Luangliam

Ka Tape Recorder vs YouTube

Zirsangkima - Jul 17, 2021

A neitupa tâna “bâwih tha leh rinawm” an in nih hleih ziate hi aw

Ka hlut êm êm leh roh taka ka roh an ni ve ve a. Mahse, ka tâna an in rinawm hleih zia te, a neitupa tâna “bâwih tha leh rinawm” an in nih hleih ziate hi aw…

A Hmasa-in ka tape kha!: Harsa taka ka neih kha a nia—khã ka tape recorder kha. Panasonic mah ni se, ka tâna a rinawmna kha a pan ngai lo. Sikul ka kal hlâna ka ngaih thin zia lah chuti bawk. A hmingin “tape recorder” a ni ve chang chang a. Cassette nei thaa hming thang, thenawmpa, Pa Thanga cassette record chhàwn nân chuan Side B a nei ve lo—one band ni miau hek! Âw (voice) thun nán chauh a tlâk! (Tûn hma chuan voice record hi “aw thun” kan ti mai thin)

Aw thun nán chauha tlâk, chû ka tape recorder chu a tlâktlài loh tehlul nên, ka ngai thin a, ro bera ka neih a ni thin. A chhan chu, Sailothangi Sailo atanga Smokie a zaitîr thei vek tlat a ni! Chu chu thil ropui takah ka ngai thin a; thiam pawh hi ka ti thìn rëng bawk a, ka ngaihhlutna point lian tak pawh a ni. A cassette reel a that ahnû, Lallianmawia atanga The Beatles a hrùt hmaih duh bîk miau lo a; thlìar a nei ve ngai miah lo te kha…ropui ka tih thinzia kha aw!

A hunah, AIR Chanchin thar puan nân a tlâk tlat tho a; zíng kâra thenawmpa sipai báng Pu Dùna Akashvani ngaihthlâk nân, a hmunah, rinawm takin a awm mai zêl tho thin a—a herh nuna hnû. Chhuah (play) vêleha Lalchawimawi zai a ni emaw, Lobo pawh ni se, a hnial ve chhin aih ngai lo. Don Williams-a “Maggie's Dream” a sak ngei mai te kha … khã ka Panasonic tape-a zài nawntír tak asin ka châk thin ni! A màwi dàn kha a famkim bîk tlat thin! E! Emmylou Harris-i “Forever my darling” ngei mai te kha a va forever hluah hluah bîk thin tak—khã ka tape-ah kha chuan!

Current a awm loh hleka ka ngaihthlâk duh hun a thlen cháng lahin, thenawm dàwrah, Sakei chuang battery lian chi ka va lei ngei ang a; tha tê tê-in a nung lehnghal mai zêl a. Chauh a sawi ve lo a—chû ka tape chuan. A káa cassette kan thuna hnu, zài kha a thulh duh ngai hlek lo mai a. “All India Radio … Chanchin thar, a puangtu, Ramherliani” tih lah, a púte thu zàwmin a puang mai zêl—thuawih takin!

Tih nun chhúnga nung, herh mil chhúnga chanchinthar min hrilh thintu, a káa cassette thun chhûnga zai peih—khã ka tape kha ka ngai thin mang e! Ani kha zawng, a rinawm êm a; mi pawi pawh a sawi ve ngai lo kha a nia…!

YouTube ve thung: A duh apiangin channel an neih theihna; a hman apiang intih journalist-na tualzáwl; kan khawvêl changkâng zêlin a hrin tel; loh theih loha ká, mit leh benga min faha min barhtu, YouTube zawng… a lo awlsam bîk ta mang e! Mahse, lunglên erawh min hnêm ve hlawl si lo!

Rod Stewart-a album thar “Vagabond Heart”, Magnasound cassette, original ngat, chêng 20/- a lei mai mai theih ve loh, original—a káwr (cover) pawh plastic thlap—a neitu nih kan intih theih ní kha a kin ta miau a—kan tünlai a ngai ve ta miau a. Mahse, ka thiam ve ta hauh lo mai!

Hman kuma tláng zarh, mi pathum bengchheng zet, rock band tlo zet—Greenday band-a an zai pú ber Billie Joe Armstrong leh Norah Jones-te’na thangthar nazawng hriat tawh loh tùr, The Everly Brothers hla dah khâwmna album min rawn hluite pawh, pirate-in kan lo download ta zung zung mai a—he YouTube hmang hian. A va’n awlsam tak! 

Mahse, a hlutna chu ka hre lo!

Niminah a album an tláng phal e, an tih lah, You Tube-ah kan lo ngaithla lehnghâl thei mai bawk si a. Tom Petty hla, inti thei fé-a “Free Fallin'” kan lei lai leh YouTube khawvêla Dua Lipa kan chaih lipna khawvêl inthlauh tâk zia hi aw…!

“Siampuii Sailo a zai dáwn!” tia ka tape kîl khâwmtute kha an la dam a nih ve ngai chuan, “Englovi’n, zaninah a YouTube channel-ah a hla a tláng zarh dáwn e!” tih rî hi a va han inrin hleih dáwn tak êm mang e aw… ka ti thin!

Tunge hlu zâwka kan ngaih le? Changkànna khawvêl hi nge ni ang le?

Hmãn nî lawka, zin kawnga SP-i zai thiam titute an tilhna chhan ni ta bera chu, kan changkàn chhoh zêlnain a hrin, a tûate mai a fan tâk, he YouTube hi a ni ta mai si a!

Ka cassette lei kha ka hlut zual sauh a—kei chuan—he YouTube-in a hrin ‘awlsamna khawvêl’-ah hian! Khâng Hla hlui ber atanga vawiina release thar hla pawh ka ngaihthlâk theihna YouTube hian ka tape recorder kha … Panasonic, one band kha … khâ ngei mai… rilru insáwngbing chunga ka love letter ziah pawh min hriatpui thintu kha, min ti ngai zual thin a ni!

Share now