hle.

Vawi khat kan inchibai tawh, Corona virus lar hma daih khan! Thla kan la dun loa pawi ka tihnuhnawh hle. An inneih champha vawi 50-na an lawm dawn khan sawmna ka dawng ve. Chhan dang a awm lo a, “Zalen-a ka thenawmpa” min tih vang a ni. A titi hi ngaihnawm ka tih bakah a hriatrengna tha lutuk hi ka lo chhinchhiah ru khiau a. Hmanlai thil hrang hrang, ngaihnawm em ema a sawi chhawng thiam hi a thilpek dawn dang a ni.

Mihring hrim hrim hi kan lo upat zel hian kan thluak hi chhe tetein a sawng ve deuh a. Hriatrengna pawh hi kan hloh then hret hret tur a ni. Hriatrengna ai mahin hriat theihna, chhinchhiah theihna hi a bo hmasa zawk thin. Hmana thil kan hriat sa, kan thluaka nghet taka inphum tawh, ‘hriatreng’ hi a nghet duh fu mai a. Chuvang chuan alawm, “Kan pi hi thil hre thei tawh lo viau e ti lo hian hmanlai chu a hre fu sia,” an tih fo. Thil thar chhinchhiah theihna leh zir thar theihna a buai hmasak thin avang hian hmanlai la hre fu hian nichin lawka an thil dahnate an hre thei ta lo fo. Zawhna ngai an zawt nawn a, an sawi ngai an sawi nawn fo.

Upat hrim hrim vang ni lo, natna avanga hriatrengna leh hriat theihna hloh hi an awm thin. Tunlaia an sawi lar tak, Alzheimers Disease leh hriatna hloh natna dangte hi upat vang ngawt ni lo, thluak natna avanga rilru mang an ni.

Eng rualah pawh, tun hma aia hriatna a that loh a, kan haihawt viau a, kan rilru a mang chuan inentir a tha. A chhan hrang hrang a awm thei si a. thenkhat chu dam leh thei, hmasawn thei an ni.

Upa zawng zawng hriatna hi a chhe hauh lo. An haihawt vek lo. Tar ât nei hauh lo, tar fing tak tak an awm. An hnen atang hian zir tur leh hriatbelh tur a awm. Chung zinga mi chu Pu Chhuanliana hi a ni. Upat thluak chak loh pawh hi a nei ve lo nge ni!! Ziaka thil min hnutchhiah hi a hlu zual zel dawn.

Veng hrang hrangah leh kohhran hrang hrangah upate hlutna hria, upate ngaihsak nachang hria an awm. Kum tawpahte leh hun bik engemawah thilpekte an pe. Inngaihsakna hi thilpek hlu tak a ni a, tar leh upa ngaihsak leh ngaihsan hi uar zel chi a ni.

Upate lak atang hian zirtur tam tak kan nei. Upa nazawng hian ziakin thil an chhinchhiah si lo. An taksa boral ruala an thil hriat boral ve zui ta mai thin hi a uiawm thin. Veng tina kan upa fing tak takte hi kawm a, titipui a, chhinchhiah peih mi awm thin se a hlu ngawt ang. Pu Chhuanliana anga ziak mi ni ve lote lak atang pawh hian finna leh hmanlai chanchin sawr chhuah tur tam tak a awm ngei dawn si a. Ziak mi deuh chuan ziak hian thil dah tha ve zel thin sela a hlu dawn em mai. Pu K.Zawla lehkhabu reng kan tangkaipui hi. Ka keu leh thin.

Ka kawmthlangpa Pu Lawmtea pawh hian thil a hre khawp mai a. A hnen atangin Sazumeidawh awmziate ka hriat phah! Lehkhabu ziak teh ka ti leh thin. A la ziak em ang chu maw! A tar hma hian!

Tum khat chu ka fate sikul zirlaiah, “Thereng chi hrang hrang hming sawm ziah tur,” tih kha inlam hna atan an rawn tuk a. Ka lehkhabu neih ang angah kan zawng a, ka zawng hmu zo lo. Ka hriat chhun chu, ngirtling leh lelte chauh a ni mai si! Pu Chhuanliana hi biakhlatnain ka zuk au a, a sawi nghal teuh mai! Kan lawm pafa teh asin! Kan thehluh hnu khan Thereng chi hrang hrang hmingte chu hriat pawh ka hre zui leh pek tawh lo a nih hi! Chhuanlian BVT chu tluk lo vai vai tak ka ni.

Mi bik, mi hlu, Pu Chhuanliana hi Pianchamphaphak chibai ka buk e. Ka pu, min dampui reng la, rohlu tam zawk min hnutchhiah ang che aw.