Kamchhuak

Ka thianpa pa

K. Lalrinchhana - May 25, 2021

Thla hmasa atang khan Mizoram khawchhak lam Samthang khuaah chuan YMA hmalaknain chhungkaw tinin zing dar 8-ah tukthuan eivek tur an ti a, zing dar 8 a lo rik chuan YMA Information centre atangin chaw ei turin an au lauh lauh thin a, an la zawm tha rih khawp mai. Zing dar 8 a tukthuan ei zat zat tur chuan thawh hma a ngai a, tho hma tur chuan zan mut hma a ngai a, thil tha tak a ni.

Lockdown hma deuh khan thianpa Mawitea te inah kan leng a, hrilh lawk loa ngaihvarungthawnathawng deuh thut kan nih avangin tu vak mah an lo awm lo a. A pa, kum 90 ral kai tawh chuan min lo dawngsawng a, thukhawchang sawiin kanphul hlut a.

Thianpa Mawitea pa hi kum 90 rai kai tawh a ni na a, a beng hriatna a la tha em em a, a mit a la fiah tha em em bawk a, tarmit loin Bible a la chhiar thei a ni. A che pawh a la zangkhai vah mai. Zingah hma takah a tho thin a, kilometer li vel kein a kal ziah thin. ‘Kum 1960 hnulamah ka khua a sik leh tawh lo’ a ti mai a. Kan inkawm pah chuan an in piah thing hmunte chu a han kawk vel a, ‘Sawng lai ramte saw han vat ila, loa neih ka la châk a sin’ a ti nia!

Thianpa Mawitea pa hian Pathian malsawmna chu a dawng tehmeuh mai. Chutihrualin tun thlenga hrisel taka a awm theih chhan hi a nun uluk vang a ni. Hman ata tawh tuk tin zing vartianah a tho ziah a, khua a vawt emaw, vawt lo emaw, thlasik vur tlak lai pawh ni raw sek sek, tuisikina in bual ngei ngei thin. Chumi hnuah kein kilometer 4 chuang a kal ziah bawk. Tun thleng hian a nunphung tibuai khawpin thisen sang leh zunthum hian a la bawh buai lo bawk. Tin, zuk leh hmuam chi reng reng hi a ti ngai hauh lo bawk. Mawitea pa ang hian insumtheihna leh mahni inthununna nghet tak nen nun hmang thin ila, vanduai vanga accident kan tawk a nih ngawt loh chuan kan hrisel ve tho ang. Ani chuan a hriselna hi a hlawh chhuah a ni.

Mi tam zawk chuan insumtheihna hi kan tlachham khawp mai. Kan kam a hlei em em a, mi zuk ang apiang kan zu thei, mi hmuam ang apiang kan hmuam thei, mi in ang apiang kan in ve thei zel mai. Kan insumtheih loh vang leh kan kamhlei vang hian kan hriselna pawhin a tuar viau mai bawk. Mihring tam dan atanga teha cancer vei tamna ber state kan han ni ringawt mai hian a tichiang tawk viau a ni. 

Zuk leh hmuam kan tih nasat hi kan hriselna changin a tuar lo a, kum tinin phai damdawi ina inenkawl nan sum leh pai tam tak kan seng ral thin. Medical reimbursement-a sawrkar sum sen ral hi kum tin cheng vaibelchhe za dawn a tling thin. Chutianga sum tam tham chu chhungkaw tam tak dawmkanna tham a ni. Thianpa Mawitea pa ang hian zuk leh hmuam lakah fihlim ta vek ila, kan hriselnain nasa takin a thatpui ang a, sum lehpai tam tak kan hum thei bawk ang.

Tin, zuk leh hmuam te, ruihtheihthilte hi chhungkua atanga do chi a ni. Nu leh pate hi zuk leh hmuam lakah fihlim hmasa ila, kan fate tetlai hian zuk leh hmuam that lohzia te, ruihtheihthil tih that lohziate hi an rilruah tuh nghet ila, an puitlin thlengin an thlah lo ang. Chu a hnehin zanriah ei khamah pa berin thuthlengseiah ke a han hlang kai sauh sauh a, kuhva hring a han seh siah siah a, cigarette a han pak khu hlet hlet a, naupangin hmuhnawm ti takin an lo thlir dauh dauh a, a tui hmel si a, puitlin thuai thuai a, meizial leh kuhva hring hanthei pawlh vel chu an châk et et mai a ni. Zuk leh hmuam that lohzia hi sawi sawi mah ila, nu leh pate berin kan thlah phal loh a, kan sim duh miau loh chuan chakai nufa kal inzirtir ang chuah kha kan ni tho ang.

Thalaite tana thianpa Mawitea pa entawntlakna em em pakhat chu zingah a tho hma em em mai hi a ni. Zing thawh hma hi a upat hnua a chin thar thut pawh a ni lo a, a tlangval lai atang daih tawha a tih than a ni a, tuk tin khuantevikah a tho ziah thin. Tunah chuan a tlangpuiin thalaite hi zanah kan meng rei em em a, zing thawh hma chu sawi loh, tuk pumin kan mu ringawt mai a ni. Tho hma tur chuan zan mut hma a ngai a, zana kan men rei miau chuan kan tho hma ngawt thei lo. Thla hmasa atang khan Mizoram khawchhak lam Samthang khuaah chuan YMA hmalaknain chhungkaw tinin zing dar 8 ah tukthuan ei vek tur an ti a, zing dar 8 a lo rik chuan YMA Information centre atangin chaw ei turin an au lauh lauh thin a, an la zawm tha rih khawp mai. Zing dar 8 a tukthuan ei zat zat tur chuan thawh hma a ngai a, tho hma tur chuan zan mut hma a ngai a, thil tha tak a ni.

Zingah hma taka han thawh a, motor khuinapawlhbuai loh boruak thianghlim han hip vang vangte, kawngpui dunga han vei thoh thohte hi kan taksain a thatpui a, kan dam sawng sawng thin. Zing tho hma thangte hi an hrisel vanga tho hma nge an nih a, an thawh hma vanga hrisel tih hi hre chiah lo mah ila zing tho hma thangte erawh mi hrisel tak an ni deuh vek mai. Tin, zing thawh hma hi Pathian thu nen pawh a inrem hrim hrim. Lal Isua pawh kha Bible-ah hian zinga a thawh tlai thuvawi khatmah kan hmu lo. Chutihlaiin ‘zing takah a tho va” tih erawh kan hmu fo mai.

Thianpa Mawitea pa anga insumthei, zuk leh hmuam laka fihlim, taksa insawizawi ngai pawimawh, zing vartiana thoa inbual zat zat thin ni ta ila, Mizote hi khawvela hnam hrisel ber kan ni mai lo’ng maw?

Share now