Kum sàwm leh kum khat liamtaa Chanmari, Ramhlun panna pheia U Lalhmaa dàwr, Mahindra showroom atangaka thianpa RS-a’n a thar min khalh chhuahsak, khã ka Mahindra Flyte, gearless scooter kha—vawiin thleng hian kala khalh chhuak ta reng a. A la chak êm êm mai a, bike awtloa min siamtu a nih vàng pawh a ni ang, “R-1 Flyte” ka tihdeuh kherna chhan pawh hi!

Sawi tâk angin, kum sàwm leh pakhat chhúng zet, anihian he hring nun zin kawng chhuk chho hi min lo zawhpui tawh a, ka zawh lamtluang inpersan thinzia pawh a hrechiang e. Thil tawn mak pui pui leh hlimawm fe fe sawi tùrpawh a tam; mahse, ani nèna kan intawn ní, tú ma la chuanngai lohna scooty thar ka neih ní kha i’n sawi teh ang.

A neitu rilru

Ka nupui chungah tih loh, eng ke hnih nei chungah mah hian mahni thuin ka la chuang ngai rëng rëng lo a, a khalh phei chu ka la khalh ngai miah lo! Mihring fapa hi, mihring chunga chuan zirtír ka ngaih loh tehlul nèn, amah Vanneihtluanga iang­in, kháwl thluak nei lo chunga chuan erawh chu zirtír ka ngai nasa mai dáwn tih chu ka inhre reng mai. Chutichung chung chuan a hnathawhna Hnahlàn lam kal leh hàwnán taka a hawl chhuah thin, Apache RTR bike neitupa, ka thianpa RS-a chu, ka scooty thar min khalh hàwnsak tùr chuan ka’n ring zo lo ve khanglang a! A lâk chu min lâk chhuahpui; mahse, a khalh zêl chu ka phal tlat lo.

Chéng za li leh sawm hnih man lek pawh mi dang nèna inchuan tâwmpui chu sawi loh, inkhalh tâwm phei chu ka phal lo nasa a ni a, a sînga sîng fé man phei chu inkhalh tâwm ka phal lo hulhual! Mahni puala ka lei ve a nia, a neitu nihna rilru nghet tak ka pu ve tlat. Tin, “mahni tã khalh châkna” thinlung ka put bawk avàngin ka thianpa remti lo chung chu ka’n chuang lui ta kha a ni a. ’Nge mawn' le, ka tã alãwm maw a nih tawh le!

“King of the road”

Khalh chhuah hma hawta ka’n chuang chhin vêl ringawt pawh chu, Chairman ta riau hian ka inhre nghâl ngawt a! Mi dang zawng zawng chu ka hmu “member satliah” vek bawk! Kawng chu ka ta neih rilrûk nghâl dèr a; sâp leh vai truck driver, motor lian ke sawm pahnih nei hoin an motor hnunga “King of the road” tih an ziah/tàr thin te hi a awmzia ka hre thiam thar deuh thut bawk! Amah ka nau Zo-lu-buki (Zoremi Hmar Zote), a nu pawisaa helicopter-a chuang ve satliah mai mai te kha ka hre chhuak zawk—hnuai lama a mihring hmuh apiang mai heli­copter-a la chuang ve lo hmuha a hmuhzia te kha! Kei erawh chu ani ang ka ni ve lo—keima hmingin, keima pawisa ngeiin, ka tã ni hlen tawh tùr “ka scooty” chungah ngei mai ka chuang bîk. Ka duh leh kawng síra kea kalte chu, scooty la nei ve lo, la chuang ve lo leh achhin pawha la khalh ve miah lo hmuh te paw’n ka hmuang chu—mahni tã khalh ka ni dáwn miau aläwm!

Chutiang rilru ka put mék lai chuan, kea kal lo hahthlâkzia te ka ngaihtuah chhuak zêl a. U Lalhmaa dàwr atanga kan in awmna, Mac Donald hill pawh chu kea kal arálah chuan a lo hla hle dáwn niin ka hre thar ta thut a. Bus fare leh taxi fare lo tòzia te pawh ka rilruah a rawn lût zui zut zut a. Eng­tin nge sikul kal tùra Zonuam thleng thleng taxi in-contri'-a ka lo kal duh thin le, taxi fare te kha lo khâwl ila, bank-ah ni tin chéng … tihte ka ngaihtuah lai chuan—‘Khaaa!’ tiin RS-a chuan a kianga ding chu min au vak a lo ni a. Nung vut vut ka scooty chu ti thiin kawng sírah a húng tha a. A chabi, oh! ka scooty chabi chu min pe ta a.

Scooty thar—ráng lo zeuh zeuh!

