Zawhna: Ka harsatna hi min tanpui theih chuan ka lawm khawp ang. Kum 84 mi lai ka ni tawh a, kum khat liam ta vel atang khan ka serh mu (testicles) ding lam hi a lian riau mai a, vei lam hi chu a lian chuangin ka hre lo va, ka kum te a tam tawh si a, operation tih lam chu ka ngam tawh mang si lo va, damdawi eiin emaw, injection-in treatment a lak theih ang em? Tunah hian artui tiat dawn lai chu a niin ka hria.

Chhanna: Mipa til kan tih hian a tilpum (scrotum) kan sawina a ni thei a. A chhungah hian tilmu (testicles) bakah a hrui (Vas Deferens) a awm a, chu chu tuirilin a tinal turin a hual bawk a. Tilmuhrui hi phing hnuaia thal chi khat, Prostate Gland paltlangin zun kawng (urethra)-ah a invuah ta a. Chutiang chuan tilmu a insiam mipa chi hi baw tui nen inpawlhin mipa serh a zun kawngah hian a lo chhuak ta thin a ni. Tilmu hi solid organ a ni a, bawk a awm hi chuan rinhlelh hmasak ber tur chu Tilmu Cancer a ni. I kum ang zatah phei chuan rinhlelh ngei ngei a ngai a, chian tur chuan Surgeon i pan hmasak phawt a tha ber ang. Ultrasound leh thisen test hmanga endik a ngai ngei ang a, a rang lamin lo pan thei la a tha hle. Cancer hi a lo nih chian chuan zai pawh a ngai thei ang a, i taksa dinhmun a zirin a enkawl dan tur chu an duang thei ang. Tin, operation a lo tul a nih pawhin hreh lo la, i taksain a dawl zo dawn lova an hriat chuan doctor-ten tul lovah an zai ngawt lo ang che.

A dang lehah chuan i tilmu a bawk ni lovin tuiril che thei lo vanga rawn puar (Hydrocele) a ni leh thei a. Hetiang a lo nih chuan awlsam taka zai dam theih a ni bawk. Tin, tilmu hrui kawng zawh hian ril emaw, thau them tilmuah a lo tla thla thei bawk a, chu chuan til a tipuar thei bawk (Hernia kan tih hi). Hei pawh hi awlsam taka zai dam theih a ni bawk.

A dang lehah chuan tilmu hrui inherh sual (Testicular Torsion) a awm leh thei bawk a, hei erawh hi chu na a siam nghal thuai a, emergency a zai ngai a ni fo thin.

Tin, tilmu infection (Orchitis) a awm leh thei bawk. Heng hi chu antibiotic hmanga enkawl dam theih a ni.

Engpawhnise, a chhan hriat hmasak hi a pawimawh hmasa ber a, tilmu lam insawiselna, a bikin bawk emaw, puar emaw chi reng reng chu ngaihthah lova doctor (Surgeon) pan hmasak ngei hi a tha ber a ni.

Zawhna: Nu, kum 68 mi ka ni a, ka hahni chung lamah hian a puar a, doctor tunge ka rawn ang? Tin, zunthlum rei tak vei tawh ka ni bawk.

Chhanna: Hahni (Gums) lam insawiselna chi reng rengah chuan Dental Surgeon pan hmasak ber a tha a. Mahse, i rawn sawi angin zunthlum (Diabetes) nei i nih vangin khawih i ngai dawn a nih chuan Medicine Specialist emaw, Diabetologist-in enkawl hmasa thei che sela a that hmel.

Dental Surgeon i pana enkawl i ngai a nih chuan anni pawhin i blood sugar control an chawh hmasak phawt a rinawm. A chhan chu zunthlum hian pem leh eng emaw zai ngai ang chi reng rengah chuan a dam har a, a pun duh a; tin, thi chhuak a awm pawhin a reh har fo bawk. Chutiang avang chuan i zunthlum control hmasak chu a pawimawh hle dawn a ni.