Hun rei tak kalta atanga scooty thar nei tùra lo inbuatsaih tawh ka nih avàngin—eng anga thimah pawh “chabi thunna point hai ngai lo” ka nih ve hrim hrim vàng pawh ni chuang loin, scooty chabi thunna tùr te chu hre chiang tak hi ka ni ve tawh. Tin, tih nun dáwna hmeh keuh tùr awmna te, a head light tih ènna te, a hrûk faina puanchhe dahna tùr te, a steering kalh (lock) dàn thlengin … “a thu”-a hriat chi leh thiam chi chu ka hriain ka thiam vek tawh. Chûng ka thil hriat sate chu tih nun rualin ka’n “test-chhin” kual vêl a. Mahse, ka la thiam kim lo a ni ngei ang, ka khalh chhuah hmaa a zuartute hnêna, ‘Khawi lai nge a back light tih ènna hi?’ tih ka zâwt kher kher khân ka thianpa nuih ka ti za ta êm mai a. Chu zawha ber kher chu, a zuartute chuan chhàn chi loh zawhna tih an hre thiam a ni ang, ‘A! I hre chho ve zêl mai ang,’ min ti duh chauh! Ka zak hman tho! 

Ka scooty thar chu ka ti nung a. Liam zawih zawiha petrol thun tùrin Ramhlun lama petrol pump pan chu ka tum ve ngei … niin ka inhre ta. Tû mah ka phur lo. Ka hnunga chuang ngam an awm loh vàng, tih sawi lan kher pawh a tül lo. Ka khalh thui lo; chuti chunga ka mualpho nasat hmanzia sawi chiam pawh tül ka ti hek lo! Chanmari véng huam chin chiah, Ramhlun South nèna an inrìna bul atanga khalh tan ka ni a; Ram­hlun South ka khalh thleng lo! Ka khalh chhuah atanga second rei lo të-ah RS-a leh a zuartuten, ‘Heiiii … Ziraaa … heiii!’ tiin min au zui chiam ka ti rëng a ni! 

Ka scooty thar chu a ráng lo pheuh pheuh! Scooty ai mahin ka la ráng nasa zâwk lehnghâl!

Zirtírtu aiah …

In lama ka chhúngte chuan scooty thar hmuh an lo inbeisei nasa ve ngang mai a. Kan nu khân, scooty tak tak kan neih hma thla hmasa atang tawhin, a hrûkna tùr pawnchhe tharlám kha tûk tin chaw ei thleng a sil zawhah a sûk chhâwk deuh sek tawh a. Kei ngei paw’n thenawmte garage-a scooty thar dahna tur parking fee, thla hnih kalta atang khán ka chawi lâwk tawh bawk. Mahse, kan lei thar ní chuan, a scooty pawh, a neitupa pawh, mahnia häw thei kan awm ta reng reng lo ve ve mai kha a ni a! 

A thara ber ka scooty chuan hliam a tuar nasat êm avàngin khalh hàw chu sawi loh, taxi pangngai pawh ni lo, taxi van-a phurh hàw a ngai hial a. A neitupa pawh, ina hàw tlang chu sawi loh, in thlen hmaa Civil hopital casualty-a phurh luh hmasak ka ngai bawk a. Ka khûp leh ka hmaiah thui ngai lo leh bel ngai lo ka nei pheuh pheuh! 

Mi scooty nei thar, khalh thiam sa lote chuan neih thar zànah a khalh zirtírtu tùr an thiante an sáwm thìn a ni ngaia; kei ve chuan mechanic ka koh a ngai thung! Hun rei takchhúng sum tuaka neih ve ngei ka lo tum rauh rauh, Masi aia ka ur nasat—vawiina duh taka ka neih ve tâk ka scooty chu, kei aiin mechanic U Tea’n a duat hmasa zâwk dáwn ta a nih chu! Ka ngaihtuah nasat poh leh ka tah a chhuak zual sauh a. Chutia mechanic U Tea’n duhtâwka ka duh tak ka scooty thar kaw chhúng a’n hai hawng vêl tùr ka ngaihtuah chet chet chuan, ka khalh thiam lo tih ka inhre duh lo vêl kha ka inchhïr telh telh. 

Ropuia tumna—ka tlàwmna 

Ka R-1 Flyte lei thar ní chuan ropui ka’n tum ve vei nèn, ka mualpho chhiava chiang ngei mai! Ka khalh chhuah hma kha ka ngai ngawih ngawih a. Ka ka thil lo ngaihtuah zawng zawng—bus leh taxi fare tláwm ka tih ve ngawtzia te, Mahindra two wheeler showroom leh kan in inkár hla ka lo tih thlàk ve rawk hmanna te, scooty la chuang ve lo leh la khalh ve loa mi dang ka lo hmuh hmanhmawhna zawng zawngte kha, a va han chapothlâk ngawih ngawih tak êm! A nei thara ber pawh hi, mi kal pangngai anga kea kal loa, bài chunga rei fé ka kal uih uih a ngai dáwn a nih hi! 

Ropui riaua kan inngaihna hian, min ti tláwm dèr fo a; kan chapopui thin ngei ngei hian, min vaw zal dèr thìn a lo nih hi!